Guverineri Gatabazi na Miss Jolly beretse urubyiruko igisigaye mu kwibohora nyako

Yanditswe na Munyengabe Murungi Sabin
Kuya 12 Nyakanga 2018 saa 04:37
Yasuwe :
0 0

Guverineri w’Intara y’Amajyaruguru, Gatabazi Jean Marie Vianney, yabwiye urubyiruko ko rufite amahirwe akomeye afite imizi mu rugamba rwabohoye igihugu ruyobowe na Perezida Paul Kagame.

Guverineri Gatabazi yaganirije urubyiruko rubarirwa muri magana ane rwaturutse mu mashuri anyuranye mu Karere ka Musanze, abahagarariye abatwara moto n’amagare, abanyeshuri muri za kaminuza n’abandi baturutse mu mirenge inyuranye, kuri uyu wa Gatatu tariki ya 11 Nyakanga 2018 mu nzu mberabyombi y’akarere.

Ni ikiganiro kiri mu by’uruhererekane bizwi nka ‘Intergeneration Dialogue’, bimaze imyaka ibiri bihuza urubyiruko bitegurwa na Nyampinga w’u Rwanda mu 2016, Mutesi Jolly, haganirwa ku nsanganyamatsiko igira iti “Uruhare rw’urubyiruko rw’u Rwanda mu gusigasira amahoro n’umutekano kugira ngo tugere ku Rwanda twifuza."

Mu nyigisho yatanze, Miss Mutesi Jolly yikije cyane ku kubwira urubyiruko ko ‘ari rwo rukwiye gufata iya mbere mu kubaka igihugu’ bityo ko rudakwiye gushyira agati mu ryinyo ngo rwumve ko hari abashinzwe.

Yagize ati “Urubyiruko rwakoreshejwe mu gusenya igihugu ariko ni narwo rwakibohoye bityo rero mureke ingufu zacu tuzikoreshe tucyubake kuko ni twe twikorera kandi uhinga mu we ntawe asiganya nk’uko Perezida wa Pepubulika yabivuze."

Guverineri Gatabazi ajyanishije n’insanganyamatsiko y’iki kiganiro, yibukije urubyiruko ko urugamba rw’amasasu rwarangiye ariko ko urugendo rwo kwibohora rugikomeje. Yavuze ko mu byo rusabwa kwibohora ku isonga harimo kwirinda icyacamo ibice Abanyarwanda, kwirinda ibiyobyabwenge n’ingeso mbi zirimo ubusambanyi.

Yashimiye mu buryo bukomeye Miss Mutesi Jolly wateguye iki gikorwa ndetse asaba urubyiruko rwo mu Ntara y’Amajyaruguru kumenya agaciro rufite no kubyaza umusaruro amahirwe rufite muri iki gihe.

Yagize ati "Mufite amahirwe yose ashoboka, icyo musabwa ni ugukora cyane kuko nimwiteza imbere muzateza imbere imiryango yanyu, muteze imbere aho muba n’igihugu gitere imbere. Mbere ya byose mukore cyane kandi munirinda icyo ari cyo cyose cyabacamo ibice ahubwo murangwe n’urukundo mwirinde umuntu wese washaka kubateranya.”

Guverineri Gatabazi yibukije urubyiruko ko kwibohora ari urugendo rugikomeje

Iki kiganiro, cyitabiriwe n’abayobozi bakuru mu Ntara y’Amajyaruguru, abahagarariye Polisi, Minisiteri y’urubyiruko n’izindi nzego zitandukanye.

Iki gikorwa kizwi nka ‘Inter-Generation Dialogue’ cyaherukaga kubera mu Mujyi wa Kigali ku itariki ya 27 Kamena 2018, icyo gihe cyabereye ku cyicaro gikuru cya Polisi y’u Rwanda ku Kacyiru.

Habaye n'ikiganiro mpaka ku ruhare rw'urubyiruko w’u Rwanda mu gusigasira amahoro n’umutekano
Ibi biganiro bihuza abakibyiruka n'abakuze mu ngeri zinyuranye
Miss Mutesi Jolly wateguye ibi biganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza