Ibyaranze itangizwa ry’iserukiramuco ’Ubumuntu Festival’ (Amafoto)

Yanditswe na Dusabimana Aimable
Kuya 15 Nyakanga 2017 saa 10:23
Yasuwe :
0 0

Iserukiramuco ‘Ubumuntu Arts Festival’ rimaze imyaka itatu riba mu guteza imbere ibikorwa byo kwimakaza amahoro binyuze mu butumwa bw’icyizere butangwa mu makinamico n’ibindi bihangano, ryongeye gutangizwa i Kigali.

Mu ijoro rya mbere ry’iri serukiramuco ngarukamwaka herekanywe imikino, indirimbo n’imbyino bikubiyemo ubutumwa bwateguwe n’abahanzi b’inararibonye baturuka mu bihugu byo hirya no hino ku Isi ndetse n’iyahimbwe hagendewe ku by’iyumviro by’abayikinnye cyane cyane iy’abana yerekanywe igakora ku mutima benshi.

Ibikorwa by’iri serukiramuco rizamara iminsi itatu, aho ryatangiye ku wa 14 rikazageza ku wa 16 Nyakanga 2017. Buri munsi bitangizwa n’ibiganiro by’abahanzi bafite inararibonye mu mbyino n’imikino kuva saa munani kugeza saa kumi z’umugoroba, hanyuma kuva saa kumi n’ebyiri hakerekanwa imikino y’ubuhanga.

Ku munsi wa mbere w’iri serukiramuco herekanywe imikino y’amatsinda yaturutse mu bihugu birimo u Rwanda, Iraq, u Bubiligi, Leta Zunze Ubumwe za Amerika na Repubulika Iharanira Demokarasi ya Congo yaserukiwe n’ababyinnyi bo ku muhanda.

Itsinda ry’abana bibumbiye muri Children’s Choir bo muri Rafiki Foundation Nyamata ryaririmbye indirimbo iherekejwe n’imbyino bavuga ko hari impamvu yo kwishimira ubwiza bw’u Rwanda. Hakurikiyeho indi mikino yigisha abatuye Isi kuba ‘abantu buzuye ubumuntu’ ndetse baharanira ko buganza hose’.

Mu cyiciro cy’abatarabigize umwuga, abanyeshuri ba Rugoma Secondary School bakinnye inkuru ya ‘Romeo na Juliet’ y’umwanditsi Shakespeare.

Nyuma y’aba banyeshuri abitabiriye itangizwa rya ’Ubumuntu Arts Festival’ bakurikiye umukino wateguwe n’abafite ubuhanga mu mikino ngororamubiri n’imbyino zidasanzwe z’itsinda ryitwa MindLeaps ry’i Nyamirambo ku bufatanye n’umukobwa ukomoka muri Leta Zunze Ubumwe za Amerika.

MindLeaps yakurikiwe n’umukino witwa "My Body Is Looking For New Reality" uhuza ubumuntu n’ikoranabuhanga nk’imwe mu nsanganyamatsiko z’ingenzi mu bizaranga iserukiramuco ry’uyu mwaka. Ni umukino wateguwe ku bufatanye n’ibihugu bitatu bitatu, u Rwanda n’u Bubiligi byaserukiwemo n’ababyinnyi batojwe na Mokhallad Rasem wo muri Iraq.

Hanakinwe umukino wiswe "Humanity Rising" wateguwe na Mashirika ibifashijwemo n’itsinda ryo muri Amerika ryitwa Bridge, bavuze ku mpamvu ababyeyi bakwiye gushyigikira impano z’abana babo kuko hari igihe usanga iyo bakuze baratojwe neza ibyo bakundaga ari byo bibagirira akamaro.

Ubumuntu Arts Festival yerekanywemo imikino itandukanye yiswe "Torn Together" yose yahimbwe n’abana bayikinnye. Uwa mbere wavuze ku nkuru y’akababaro k’abana bo muri Nepal n’ihohoterwa ribakorerwa. Hanakinwe undi uvuga ku kababaro k’abana babuzwa kujya kwiga bagakoreshwa imirimo ivunanye n’abo mu muryango.

Amatsinda yombi y’abana bakinnye iyo mikino yihurije hamwe mu wundi witwa "The Wall" wigisha kwimika ubumwe mu bantu, bawukina bashushanya isenywa ry’urukuta rwatandukanyaga imiryango rwagereranyijwe na rwa rundi Donald Trump yashakaga kubaka ya Amerika na Mexico.

Aba bana bakinnye umukino washimishije benshi bavuga ku gusenya ibitandukanya abantu

Nyuma y’aba bana bahanyuranye umucyo ndetse bakishimirwa bitewe n’ubuhanga bagaragaje, hakurikiyeho imbyino zivanze n’ubugororangingo byakozwe n’abo mu itsinda Mashirika mu mukino bise "Zahabu" uvuga ku mukobwa wahohotewe na se akiri muto agatwara inda.

Umunsi wa mbere wa Ubumuntu Arts Festival wasojwe n’imbyino zashyuhije benshi z’abasore baturutse muri Repubulika Iharanira Demokarasi ya Congo, babyina imbyino zitandukanye bashushanya isenyuka ry’ubumuntu mu njyana zitandukanye haba Hip-Hop n’umuziki w’iwabo.

Babyinaga bakoresha ingufu nyinshi mu buryo bwababijije icyuya, bakanyuzamo bagakora n’imikino ngororamubiri isaba ubuhanga n’ubushishozi. Babyinnye mu midiho itandukanye irimo uwitwa "You Don’t Know Me" ndetse na "Broken Love" mu cyo bise "Run of the Power".

Imikino yose yerekanywe ku munsi wa mbere, yatangaga ubutumwa bugaruka ku kuba abantu bahuje ubumuntu kandi ntawe uburusha undi bagize. Iri serukiramuco rirakomeza ku mugoroba wo kuri uyu wa Gatandatu ndetse no ku Cyumweru aho kwinjira ari ubuntu kuri buri wese.

Ubumuntu Arts Festival imaze imyaka itatu ibera mu Rwanda, kuri iyi nshuro yitabiriwe n’ibihugu bigera kuri 13 byose bikazagenda byerekana imikino ishimangira ubumuntu ndetse n’igaruka ku bibangamiye ubumwe hagati y’abantu. Bimwe mu bizibandwaho ni ibijyanye n’ikoranabuhanga ndetse n’inkuru zivuga ku bafite ubumuga.

Herekanywe imikino ivuga ku bumuntu n'imibanire mu bantu
Aba bana bakinnye umukino wiswe 'Humanity Rising'
Aba babyinnyi bo muri Congo batangariwe na benshi
Abana b'Abanyarwanda mu mukino wiswe 'The Wall'
Babyinnye imbyino zisaba ingufu
Hakinwe umukino witwa 'Zahabu' ucyaha ihohoterwa ry'abana
Imikino ngororangingo yiganje ku munsi wa mbere wa Ubumuntu Arts Festival
Iri serukiramuco ngarukamwaka ribera ku Rwibutso rwa Kigali ruri ku Gisozi
Iri tsinda ryahanyuranye umucyo
Mashirika n'itsinda ryo muri Amerika ryitwa Bridge Theatre bakinnye umukino wanditswe n'abana uvuga ku izamuka ry'ubumuntu ku Isi
Mazimpaka John Kenned uri mu bagize Mashirika na we yakinnye muri iri serukiramuco
Nkusi Arthur uri mu bagize Mashirika
Ubuhanga bw'abagize itsinda MindLeaps ry'i Nyamirambo bwishimiwe na benshi
Ubumuntu Arts Festival yerekaniwemo umukino uvuga agahinda k'abana bakoreshwa imirimo y'agahato bakabuzwa kwiga
Umugoroba wa mbere w'iri serukiramuco witabiriwe n'imbaga

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza