Iki gikorwa cyabereye muri Onomo Hotel ku mugoroba wo ku wa Gatandatu, tariki 23 Kamena 2018, cyitabiriwe n’abantu batandukanye barimo abari bahataniye ibihembo, abakurikira ibikorwa by’imyidagaduro n’abandi batandukanye.

Hahembwe abahize abandi mu bikorwa bitandukanye hashingiwe ku majwi bagiye bahabwa binyuze mu itora ryo kuri internet ryari rimaze igihe riba ku rubuga rwabigenewe no ku bakoresha imbuga nkoranyambaga mu buryo bwari bwarashyizweho.

Abahataniye ibihembo bari bagabanyijwe mu byiciro bigera kuri 12 bishingiye ku mirimo itandukanye. Mu majwi yabaruwe 60% ni ay’abatoreye kuri internet n’imbuga nkoranyambaga naho 40% yatanzwe bigizwemo uruhare n’abagize akanama nkemurampaka. Hari kandi n’icyiciro cyihariye cy’uwatowe cyane n’abaturage (People’s Choice).

Mu bahawe ibihembo harimo amazina azwi cyane mu bikorwa by’imyidagaduro bitandukanye nka Yannick Mukunzi ukinira Rayon Sports wahembwe nka ‘Best Fashionable Male Celebrity,’ Knowless Butera wahembwe nka ‘Best Fashionable Female Celebrity’ na DJ Pius wahembwe nk’uwakoze amashusho agaragaramo imyambarire yihariye.

Kamanzi Uwizera Gloria wavuze mu izina ry’abateguye iki gikorwa yavuze ko batekereje kugitegura biturutse ku kuba bashaka gutera imbaraga umuhate w’abantu batandukanye bafite ibikorwa bimenyekanisha umwihariko w’ibikorerwa mu Rwanda.

Yagize ati “Ni ku nshuro ya mbere habaye iki gikorwa ariko kizajya kibaho buri mwaka, intego ni ugushimira no guha ibihembo abateza imbere ‘Made In Rwanda’ mu rugendo igihugu kirimo rwo kuzamura ibikozwe n’Abanyarwanda ubwabo.”

Hanatanzwe ibihembo by’ishimwe ku bandi bantu batandukanye ahanini biturutse ku ruhare rwabo mu guteza imbere ibikorerwa mu Rwanda. Aba barimo Sina Gerard w’uruganda rwa Ese Urwibutso rukorera mu Ntara y’Amajyaruguru y’u Rwanda.

Iki gikorwa cyabereye muri ONOMO Hotel cyari cyitabiriwe n'abantu b'ingeri zitandukanye

Iki gikorwa nubwo cyari kibaye ku nshuro ya mbere mu Mujyi wa Kigali, cyabaye umugoroba w’ibyishimo ku bantu batandukanye batahanye ibihembo mu byiciro byose byarimo abakora ibikorwa bigaragaramo guteza imbere ibikorerwa mu Rwanda.

Abahembwe mu birori bya “Made In Rwanda Awards”

 Best Fashionable Female Celebrity: Knowless Butera
 Best Fashionable Male Celebrity: Yannick Mukunzi
 Best Fashion Video: “Wabulila wa” - DJ Pius
 Best Female Model: Djazira Munyaneza
 Best Male Model: Sekamana Eric
 Best Creative Fashion Designer: Tanga Designs
 Best Local Fashion House: Moshions
 People’s Choice: Makeup artist - Fancy Liner
 Best Fashion Promoters: Rwanda Culture Fashion
 Best Hair Stylish: Mirror Salon
 Best Makeup Artist: ASM
 Best Photographer: Luqman Mahoro
 Best Fashion Boutique: Masha Boutique
 Best Showbiz Show: Sunday Night

Abakobwa bahataniye kuba Nyampinga w'u Rwanda bari bahari

Akanyamuneza kari kose ku babonye ibihembo muri iki gikorwa

Fancy Liner yahawe igihembo muri iki gikorwa

Inzu ya Moshions yahize izindi z'imideli mu Rwanda

Luqman Mahoro yahembwe nk'umufotozi wahize abandi

Munyaneza Djazira yahembwe nk'umunyamidelikazi uhiga abandi mu birori bya 'Made In Rwanda Awards'

Murekeyisoni Asma yahembwe nk'uwahize abandi mu gukora Make Up

Nicki Dimpoz uzwi muri City Maid yitabiriye ibirori yambaye muri ubu buryo

Pius yahawe igihembo cy'uwakoze amashusho agaragaza Made In Rwanda

Sina Gerard yahawe igihembo cy'ishimwe nk'umwe mu bateje imbere ibikorerwa mu Rwanda

Umutoniwase Anastasie wambitswe ikamba rya Miss Popularity yari ari muri ibi birori

Yannick Mukunzi yahembwe nka 'Best Fashionable Male Celebrity'

[email protected]