Ibitaramo bya Primus Guma Guma byakomereje i Musanze (Amafoto)

Yanditswe na Munyengabe Murungi Sabin
Kuya 2 Kamena 2018 saa 02:12
Yasuwe :
0 0

Abahanzi bari mu irushanwa rya Primus Guma Guma Super Star ya munani berekeje mu Karere ka Musanze aho bakoreye igitaramo cya kabiri kuri uyu wa Gatandatu tariki ya 2 Kamena 2018.

Igitaramo cya mbere cya Primus Guma Guma Super Star 8 cyabereye mu Mujyi wa Gicumbi ku wa Gatandatu tariki ya 26 Gicurasi 2018, cyitabiriwe n’imbaga nini y’abakunzi ba muzika muri aka gace k’amajyaruguru y’u Rwanda.

Igitaramo cya kabiri cyabereye ku Kibuga cya Kaminuza ya Ines Ruhengeri, ni mu kilometero kimwe uturutse kuri Stade Ubworoherane ahagiye habera ibindi bitaramo bya Primus Guma Guma mu myaka yatambutse.

Ubwitabire ntibwari ku rwego rwo hejuru ugereranyije n’uko byabaga bimeze mu myaka ishize aho wasangaga Stade Ubworoherane yakubise yuzuye abandi buriye ibiti cyangwa bakajya ahitaruye kugira ngo barebe ibirori nta nkomyi. Nubwo ubwitabire butari bwinshi, abaje bagaragaje ibyishimo byinshi ndetse buri wese yari anyotewe no kureba abahanzi icumi bahatanye uyu mwaka.

Abahanzi bahatanye uyu mwaka ni Christopher, Bruce Melody, Mico The Best, Khalfan, Jay C, Queen Cha, Young Grace, Just Family, Active na Uncle Austin.

UKO IGITARAMO CYAGENZE UMUNOTA KU WUNDI

Mu gihe hari hategerejwe ko abahanzi batangira kuririmba, Dj Ira uvukana na DJ Bissosso yavangaga imiziki ari nako yereka abatuye mu Karere ka Musanze ko mu cyiciro cy’abagore hari abahanga mu kuvanga imiziki.

Igitaramo cyabereye ku kibuga kiri inyuma y’Ishuri rya Ines Ruhengeri ahazwi cyane nko Kuri Musanze.

Abashinzwe umutekano bagize itsinda B-KGL bamaze kwitegura
Dj Ira, umukobwa umaze kwigaragaza cyane mu kuvanga imiziki ni we uri gushyushya abanya-Musanze
Abahanzi baraza kuririmba mu buryo bwa live...ingoma zamaze gutegurwa
Iri rushanwa ritegurwa na Primus, inzoga ikundwa mu bice byose by'u Rwanda

- Abagize akanama nkemurampaka, Uwizeyimana Clementine "Tonzi", Aimable Twahirwa na MC Lion Imanzi bamaze kwakirwa ahagiye kubera igitaramo mbere y’uko umuhanzi wa mbere ahagera.

Bishimiye bikomeye kuza mu gitaramo cya Primus Guma Guma
Primus, inzoga igira icyanga gikundwa na benshi
MC Lion Imanzi, Tonzi na Aimable Twahirwa bamaze imyaka itatu yikurikiranya bagize akanama nkemurampaka ka PGGSS
Tonzi uyoboye akanama nkemurampaka
Abagize Sebeya Band igiye gufasha abahanzi gucuranga mu buryo bwa live
Hip Hop irashyigikiwe...
Umutekano uba ucunzwe neza ahabera ibitaramo bya Primus Guma Guma Guma

- Itsinda Active niryo rihamagawe bwa mbere ku rubyiniro mu gihe i Gicumbi ari Just Family yabanje kuririmba. Iri tsinda ryishimiwe cyane kubera uburyo ryahuje kuririmba rinabyina mu buryo bugezweho nk’imwe mu maturufu rikoresha mu gushitura abafana mu bitaramo.

- Young Grace watangiye kumenyekana mu muziki agikorera i Musanze mu myaka umunani ishize, akurikiyeho ahera ku ndirimbo ye ’O.G’.

- Khalifan, umwe mu baraperi bashya bari muri Primus Guma Guma arahamagawe abafana bazamura amajwi bagaragaza ko bishimiye kumubona i Musanze. By’umwihariko, indirimbo ye "Nabibonye ugiye" yakoranye na Active yishimiwe ku rwego rukomeye.

Abahanzi barimo Jay Polly, Jack B n’abandi bari bahagaze mu gice cy’imbere bagaragaza ko bishimiye uko Khalifan yitwaye muri iki gitaramo.

- Queen Cha witabiriye Primus Guma Guma inshuro ebyiri guhera mu 2017, ni we ukurikiyeho, ahereye ku ndirimbo ye "Isiri", akurikizaho iyitwa "Rugari."

- Uncle Austin umaranye igihe uburwayi bwo gusarara no kubabara mu muhogo, ageze imbere y’abafana abanza kubasuhuza anabibutsa uko bamuzi kuri Radio. Yaririmbye iyakunzwe hambere yitwa "Nzakwizirikaho" akurikizaho iyitwa "Ndamuhamagara" yakoranye na Tom Close.

Mbere yo kuririmba iyitwa "Ndamuhamagara", Uncle Austin yavuze ko yayanditse ubwo yari mu Mujyi wa Musanze, bityo ko kuyiririmba hano bifite igisobanuro gikomeye.

- Bruce Melody udasiba kuvuga ko yifuza igikombe, ageze imbere y’abafana be i Musanze abisubiramo ati "Muzi impamvu ndi hano, ndashaka igikombe kandi ni mwebwe mugomba kukimpesha". Yahise aririmba iyitwa ’Ikinya’ yaciye ibintu mu mwaka ushize wa 2017.

Umukunzi w'umuziki yahisemo kureba igitaramo yica icyaka abifashijwemo na Primus

- Umuraperi Jay C usanzwe aba igihe kinini mu gice cy’amajyaruguru y’u Rwanda, yinjiye asukiranya amagambo agize zimwe mu ndirimbo ze zizwi arangije ahita aririmba iyitwa "Sibomana’’ akurikizaho iyitwa ’’Am Back’’ yahuriyemo na Bruce Melody.

- Mico The Best, umwe mu bahanzi bamaze kugaragaza ko bafite ubuhanga mu kuririmba mu buryo bwa live, ni we ukurikiyeho mu ndirimbo ’’Indahiro.’’ Yayisoje avuga ko ashaka ko abafana bamufasha kwishima kuko agiye kubacurangira ’’Afrobeat nyayo’’, ahita acuranga iyitwa ’’Umugati’’, imwe mu zakunzwe cyane; iyi ndetse iri mu zishimiwe cyane i Musanze.

- Just Family, itsinda rishya muri Primus Guma Guma rihereye ku ndirimbo ’’Bakubwire’’ imwe mu zakunzwe hambere iri tsinda ritarasenyuka. Aba bahanzi basa n’abataramenyekana i Musanze ushingiye ku buryo bakiriwe.

Just Family, itsinda rishya riri mu bahatanira Primus Guma Guma
Jimmy na Bahati bahoze muri Just Family yo hambere
Chris wasimbuye Croidja muri Just Family nyuma yo kwihuza bundi bushya

- Christopher uherukiye abandi, araririmbye benshi barishima ndetse na we asoza ababwira ati "Ndabasaba gukomeza kumba hafi mu isengesho, nibicamo neza nzagaruka hano mbashimire."

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza