Ibyaranze iserukiramuco ryihariye ryateguwe na Miss Iradukunda Liliane(Amafoto)

Yanditswe na Munyengabe Murungi Sabin
Kuya 3 Nyakanga 2018 saa 09:35
Yasuwe :
0 0

Nyampinga w’u Rwanda, Iradukunda Liliane yatangije iserukiramuco ryihariye ku bukerarugendo bushingiye ku muco, ryamurikiwemo byinshi mu biranga ubuzima bw’Abanyarwanda.

Iserukiramuco ‘Ubukerarugendo bushingiye ku muco’ ryabereye mu Karere ka Ngororero ku itariki ya 30 Kamena 2018 ku gitekerezo cyazanywe na Miss Iradukunda Liliane mu rugendo yatangiye rwo gukundisha abakiri bato umuco w’u Rwanda.

Nyampinga Iradukunda Liliane yateguye iri serukiramuco afatanyije n’Ishuri rya ESECOM-Rucano risanzwe ryigisha ibyerekeye ubukerarugendo mu Ntara y’Uburengerazuba aho rifite icyicaro mu Karere ka Ngororero ahitwa Hindiro.

Iri serukiramuco ryitabiriwe n’abiganjemo urubyiruko rwo mu bigo by’amashuri atandukanye bibarizwa mu Karere ka Ngororero, abayobozi b’akarere bari barangajwe imbere n’Umuyobozi ushinzwe imibereho myiza y’abaturage mu karere ka Ngororero, Kuradusenge Janvier, abahagarariye inzego za Polisi n’ingabo mu karere n’abandi.

Urubyiruko rwitabiriye iri serukiramuco rwagiranye ibiganiro na Nyampinga Iradukunda Liliane runaboneraho umwanya wo kwigishwa ndetse no kwerekwa byinshi mu bikoresho bizwi cyane mu muco nyarwanda nk’imbehe, uruho, ibicuma, inanga, urusyo, inkoko, igisabo, umuheto, iningiri n’ibindi byinshi.

Ibi bikoresho kimwe n’ibindi bifatwa nk’uturango tw’umuco nyarwanda, hari abari babibonye ku nshuro ya mbere. Uru rubyiruko rweretswe uko ibi bikoresho bikora, akamaro ka buri kimwe n’uburyo bikwiye gufatwa neza ngo bitangirika.

Iki ni nacyo urubyiruko rwasabwe kurusha ibindi, n’Umuyobozi ushinzwe imibereho myiza y’abaturage mu karere ka Ngororero, Kuradusenge Janvier wari umushyitsi mukuru yagize ati “Iyi ni impamba ndetse ni intwaro izabafasha kumenya byinshi ku muco nyarwanda ndetse n’amateka yacu."

Yashimiye cyane Nyampinga Iradukunda Liliane n’abo bafatanyije gutegura iki gikorwa ndetse yemeza ko Akarere ka Ngororero kazakomeza kubafasha kugira ngo intambwe yatewe iziyongereho izindi.

Mu gushimira Nyampinga, uyu muyobozi yagize ati "Mu turere twose wahisemo gukorera iki gikorwa cyiza mu karere kacu ka Ngororero benshi mu rubyiruko ntibumvaga ko bazakubona ariko barakubonye kandi bakubonye mu gihe cyiza. Wakoze kuza kandi bagushimire cyane."

Nyampinga w'u Rwanda Iradukunda Liliane mu gufungura ku mugaragaro site y’ubukererugendo bushingiye ku muco

Miss Iradukunda Liliane yibukije urubyiruko ko iterambere ryose rwifuza rizagerwaho mu gihe umuco uzashyirwa imbere muri byose. Yagize ati "Umuco ni nk’amaraso atemba mu mubiri w’umuntu iyo udafite amaraso ntiwabaho kimwe n’uko tudafite umuco ni nkaho twaba tutariho. Mureke tuwurate ndetse dusigasire amateka yacu kuko avuze byinshi mu buzima bwacu."

Iradukunda Liliane azakomereza ibikorwa nk’ibi mu zindi ntara z’u Rwanda n’Umujyi wa Kigali; biteganyijwe ko azajya no hanze y’igihugu kwitabira ibindi bikorwa bigamije guteza imbere umuco n’ubukerarugendo.

Uyu mukobwa ari muri ba Nyampinga batumiwe mu iserukiramuco Uganda Festival rizabera i Washington DC ahitwa Gaylord Harbor resort guhera ku itariki ya 31 Kanama rizasozwe ku wa 3 Nzeri 2018; ryateguwe n’ihuriro ry’Abanya-Uganda batuye muri Amerika ya ruguru bihurije muri UNAA[Ugandans in North America Association].

Miss Rwanda 2018 na bamwe mu banyeshuri bo muri Ngororero
Imbyino zitandukanye zasusurukije ibi birori
Hano urubyiruko rwerekwaga akamaro k'inka n'uburyo bwo gufata neza amata hubahirijwe umuco nyarwanda
Urubyiruko rwahawe amata ruyanywesha inkongoro
Miss Iradukunda Liliane na bamwe mu bayobozi b'Akarere ka Ngororero
Miss Iradukunda Liliane yibukije urubyiruko akamaro ko gusigasira umuco nyarwanda
Muri iri serukiramuco hatangijwe ku mugaragaro site y’ubukererugendo bushingiye ku muco muri Ngororero
Urubyiruko rweretswe uko gusya kinyarwanda byakorwaga
Ibikoresho gakondo bitandukanye byamuritswe muri iri serukiramuco
Muri iri serukiramuco abanyabugeni berekanye ibihangano byabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza