Herve Kimenyi yamaganye inkuru ya Charlie Hebdo yashinyaguriye abo mu muryango wa Stromae

Yanditswe na Muvunyi Arsène
Kuya 4 Nyakanga 2019 saa 12:19
Yasuwe :
0 0

Umunyarwenya w’umunyarwanda Herve Kimenyi yanenze bikomeye inkuru ishushanyije y’ikinyamakuru cya Charlie Hebdo giherutse ishinyagurira umuhanzi Stromae ufite se wishwe muri Jenoside yakorewe Abatutsi mu 1994.

Yabivugiye mu kiganiro yagiranye na Televiziyo ya TV 5 Monde kuri uyu wa Gatatu tariki 3 Nyakanga 2019.

Herve Kimenyi yari yatumiwe nk’umunyarwenya wigaragaje cyane mu iserukiramuco ry’urwenya rikomeye rya “Marrakech du Rire 2019” ribera muri Maroc.

Urwenya yateye ku baturage bakomoka mu bihugu byo muri Afurika y’Amajyaruguru [abarabu] bifata nk’aho atari abanyafurika, rwatumye abantu benshi bamukunda cyane.

Mu bamushimye harimo Umunyamabanga mukuru w’Umuryango Mpuzamahanga w’Ibihugu bivuga Igifaransa [OIF] Louise Mushikiwabo.

Herve Kimenyi yabajijwe icyo atekereza ku kinyamakuru cyandika inkuru zishushanyije cya Charlie Hebdo cyigeze gushinyagurira umuhanzi Stromae ufite se wishwe muri Jenoside yakorewe Abatutsi mu 1994.

Iyi nkuru ishinyagura yasohotse tariki ya 30 Werurwe 2016 mu nomero ya 1236. Abanyamakuru ba Charlie Hebdo ngo bashakaga kuvuga ku bitaro by’iterabwoba byari biherutse kugabwa mu Mujyi wa Bruxelles mu Bubiligi.

Icyashegeshe benshi, ni uburyo abashushanyi ba Charlie Hebdo bashushanyije Rutare Pierre[wapfuye] yacitsemo ibice mu gihe umuhungu we aba yibaza ati ‘Uri he Papa?’, ikinyamakuru cyo kikerekana uyu mubyeyi yacagaguritse, buri gice kigasubiza ngo “Ndi hano”, ikindi ngo “Hariya” ikindi nacyo kiti “Na hariya”!

Kimenyi yavuze ko n’ubwo iki kinyamakuru cyandika inkuru zishushanyije zinasekeje, kuri iyi nshuro cyarengereye gukoresha igishushanyo cy’umubyeyi wa Stromae bizwi neza ko yishwe muri Jenoside.

Ati “ Sinzi neza ko hari umuntu wo muri Charlie Hebdo waje mu Rwanda, ndashidikanya. Kuvuga ngo ni urwenya rusanzwe mwihangane, ntacyo bisaba biroroshye ariko ni bibi cyane kuko ku rundi ruhande batekereza ko tudashobora kubasubiza, ntitwabafungira ariko kumva ko ufite uburenganzira bwo kuvuga ugamije kubabaza cyangwa gusuzugura abandi ntwabo mbyemera.”

Herve Kimenyi ni umwe mu banyarwenya babimazemo igihe kinini mu Rwanda. Ari mu batangije itsinda rya Comedy Knights ndetse yitabiriye ibitaramo byinshi byabereye i Kigali.

Yagiye akina mu ikinamico zitandukanye mu bihugu byo ku mugabane w’u Burayi anakina filime yitwa Grey Matter ivuga kuri Jenoside yakorewe Abatutsi mu 1994.

Kimenyi yavuze ko n’ubwo iki kinyamakuru cyandika inkuru zishushanyije zinasekeje, kuri iyi nshuro cyarengereye gukoresha igishushanyo cy’umubyeyi wa Stromae bizwi neza ko yishwe muri Jenoside
Herve Kimenyi yari yatumiwe nk’umunyarwenya wigaragaje cyane mu iserukiramuco ry’urwenya rikomeye rya “Marrakech du Rire 2019” ribera muri Maroc

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza