I Kigali, Ray C yabyinishaga abagabo abanje kubakuramo imyenda

Yanditswe na IGIHE
Kuya 9 Nzeri 2017 saa 12:59
Yasuwe :
0 0

Umuririmbyi uri mu bakanyujijeho igihe kinini muri Tanzania, Ray yakoreye igitaramo mu Mujyi wa Kigali, byari udushya tudasanzwe uhereye ku mibyinire n’imyambarire y’uyu mukobwa.

Ray C ubusanzwe witwa Rehema Chelamila yageze i Kigali mu ijoro ryo kuwa 7 Nzeri hanyuma akora igitaramo mu gicuku cyo kuri uyu wa Gatanu tariki ya 8 Nzeri 2017. Igitaramo cyiswe ‘Ray C in Kigali’ cyabereye mu kabyiniro ka People Club ku Kacyiru, yagihuriyemo n’umuhanzi mushya witwa Marina wo mu Rwanda.

Igitaramo cyabaye mu masaha y’igicuku nyuma ya saa sita z’ijoro gusa abafana ntibari barambiwe kuko hari umuziki watumaga bakomeza kwiyumvamo imbaraga zo gutarama.

Abantu bari benshi muri aka kabyiniro, barebye igitaramo cya Ray C bafata icyo kurya n’icyo kunywa cyiganjemo ibinyobwa bisembuye byose bigaherekezwa n’umuziki udunda cyane nk’uko bimenyerewe mu tubyiniro.

Ray C yabanjirijwe ku rubyiniro n’umukobwa ukizamuka witwa Uwase Deborah [Marina] waririmbye aherekejwe n’ababyinnyi. Yaririmbye izo amaze guhanga mu gihe gito amaze mu muziki zirimo ‘Bikakubera’ n’indi nshya yise ‘Marina’.

Uyu mukobwa yari yambaye agakabutura gato k’umukara kari kamufashe cyane, hejuru yari yambaye akenda karimo imyenge myinshi ku buryo imiterere y’amabere ye mu isutiya[bra] yagaragaraga.

Uyu mukobwa akigera ku rubyiniro, abantu bamweretse ko bamwishimiye cyane, batera hejuru bamwakiriza amashyi menshi baririmbana na we ubona bose batwawe.

Ray C yageze imbere y’abafana mu masaha akuze cyane ku buryo bamwe bari batangiye gukeka ko atakije. Yaririmbye nyinshi mu ndirimbo ze zakunzwe zirimo “Uko wapi” na “Umenikataa”, “Wanifautia nini”, “Na Wewe Milele” n’izindi.

Uyu mukobwa yatunguye abaje kureba iki gitaramo! Yabyinishije abagabo mu buryo budasanzwe ndetse yakoze agashya akajya atoranya uwo babyinana ariko abanje kumwambura hejuru.

Ray C yabyinanaga n’abagabo abakorakora mu gituza ubundi akabikubaho maze mu bafana bagakoma mu mashyi.

Uyu muhanzi yari yambaye mu buryo butangaje cyane! Hasi yari yambaye agakabutura k’ikoboyi k’ubururu kareshya na sentimetero zigera nko muri cumi n’eshanu, yari yakageretse kuri bas ijya gusa n’umubiri we ku buryo uwamureberaga kure yakekaga ko arimo kureba ibibero by’uyu muhanzi.

Ray C akoreye igitaramo mu Rwanda nyuma y’imyaka irenga icumi ishize ahavuye, ubwo ahaheruka yanakoranye indirimbo na Family Squand. Mu byo yavugaga byose, yagarukaga ku byiza yabonye ku Banyarwanda ndetse ko ‘yizeye neza ko bashyigikiye umuziki’.

Ray C agiye gukora ibindi bitaramo bizabera hirya no hino, kuri uyu wa Gatandatu tariki ya 9 Nzeri 2017 araririmbira i Gikondo kuri Ambassadors Park azakurikizeho ikindi kizabera i Nyamirambo ku Cyumweru n’ibindi azakorera mu Mujyi wa Musanze.

Marina yari yambaye utwenda tubonerana cyane
Marina yari aherekejwe n'ababyinnyi muri iki gitaramo
Ray C yari amaze iminsi avugwa mu bibazo byo kunywa ibiyobyabwenge
Ray C yari yambaye agakabutura gato k'ikoboyi ndetse yari yagafunguye ibipesu
Ray C yabanzaga kwambura abasore amashati ubundi akabyinisha abakorakora ku nda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza