Ibyo wamenya ku nkumi yo muri Kenya yakoroze Chris Brown

Yanditswe na Munyengabe Murungi Sabin
Kuya 11 Ukwakira 2016 saa 09:24
Yasuwe :
0 0

Chris Brown yasesekaye muri Kenya mu gitondo cyo kuwa 8 Ukwakira 2016, yakirijwe kwandikwaho inkuru z’urukurikirane zamugaragazaga nk’umugabo mubi ukomeje kwibasira abagore no kubahohotera.

Chris Brown yagiye agezwa imbere y’ubutabera muri Amerika ashinjwa guhohotera abagore mu bihe bitandukanye. Mu bazwi cyane Chris Brown yagiranye amahari na Rihanna [umukunzi we w’igihe kinini] kuva mu mwaka wa 2009 ubwo yamukubitaga, hakurikiyeho umugore babyaranye ndetse kugeza ubu baracyaburana.

Mu mpera za Kanama 2016, Chris Brown yafunzwe igihe gito ashinjwa gutunga imbunda umukobwa witwa Baylee Curran. Yaje muri Kenya ibye na Baylee Curran bitarakemuka neza.

Yageze ku kibuga cya Moi International Airport mu gitondo cyo kuwa 8 Ukwakira 2016. Akinjira mu Mujyi wa Mombasa inkuru zakwiye hose muri Kenya ko Chris Brown yajanjaguye telefone y’umugore washakaga ko bifotoza.

Uyu mukobwa witwa Brenda Chepkoech akimara kwangirwa kwifotozanya na Chris Brown yasigaranye n’itangazamakuru ku kibuga cy’indege aribwira ko uyu muhanzi yamenaguye telefone ye.
Brenda yabwiye umunyamakuru wa KTN ko Chris Brown ubwe ari we wakubise telefone ye igwa hasi iramanyuka. Yavuze ko byamubabaje cyane ariko ko bitamuciye intege zo gukomeza gukunda ibihangano bye.

Yagize ati “Nkimenya ko yaje numvise nishimye cyane, nashakaga kujya kumureba gusa ntabwo yari mu bihe byiza byo kwifotoza. Yarimo yerekeza ku modoka ye ndamukurikira, atangiye kwinjira mu modoka nahise mpindukira nshaka gufata selfie, yarambonye ahita asohora ukuboko mu modoka akubita telefone yanjye igwa hasi irangirika…”

Mu kiganiro ubuyobozi bw’ikibuga cy’indege cya Moi International Airport bwagiranye n’abanyamakuru ibibazo bimaze gukwira mu binyamakuru, bwavuze ko ibyo Brenda Chepkoech yatangaje ari ibinyoma ndetse ko nta muntu wazanye ikirego avuga ko telefone ye yamenekeye ku kibuga.

Brenda Chepkoech yavuze ko telefone ye ya iPhone yangijwe bikomeye na Chris Brown ari nacyo benshi mu bakoresha Twitter na Facebook bahereyeho basaba Leta ya Kenya guhambiriza uyu muhanzi agasubira iwabo ataririmbye.

Chris Brown agisohoka mu kibuga cy’indege cya Moi International umunyamakuru wa IGIHE yarahageze ahasanga agatsiko k’abanyamakuru baganiraga na Brenda Chepkoech. Yavugaga ko yahohotewe gusa abapolisi bashinzwe kurinda umutekano ku kibuga bakavuga ko nta wamukozeho.

Inkuru zavugaga ko Chris Brown yamennye telefone y’umugore zakwirakwijwe cyane bikimara gutangazwa ko ‘ageze muri Kenya’. IGIHE yakurikiranye urugendo rwa Chris Brown mu Mujyi wa Mombasa yatangarijwe n’abateguye igitaramo bagize Mombasa Rocks ko ‘ibyanditswe byose ari umugambi wacuzwe n’abari bagamije kuburizamo igitaramo cy’uyu muhanzi’.

Umuyobozi ushinzwe iyamamaza bikorwa muri Mombasa Rocks, Adda Justin yabwiye IGIHE ko ‘ibyatangajwe byaturutse ku gatsiko k’abantu biganjemo abakoresha imbuga nkoranyambaga bo mu Mujyi wa Nairobi biturutse kuri bamwe mu batari bishimiye kubona Chris Brown i Mombasa’.

Brenda yahize kwifotozanya n’ibyamamare byose bisura Mombasa

Brenda Chepkoech asa n’uwahize kuzifotoreza ku bantu b’ibyamamare bose basura Umujyi wa Mombasa, hari amafoto menshi amugaragaza yifotoreje ku bayobozi bakomeye n’abantu b’ibyamamare barimo Perezida Uhuru Kenyatta na Visi Perezida wa Kenya William Ruto.

IGIHE kandi yafotoye Brenda Chepkoech yifotoreza ku muhanzi Wizkid wageze muri Kenya mu ijoro ryo kuwa 7 Ukwakira 2016. Ni umwe mu bantu bagera kuri batanu bifotoreje kuri Wizkid akigera ku kibuga cy’indege.

Brenda Chepkoech yari yihinduye nk’umugenzi wari usohotse mu kibuga cy’indege akabona Wizkid bitunguranye hanyuma akamusaba ko bifotozanya. Wizkid ntiyagoye Brenda kuko yamwemereye ko bifotoza nta ngorane zihabaye, amaze kubona ifoto ya Wizkid yarashyekewe aza gushakisha Chris Brown gusa ntibyamuhira.

Indege ya Chris Brown ikigera ku kibuga cy'indege cya Moi International Airport
Nguwo asohoka mu kibuga cy'indege
Chris Brown yasohotse mu kibuga aherekejwe n'abasore bamurinda
Ku kibuga hari abo Chris Brown yemereye kumufataho amafoto
Chris Brown ntiyigeze akora kuri Brenda gusa yanze ko bifotozanya
Brenda yasigaye abwira itangazamakuru ko yahohotewe
Yerekanaga telefone ye ngo yangijwe na Chris Brown
Brenda iburyo
Nguwo Brenda na Perezida Uhuru Kenyatta
Brenda kandi yari mu baje gutegereza Wizkid ku kibuga, icyo gihe yamukuyeho ifoto
Mu gitaramo Chris Brown ntiyavuze kuri uyu mukobwa wamutamitse itangazamakuru

Amafoto utabonye IGIHE yafashe mu gitaramo cya Chris Brown i Mombasa


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244