Ibigwi bya Ngabonziza wayoboye Orchestre Les Citadins akanashinga Irangira yabanyemo na Makanyaga (Video)

Yanditswe na Nsengiyumva Emmy
Kuya 3 Ukuboza 2019 saa 09:24
Yasuwe :
0 0

Ngabonziza Augustin wamamaye mu muziki nka Ngabo ni umusaza ufite ibigwi mu muziki w’u Rwanda akaba umwe mu bashinze Orchestre Irangira akanayobora Les Citadins yakanyujijeho mu bihe byo hambere.

Ngabonziza yatangiye umuziki akiri muto ubwo yigaga mu mashuri yisumbuye. Icyo gihe yakoze indirimbo zirimo iyo yise “Nkumi nziza” n’izindi zamuzamuriye igikundiro.

Afite ibigwi mu muziki w’u Rwanda kuva hambere kuko yanyuze muri Orchestre Les Citadins yari yarashinzwe na mukuru we witwaga Ngaboyisonga Bernard.

Bitewe nuko yari agifite amaraso ya gisore mu 1980 yahise atangira kuyobora Orchestre Les Citadins yakanyujijeho mu muziki w’u Rwanda kugeza muri Jenoside yakorewe Abatutsi mu 1994.

Nyuma y’imyaka isaga irindwi Jenoside ihagaritswe mu 2001, Ngabonziza yahuje Makanyaga n’abandi barimo uwitwaga Jef, Deo Santos na Kaliwanjenje bakora indi Orchestre bise Irangira.

Muri iyi myaka yayoboye itsinda kugeza ubwo ryasenyutse kubera gutabaruka kwa bamwe mu bari barigize barimo Kaliwanjenje na Deo Santos mu gihe Makanyaga we atacanaga uwaka na Jef birangira Irangira ihagaze mu 2009.

Ibihangano bya Ngabonziza na bagenzi be byasize urwibutso kuko na n’ubu biracurangwa bikizihirwa na benshi kuva ku bato kugera ku basaza basheshe akanguhe.

Uyu musaza ni we wahaye Urban Boys uburenganzira bwo gusubiramo indirimbo Ancilla mu kiganiro yahaye IGIHE yavuze ko asanga iri tsinda ritarayiryoheje.

Yakomeje agita ati “Barashyuhaguje, iyo bareka tukayisubiranamo nka kuriya Makanyaga yakoranye na Kina Music "Rubanda". Abafana bajya babimbwira ko hari ukuntu batayikoze neza.”

Ngabonziza ufite indirimbo nshya na Kizito Mihigo ahamya ko hari izindi nyinshi ateganya gukora muri studio kandi afite inyota yo kongera kuryohereza abakunzi b’umuziki we.

Yahishuye ko we na Makanyaga kimwe n’abafana babo bahora batekereza uko bagarura Orchestre Irangira ariko ngo ni ibintu yitondeye kugira ngo nibiba bizabe ari ibintu bifite ingufu atari ugupfa kubihubukira.

Uyu muhanzi wakoze imirimo itandukanye yaba muri Petrorwanda na Electrogaz kugeza ubu yayishyize ku ruhande yihebera umuziki aho ahamya ko ubu ariwo umutunze n’umuryango we.

Ngabonziza yavuze ko indirimbo ze zisanzwe zibarizwa muri Library Cartas na Ikirezi ariko amasezerano bari bafitanye yarangiye ku buryo ubu agiye gushaka uko yakongera kugira aho abantu bakura indirimbo ze.

Ikiganiro na Ngabonziza Augustin washinze Orchestre Irangira akanayobora Les Citadins

Ngabonziza Augustin ni umwe mu bafite izina rikomeye mu muziki ucuranze mu buryo bwa gakondo
Ngabonziza Augustin ajya anyuzamo agahuza imbaraga na Makanyaga Abdul bagataramira abakunzi b'umuziki wo hambere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza