Genesis TV igiye gutangiza ikiganiro kizajya gihuza abifuza abakunzi

Yanditswe na Nsengiyumva Emmy
Kuya 18 Gashyantare 2021 saa 08:21
Yasuwe :
0 0

Ibiganiro bihuza abantu bagamije kubaka umubano by’umwihariko urukundo ni bimwe mu bikurikirwa cyane ku Isi. Muri uwo mujyo, Genesis Tv igiye gutangiza ikiganiro kizajya gihuriza muri televiziyo abantu bashimanye bagatangirirayo urugendo rw’urukundo.

Ikiganiro ‘Friday dating’ kizajya gitambuka buri wa Gatanu, kizajya gihuriramo abagaragaje ko bifuza abakunzi bikagaragara ko bahuje.

Niragire Marie France wabaye umugore wa mbere washinze Televiziyo mu Rwanda, akaba nyiri Genesis TV, yabwiye IGIHE ko batangije iki kiganiro mu rwego rwo kureba ko hari abo bakubakira urukundo.

Ati “Umunsi umwe twazishima turamutse dusanze hari ingo twubakiye zigakomera, tekereza nawe mu gihe twahuza abantu ugasanga bakoze umuryango ubereye u Rwanda.”

Ibi biganiro bizatangira gutambuka tariki 5 Werurwe 2021, ahazaba hahurijwe abakundana ba mbere.

Niragire yavuze ko abazajya biyandikisha muri iki kiganiro, bazajya bagaragaza uko uwo bifuza ko bakundana yaba ameze n’ibyo asabwa kuba yujuje.

Yaba umusore cyangwa inkumi baziyandikisha, hazarebwa abenda guhuza hanyuma bahamagarwe mu kiganiro bahurizwe kuri televiziyo nibashimana umubano wabo ukomeze.

Hateguwe uburyo bubiri bwo kwiyandikisha, burimo ubw’ikoranabuhanga no kujya ku cyicaro cya Genesis TV ku Muhima.

Niragire watangiye gukina filime mu 2008 kugeza ubu amaze kugaragara mu zirenga zirindwi, yakuze yumva afite inzozi zo kuba umunyamakuru no gukora mu ndege.

Genesis TV ni televiziyo yibanda ku myidagaduro, ubukerarugendo n’inkuru z’ikoranabuhanga.

Abiyandikishije bazajya banyura hano

Hagiye gutangira ikiganiro kizajya gihuza abantu bagakundanira kuri televiziyo
Niragire Marie France yabaye umugore wa mbere washinze Televiziyo mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .