Iby’ingenzi wamenya ku irushanwa ’ArtRwanda- Ubuhanzi’ rizatangirira i Kayonza

Yanditswe na Ishimwe Israel
Kuya 6 Nzeri 2018 saa 11:43
Yasuwe :
0 0

Hasigaye iminsi ibiri ngo urubyiruko ruri hagati y’imyaka 18 na 35 ruhatane mu irushanwa rya ArtRwanda-Ubuhanzi rigamije guhishura abanyempano no kubafasha kuzibyaza inyungu.

Amarushanwa y’ibanze azatangirira mu Karere ka Kayonza ku wa 8-9 Nzeri 2018.

ArtRwanda - Ubuhanzi ni umushinga ugizwe n’irushanwa rizashakisha, rikanashyigikira impano zo mu byiciro birimo Ubugeni, Indirimbo n’Imbyino, Imideli, Ikinamico n’Urwenya, Filimi no Gufata Amafoto, Ubusizi n’Ubuvanganzo.

Ni umushinga wa Minisiteri y’Urubyiruko n’iya Siporo n’Umuco, uzashyirwa mu bikorwa na Imbuto Foundation, mu gushakisha impano z’urubyiruko no kuzishyigikira kugera aho zibasha gutunga ba nyirazo.

Mu kiganiro ku ishyirwa mu bikorwa ry’uyu mushinga, Umuyobozi Mukuru wungirije wa Imbuto Foundation, Umutesi Geraldine, yatangarije IGIHE ko ArtRwanda-Ubuhanzi igamije guteza imbere Uruganda Ndangamuco no kongerera urubyiruko amahirwe yo kubeshwaho n’impano bafite no guhanga imirimo yagirira igihugu akamaro mu rusange.

Ikiganiro kirambuye ku ishyirwa mu bikorwa rya ArtRwanda-Ubuhanzi

IGIHE: Ni ibiki by’ingenzi urubyiruko rugomba kumenya mbere yo kwitabira irushanwa?

Umutesi: ArtRwanda-Ubuhanzi iri muri gahunda ya Imbuto Foundation yo kubaka ubushobozi bw’urubyiruko, dufatanyije na Minisiteri y’Urubyiruko. Kubera gahunda y’ubuhanzi no guteza imbere umuco yajemo ubu tubifatanya na Minisiteri ya Siporo n’Umuco n’Inteko Nyarwanda y’Ururimi n’Umuco.

Iyi gahunda iri mu cyerekezo kigari cya Guverinoma y’u Rwanda cy’ubukungu burambye mu guteza imbere inganda ndangamuco tugamije guhanga imirimo mishya.

Ni amahirwe urubyiruko ruhawe n’umwanya wo kugaragaza ibitekerezo byarwo.

IGIHE: Abifuza kwinjira mu irushanwa baziyandikisha bate?

Umutesi: Abahatana baziyandikisha ku munsi w’irushanwa mu ntara zitandukanye z’igihugu.

Tuzahera mu Karere ka Kayonza ku wa 8-9 Nzeri 2018, dukomereze muri Rubavu na Musanze ku wa 15-16 Nzeri, Rusizi na Huye ku wa 22-23 Nzeri, dusoreze muri Kigali ku wa 29-30 Nzeri 2018.

IGIHE: Abazitabira amarushanwa y’ibanze mu byiciro byose ni iki bazitwaza?

Umutesi: Ugomba kuba uri hagati y’imyaka 18 na 35. Ugomba kwitwaza icyangombwa kigaragaza ko uri Umunyarwanda. Ukwiye kuzana n’igihangano cyawe cyangwa ukagikorera aho.

Icyo gihangano kigomba kuba umwihariko kandi ukakizana uwo munsi. Nta kindi gihambaye tubasaba. Bagomba kuza bashobora kugaragariza akanama nkemurampaka umwihariko n’umwimerere w’igihangano cyabo, bakanagisobanura ku buryo abagize akanama nkemurampaka babona ko bashoboye kandi impano zabo bazifashisha mu guhanga imirimo yunguka.

IGIHE: Amarushanwa y’ibanze ateguye ate?

Umutesi: Hari ibyiciro bitandatu, dufite inzobere ziri mu kanama nkemurampaka zibibarizwamo. Mu irushanwa ry’ibanze tuzareba abafite impano mu bo tuzabona aho tuzanyura. Ushobora kuba uri umuhanga mu bugeni muri Kayonza ariko ugahura n’undi muri Musanze ushobora kukurusha.

Tuzatoranya abantu 120 ni ukuvuga 20 muri buri cyiciro bagaragaje impano mu turere twose, bazakomeza irushanwa.

IGIHE: Uretse kuba umunyempano, hari ubundi bumenyi busabwa uwifuza kwitabira irushanwa?

Umutesi: Twifuza kureba abahanzi batagize amahirwe yo kugaragaza impano zabo ngo zagurwe kandi zinashyigikirwe. Bazajya bazana igihangano, banerekane uko cyabyara indi mirimo.

Ese icyo gihangano kizabyara indi mirimo gite? Ugomba kubisobanura kuko na byo bizibandwaho n’akanama nkemurampaka mu gutanga amanota.

IGIHE: Ese abahanzi basanzwe bazwi bemerewe guhatana?

Umutesi: Abahanzi basanzwe bazwi bagize uruhare mu itekerezwa ry’iyi gahunda. Banagize uruhare mu rugamba rwo kubaka igihugu, ni abantu dufata nk’ishingiro n’umusingi w’iyi gahunda.

Tuzabifashisha mu kanama nkemurampaka. Tuzabakenera mu gufasha kwagura za mpano nshya twabonye no kububakamo ubushobozi.

IGIHE: Ni ibihe bipimo bizifashishwa mu kumenya abahanzi bafite ibihangano ku isoko?

Umutesi: Tuzabigeraho ku bufatanye bw’inzego zitandukanye n’abazaba bari mu kanama nkemurampaka. Ntibigoranye kumenya umuntu mushya mu nganda ndangamuco. Muri buri cyiciro hari uzajya afasha kumenya niba igihangano ari gishya, cyangwa nyiracyo ari mushya. Twizeye ko tuzabona impano nshya zitari zisanzwe.

IGIHE: Urubyiruko rw’Abanyarwanda batuye mu mahanga umushinga ubateganyiriza iki?

Umutesi: Iyi ni intangiriro. Twahereye ku bari mu gihugu kuko ugomba kugaragaza igihangano cyawe uhari, ukanagisobanura. Hari ikoranabuhanga twari gukoresha ariko twifuje gutangirana n’abari imbere mu gihugu cyane ko dushaka no gusubiza ikibazo cy’urubyiruko rudafite akazi. Abari hanze bazadufasha gukwirakwiza amakuru mu gushyigikira iyi gahunda.

IGIHE: Ni ubuhe butumwa bw’ingenzi mugenera urubyiruko mbere yo kwinjira mu irushanwa?

Umutesi: Mu cyerekezo cy’ubukungu bw’igihugu tugomba gushaka imirimo mishya duhanga, tukayiremera mu nzego zose. Tukarebera mu bitekerezo byose by’Abanyarwanda.

Ni umwanya mwiza wo kureba imirimo twahanga tutagendeye ku byo twiga, ubuhinzi n’ubworozi n’izindi nganda. Tukareba mu nganda ndangamuco icyo twavanamo cyatubyarira imirimo mishya, cyanazamura ubukungu bw’u Rwanda.

Iyi gahunda yubaka umuntu. Iyo ushyira igitekerezo mu nyandiko no mu gishushanyo na we uba wubaka umuntu. Icyo tugamije ni ukubaka Umunyarwanda wuzuye.

IGIHE: Abazahiga abandi bazahembwa iki?

Umutesi: Nta gihembo kiruta kuguha umwanya wo kugaragaza ikikurimo n’impano yawe. Abazatsinda bazahugurwa mu mwaka bafashwa kwagura impano, bahura n’inzobere zitandukanye.

Bazahabwa amafaranga n’ibikoresho. Hari umwanya wo gushyira ku isoko ibihangano byabo aho abafatanyabikorwa bazajya babafasha kubona urubuga rwo kugaragaza impano zabo muri gahunda zitandukanye z’ubukangurambaga bwo gusura u Rwanda ndetse no gukomeza kwiyubakamo ubushobozi.

ArtRwanda - Ubuhanzi yibanze ku rubyiruko rugize igice kinini cy’Abanyarwanda, abarenga 70%. Abazayitabira bashishikarijwe gushaka uburenganzira ku bihangano byabo mu kurinda umutungo mu by’ubwenge.

Art Rwanda-Ubuhanzi iri muri gahunda ya Guverinoma y’imyaka irindwi yo guhanga imirimo ibihumbi 70 mu rubyiruko kugeza mu 2024.

Kuva uyu mushinga wamurikwa ku wa 24 Kanama 2018, ibigo bya Leta n’iby’abigenga byatangiye kuyishyigikira ndetse imiryango iracyuguruye.

Umuyobozi Mukuru wungirije wa Imbuto Foundation, Umutesi Geraldine, yatangaje ko ArtRwanda- Ubuhanzi ari amahirwe urubyiruko rufite impano rudakwiye gucikwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza