Ibyo utamenye kuri Bruce Melodie wahereye ku busa akavamo ikirangirire mu muziki w’u Rwanda (Video)

Yanditswe na Nsengiyumva Emmy
Kuya 2 Ugushyingo 2019 saa 03:20
Yasuwe :
0 0

Itahiwacu Bruce yamenyekanye mu muziki nka Bruce Melodie, uyu musore ari mu bagezweho muri iki gihe, gusa iyo muganiriye ukamenya inzira yanyuzemo waba umuhamya w’uko nta kure Imana itakura umuntu.

Muri iyi nkuru tugiye kwibanda ku kiganiro kirekire twagiranye na Bruce Melodie atuganiriza ku rugendo rwe rwa muzika kuva ku munsi wa mbere ajya muri Studio kugeza ubu yabaye icyamamare.

Bruce Melodie avuga ko iwe nibura abitse ibikombe birenga icumi yakuye mu muziki, yawugiriyemo amahirwe ariko nanone ni ibintu yavunikiye kuva yiga mu mashuri abanza.

Uyu musore yavukiye mu muryango w’abaramyi, byatumye akura akundishwa umuziki wo guhimbaza Imana, anaririmba muri korali aho ahamya ko yakuye ubumenyi bw’ibanze mu muziki.

Yiga mu mwaka wa Kane w’amashuri abanza nibwo yatangiye gutekereza ko yakora umuziki, zari inzozi zimeze nk’izumushonji urota arya.

Bruce Melodie yari umufana ukomeye wa KGB yanabasabye ubufasha mu ntangiriro z’umuziki we

Bruce Melodie mu kiganiro na IGIHE yagize ati” Nakuze numvishwa indirimbo zo guhimbaza Imana, menya ko habaho ubundi bwoko bw’indirimbo nabyumviye kuri KGB, kenshi ku ishuri nazisubiragamo.”

Ahamya ko KGB aribo batumye yumva akunze umuziki ndetse atekereza kuba umuhanzi aribo arebeyeho.

Umunsi umwe ajya gutangira umuziki, Bruce Melodie wigaga mu mashuri abanza yibye iwabo amafaranga ngo ajye gukora indirimbo i Cyangugu. Ibintu avuga ko yari yabishutswe n’umusore biganaga wamaze no gukacira aya mafaranga ahita atoroka arabura.

Ibi ntabwo byaciye intege uyu muhanzi, kubera urukundo yari afitiye KGB byatumye yumva ko aribo bamufasha kwinjira mu muziki.

Uyu musore wari utuye i Kanombe yamanutse n’amaguru ajya i Gikondo agiye gushaka KGB yari igezweho muri icyo gihe, yagendaga ayoboza aho aba basore batatu bari batuye.

Ati” Barahanyeretse ndakomanga ndinjira mbabwira ko ndi umuhanzi ushaka kuzamera nkabo, bansabye kubaririmbira bumva mfite ubuhanga, Hirwa Henry niwe wafashe icyemezo cyo kumfasha bukeye anjyana kuri studio.”

Bruce Melodie avuga ko Hirwa Henry wabaga muri KGB yamujyanye muri studio ya Jackson Dado wagombaga kumukorera indirimbo ya mbere, icyakora iyi ndirimbo ntabwo yigeze ibaho kuko yagiye ashukwa cyane n’abagombaga kuyikora birangira idakozwe.

Ubwa nyuma ajya kubona ko bitagikunze Bruce Melodie wavaga n’amaguru i Kanombe ajya i Nyamirambo gukoresha indirimbo yasabwe kugura umuriro wa studio kandi nta n’ijana afite ataha idakozwe asa nucitse intege.

Ati “Nageze kuri studio nishyiramo noneho ko ngiye gukorerwa, bagiye kunkorera umuriro uhita ushira. Ninjye wagombaga kuwugura. Wibuke ko nabaga nagiyeyo n’amaguru nabuze ijana ryo gufata bisi, ubwo kumbwira ngo ngure umuriro kwari ukunyirukana.”

Yagiye kwiga gukora indirimbo ahereye muri studio ya Ama G The Black

Nyuma yo gushaka gukorerwa indirimbo yanishyuriwe ariko bikarangira itabayeho, uyu musore yaje kumenya ko i Kanombe hari studio nshya yafunguwe, ikaba iya Ama G The Black.

Iki gihe yavaga ku ishuri akinyuza kuri studio bamutuma utuntu kuri butiki ariko we ku mutima asenga Imana ngo azabashe kuhigira ibijyanye na muzika.

Iyi studio yakoragamo Producer Jimmy ndetse na Piano ariko bose bakigishwa na Junior Multisystem. Uko bigaga Bruce Melodie yabaga ari aho hafi ateraho akajisho nawe akagenda agira ibyo amenyeraho.

Nyuma y’igihe yagiye agira ibyo amenya ku muziki, uwari umwana batuma amazi na fanta atangira gukora indirimbo. Bruce Melodie ahamya ko yafashijwe n’inyota yari afite yo kumenya umuziki ndetse n’urukundo yari awufitiye.

Nyuma yo gutangira gukora indirimbo zinyuranye uyu musore yirukanwe muri studio ya Ama G The Black.

Bruce Melodie avuga ko yirukanwe kuko yari amaze gukuza izina ndetse atangiye kumenya gukora indirimbo bityo akumva ko akomeye.

Nyuma yo kwirukanwa yakoze mu zindi studio zitandukanye zirimo n’izo mu ntara nk’i Rwamagana n’i Ngoma.

Arangije amashuri yisumbuye nibwo yibutse ko hari inzozi zo kuba umuhanzi

Uwari umaze kuryoherwa n’amafaranga yo gukora indirimbo yaje guhura na Munyaneza Janvier bitaga Kill G, umushoramari wifuzaga kugura studio ya Ama G ariko igakorwamo na Bruce Melodie.

Bitewe nuko yashakaga gukarishya ubwenge mu bijyanye no gutunganya indirimbo, yifuje kubanza kujya kwiga, Lick Lick niwe wagombaga kumubera mwarimu ariko bihurirana nuko yari afite urugendo muri Leta Zunze Ubumwe za Amerika.

Nyuma yo kubura Lick Lick, Bruce Melodie yahuye na Fazzo ari naho bacuriye umugambi wo kureka kugura Studio ya Ama G bemeza ko bagiye kugura Unlimited yari itawe na Lick Lick.

Mu kugura Unlimited, Bruce Melodie yagombaga guhita yinjiramo nk’umuhanzi mushya Fazzo akaba Producer mu gihe Munyaneza ariwe wari nyirayo.

Uyu mugambi waranogejwe ushyirwa no mu bikorwa. Bruce Melodie yahakoreye indirimbo zamenyekanye nka; Tubivemo, Telefone, Uzandabure n’izindi zatumye ashinga imizi mu muziki.

Nyuma y’igihe yaje gutandukana na Unlimitted ubwo yari atangiye kugirana ibibazo na Fazzo, bituma yinjira muri Super Level.

Yasinye amasezerano ya Super Level yiteguye ibibazo byaje no kumugeza mu nkiko

Amaze gutandukana na Unlimitted Record, Bruce Melodie yahise akurikira Piano bakuranye muri studio ya Ama G The Black.

Piano yakoreraga muri Bridge Record ariko muri icyo gihe nawe ahabwa akazi muri Super Level.

Mico The Best bahuriye mu gitaramo i Rusizi niwe wiyemeje guhuza Bruce Melodie n’uwari umuyobozi wa Super Level ndetse aranabikora.

Bruce Melodie yabanje kugirana ibiganiro na Nsengimana Richard wayoboraga Super Level bemeranya ko agomba kujya ahabwa 50% y’ibyinjiye.

Nyuma y’iminsi mike bumvikanye ariko batarasinya amasezerano, Bruce Melodie yakoze ibitaramo ubuyobozi bwa Super Level butabizi.

Ibi byatumye habaho kurakara ndetse amasezerano agiye gusinywa arahindurwa Bruce Melodie abwirwa ko azajya afata 30% y’ibyo yinjije.

Bitewe nuko yari amaze kubura umubyeyi we wari witabye Imana, Bruce Melodie yemeye gusinya aya masezerano y’imyaka ine ariko yiteguye ko namara kumenyekana azahita asaba kuyasesa.

Ubwa mbere yitabira Primus Guma Guma Super Star, Bruce Melodie yahawe miliyoni yahabwaga umuhanzi wese winjiyemo.

Ukurikije uko amasezerano yabigenaga yagombaga gufata 300 000FRW, ariko bitewe nuko hari n’utudeni yari yarafashe mbere, Bruce Melodie avuga ko yahawe amafaranga atarenze ibihumbi 70.

Nyuma yo kumenyekana uyu muhanzi yaje kwigira inama yo kuva muri Super Level kubera kutabasha kwihanganira amafaranga make yahabwaga.

Bruce Melodie yamenyesheje ubuyobozi bwa Super Level ko akeneye guhabwa 50% cyangwa bagatandukana.

Kugira ngo haseswe amasezerano y’imyaka ine yari yarasinye, Bruce Melodie yasabwe kwishyura byibuza miliyoni 18.

Bruce Melodie avuga ko ya mafaranga yari menshi, byari nko kumunaniza. Ibi byatumye bajya mu nkiko birangira asabwe kwishyura miliyoni ebyiri z’amafaranga y’u Rwanda.

Yahishuye umushinga w’ubukwe

Muri 2015 nibwo Bruce Melodie yibarutse imfura ye Itahiwacu Britta, uyu yanamukurikije ubuheta bwe mu minsi ishize tariki 24 Ukwakira 2019.

Ubwo yabyaraga imfura ye bisa naho aribwo byamenyekanye ko afite umugore. Ikintu yari yarahishe itangazamakuru.

Abajijwe ku kuntu yashatse, Bruce Melodie yavuze ko atazigera avuga ku mugore we kuko yabimusabye. uyu muhanzi ahamya ko agomba kubaha icyifuzo cy’umugore we.

Ati “ Sinzavuga ku mugore wanjye, ni umuntu ukunda kugira ubuzima butari hanze, yansabye ko namurinda kujya mu itangazamakuru kandi ndabimwubahira.”

Nubwo bamaze kubyarana kabiri babana bitemewe n’amategeko. Bruce Melodie yavuze ko igihe nikigera azakora ubukwe kuko abifite mu mishinga ye.

Bruce Melodie wanyuze mu nzitane ubu icyamamare

Uyu watangiye umuziki ku buryo bugoranye gutya ubu ni umwe mu bahanzi b’ibyamamare mu muziki w’u Rwanda ndetse aherutse gutorwa nk’uwahize abandi gukundwa mu mpeshyi y’uyu mwaka wa 2019, igihembo yahawe na radiyo ya Kiss FM.

Usibye iki gihembo, Bruce Melodie avuga ko iwe abitseyo ibikombe 14 birimo n’icya Primus Guma Guma Super Star yegukanye mu mwaka wa 2018.

Uyu ariko kandi yanitabiriye Coke Studio mu mwaka wa 2017, ikintu yemeza ko cyagize uruhare rukomeye mu iterambere ry’umuziki we.

Reba ikiganiro kirambuye twagiranye na Bruce Melodie

Reba indirimbo nshya Bruce Melodie aherutse gusohora yise "Katerina"

Bruce Melodie yatangiye umuziki akiri umwana
Bruce Melodie yitabiriye Coke Studio
Bruce Melodie yegukanye ibihembo binyuranye muri PGGSS
Byarangiye yegukanye igikombe cya PGGSS
Uyu ni umuhanzi w'impeshyi ya 2019
Bruce Melodie ni umwe mu bahanzi babayeho neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza