Uko yatangiye umuziki yibye amafaranga, gushwana na Bruce Melodie,...Ikiganiro na Ama G (video)

Yanditswe na Nsengiyumva Emmy
Kuya 28 Ugushyingo 2019 saa 07:58
Yasuwe :
0 0

Hakizimana Amani [Ama G The Black] ni umugabo wubatse ufite abana babiri ku bagore batandukanye. Ni umwe mu baraperi bafite igikundiro mu muziki w’u Rwanda bitewe n’ibitekerezo atsindagira mu ndirimbo ze, zikanyura benshi mu bazumva.

Mu kiganiro kirambuye n’uyu muhanzi usigaye ari n’umukinnyi wa filime ndetse akaba n’umukanishi wa firigo, yirekuye ava imuzi ubuzima bwe kuva mu bwana kugeza abaye icyamamare.

Ama G asanzwe azwiho kwandika amagambo yumvikanamo ibitagenda mu muryango; yamamaye cyane mu ndirimbo yitwa ‘Uruhinja’, ‘Ikiryabarezi’, ‘Igifu’, ‘Ikiryabarezi’, ‘Nyabarongo’ yahuriyemo na Safi Madiba n’izindi zavugishije benshi kubera ubutumwa buzirimo.

Uyu muhanzi uzwi mu njyana ya Hip hop yatangiye umuziki mu mwaka wa 2003 ubwo yigaga mu mashuri abanza mu wa kane.

Mu kwinjira mu muziki yifashishije amafaranga y’ishuri yibye akayajyana muri studio ndetse ntibyamuguye ubuhoro kuko yatashye ahatwa inkoni.

Yagize ati "Mu rugo babyakiriye nabi, ntibabyifuzaga babifataga nk’aho ndi gutana ngata amashuri nkajya muri ibyo. Nkoresha amafaranga y’ishuri nyine igiti cyarambonye.”

Kuva mu 2003 kugeza ubu Ama G The Black avuga ko atigeze areka umuziki, yakomeje gukora nubwo byari bigoye.

Nubwo ari umuhanga mu gukora amafirigo yapfuye, Ama G The Black avuga ko yabitangiye atarabyize.

Gukora firigo ngo yabikuye kuri se wakoraga uyu mwuga, ubwo yageragezaga kumwigana avuga ko yabikubitirwaga cyane ariko ntacike intege.

Yiga mu mwaka wa Gatatu w’amashuri yisumbuye, Ama G yari amaze kumenya uko bakora firigo, akabivanga n’umuziki n’ishuri.

Ati “Mu rugo barambwiye ngo nintareka umuziki ntabwo bazongera kunyishyurira ishuri. Iki gihe nibwo nanze kuva ku izima. Amafaranga nakoreraga yanyishyuriraga ishuri nibana, mfite studio ndetse naraguze n’imodoka. ”

Yavuze ko igihe cyageze akajya kwibana, aho yabaga ni naho yari afite studio ndetse anahakorera firigo.

Ama G The Black yahishuye uko yinjiye mu muziki akoresheje amafaranga y'ishuri yari yibye

Mu buto bwe, Ama G ngo ntazibagirwa uko yirukanwaga ku ishuri, by’umwihariko igihe umukiliya wa firigo yamuhamagaraga ari mu ishuri agahita asohoka akajya mu kiraka.

Ama G The Black yanyuze mu nzu zifasha abahanzi nka Ibisumizi, Bridge Records na Super Level. Izi zose zaje nyuma y’uko iye yitwaga Black Gang yari amaze kuyigurisha.

Uyu muhanzi uzwiho kuvugisha ukuri yavuze ko yavuye mu “Ibisumizi” ubwo yari ifunze imiryango we agahita yerekeza muri Super Level. Aho ho ngo yahavanywe nuko bamufataga nabi bituma asezera.

Mu minsi ishize habaye umwuka mubi hagati ya Ama G yashwanye na Bruce Melodie wahoze ari inshuti ye y’akadasohoka. Ama G yahishuye ko amakimbirane ye na Bruce Melodie yarangiye nyuma yuko bahuye bagasabana imbabazi ari we uteye iya mbere.

Ati “Nabonye ko bimaze kuba byinshi hano hanze, ndamwegera turaganira mwereka aho nakosheje musaba imbabazi. Twarabirangije.”

Kuri ubu Ama G The Black yarangije kwiga amashuri yisumbuye mu bijyanye n’Amashanyarazi. Akora za firigo, umuziki ndetse akaba n’umukinnyi wa filime.

Uyu muhanzi kuri ubu winjiye mu byo gukora filime, afite inshya yitwa “Ngunda” isohoka buri wa mbere no ku wa Gatanu w’icyumweru ku rukuta rwe rwa Youtube.

Ama G The Black mu mishinga ya bugufi afite harimo indirimbo nshya yahuriyemo n’umuhanzikazi Marina ateganya gusohora mu minsi mike iri imbere.

Reba ikiganiro kirambuye na Ama G The Black

Ama G The Black ni umuhanzi ubifatanya no gukina filime no gukanika firigo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza