Faruku wamamaye mu ndirimbo ‘Ikigabo cy’igisambo’ yajoye imyandikire y’indirimbo z’abahanzi b’ubu

Yanditswe na Nsengiyumva Emmy
Kuya 25 Mutarama 2021 saa 01:05
Yasuwe :
0 0

Benshi bamuzi nka Faruku mu itsinda ry’Abakimaze, afite amazina atandukanye arimo Dinho, Ikigabo cy’igisambo n’andi menshi yagiye ahimbwa kubera ibihangano bye.

Uyu mugabo ufite umugore n‘abana babiri b’abahungu, yamenyekanye mu myaka yatambutse mu itsinda ryitwaga Abakimaze.

Mu kiganiro na IGIHE, Faruku utakigaragara mu muziki, avuga ko yatangiriye urugendo rwo kuririmba muri Maison des Jeunes ku Kimisagara mu 1999.

Aha niho yatangiriye kujya asubiramo indirimbo z’abandi bahanzi, atangira kumenyekana mu kigo ndetse n’iwabo.

Muri iki kigo cya Kimisagara niho yahuriye na nyakwigendera Dr Jacques baje gukorana itsinda ‘Abakimaze group’ ryubatse izina mu muziki w’u Rwanda.

Nyuma yuko Dr Jacques wari usanzwe yerekana filime ku Muhima yize ibyo gutunganya indirimbo z’abahanzi, yiyemeje gukorera indirimbo Faruku yari yabonye nk’icyamamare muri Maison des Jeunes ku Kimisagara.

Mu 2007 Dr Jacques wari winjiye muri F2K Studio, yakoreye Faruku indirimbo zirimo ‘Mama’, ‘Kutiga biragatsindwa’, ‘Njyewe narumiwe cyangwa ‘Utazi gukora agenzwa no kugabuza’. Nyuma yaho nibwo yakoze indirimbo ’Ikigabo cy’Igisambo’ yamenyekanye cyane.

Faruku avuga ko atazi neza uko we na Dr Jacques bisanze bakoze itsinda, ati “Yabanje kujya ankorera indirimbo, birangira twemeranyije gukora itsinda.”

Kwimwa ku igi na Fanta, imbarutso yo gukora indirimbo ‘Ikigabo cy’igisambo’ yamumenyekanishije cyane

Faruku avuga ko umunsi umwe yari kumwe na Dj Lil kuri studio, uyu musore wari usigaye akorana na Dr Jacques yaguze fanta n’igi arya wenyine arabima.

Faruku yababajwe n’uko batamuhaye ku igi na fanta, abwira DJ Lil ko agiye kumuririmba nk’ikigabo cy’igisambo.

Ati “Ntabwo navuze igi, njye niririmbiye ikigabo cy’igisambo. Indirimbo iba irasohotse ikora ibintu bikomeye, yatumye ngura imodoka, ndubaka n’ibindi.”

Faruku na Dr Jaques bakoranye igihe kinini, icyakora bakunze kugirana utubazo twa hato na hato twatumye batandukana inshuro zirenze imwe, kugeza ubwo biyemeje kutongera gukorana nk’itsinda ariko mu buzima busanzwe bari inshuti.

Mu 2014 nibwo inkuru y’incamugongo yamenyekanye ko Dr Jacques yitabye Imana. Faruku avuga ko urupfu rw’inshuti ye batangiranye urugendo rw’umuziki rwamuciye intege bikomeye ndetse rutuma aba ahagaritse iby’umuziki.

Yagize ati “Kongera kubona uwo dukorana byari bigoye, Dr Jacques niwe wari unzi neza. Nta wundi nari nabonye wapfa kumva ibyo nshoboye.”

Ibi byahuriranye nuko yari amaze kugira inshingano zisumbuye zo kwita ku muryango we, bihumira ku murari ahita ahagarika umuziki.

Ni umukanishi w’umwuga ubabazwa n’umuziki wo muri iyi minsi

Nyuma yo guhagarika iby’umuziki mu 2014, Faruku yihebeye ubukanishi yari yarigiye kuri Se umubyara.

Nubwo gusa yihebeye akazi kamufasha kubona ubushobozi, umutima uracyatera umusaba gukora umuziki.

Icyakora nubwo yifuza gusubira mu muziki, ababazwa n’uko abawukora muri iyi minsi batandukiriye ubuhanzi.

Faruku ashinja abahanzi bo muri iyi minsi gukora indirimbo zitarimo ubutumwa bufatika.

Ati “Nk’ubu mu muziki wo muri iyi minsi ntabyo baririmba, nta butumwa bufatika baririmba, indirimbo zabo zirabyinwa kuko ari urubyiruko, ariko ntiwabona umusaza abyina igare.”

Faruku avuga ko nk’umuhanzi mukuru ashishikajwe no gukora ibihangano bifite inyigisho zubaka umuryango nyarwanda.

Yanaboneyeho gusaba abahanzi bagenzi be muri rusange guhindura imyandikire y’ibihangano byabo bakaririmba ubutumwa bwubaka Abanyarwanda.

Uyu muhanzi yijeje abakunzi b’umuziki we ko mu minsi iri imbere hari indirimbo yiteguye gusohora.

Nubwo agiye kongera kuririmba, avuga ko atifuza gukora umuziki nk’ubucuruzi. Ngo azajya awukora mu rwego rwo gutanga ubutumwa.

Faruku anenga abahanzi bo muri iyi minsi kwandika indirimbo zitarimo ubutumwa
Faruku avuga ko gukora umuziki bitakiri ibintu bimworohereye
Nyakwigendera Dr Jacques watangiranye itsinda 'Abakimaze groupe' na Faruku yitabye Imana mu 2014

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .