Gaël Faye na Samuel Kamanzi bagiye gukora ibitaramo bizenguruka u Bufaransa

Yanditswe na Munyengabe Murungi Sabin
Kuya 9 Nzeri 2017 saa 05:32
Yasuwe :
0 0

Umuraperi Gaël Faye umaze igihe gito atangiye umwuga wo kwandika ibitabo agiye gukora ibitaramo azahuriramo na Samuel Kamanzi, bazazenguruka u Bufaransa mu mpera z’umwaka wa 2017.

Ibitaramo Gaël Faye agiye gukora birihariye ugereranyije n’ibindi yakoze mbere, ibi bifite umwihariko w’uko azamurika igitabo yise ‘Petit Pays’ mu buryo bwo kuririmba amagambo n’ubutumwa bugikubiyemo byose bigaherekezwa n’umurya wa gitari azajya acurangirwa na Samuel Kamanzi usanzwe ari umunyamuziki wabyize mu Bufaransa.

Faye yanditse kuri Facebook mbere y’uko ibitaramo bitangira ararikira abakunzi be n’aba Kamanzi kutazacikanwa. Yagize ati “Muri uyu muhindo, ni amahirwe yo gushyira hanze igitabo cyanjye ‘Petit Pays’.”

Yongeraho ati “Nzaba ndi mu bitaramo by’umuziki hamwe n’inshuti yanjye umuririmbyi akaba n’umucuranzi wa gitari Samuel Kamanzi. Tuzazenguruka u Bufaransa guhera mu Ugushyingo kugeza mu Ukuboza 2017, hari n’ibindi bitaramo bibiri dufite mu Busuwisi.”

Faye agiye gukora uru rugendo rw’ibitaramo nyuma y’uko kuwa 6 Nzeri 2017 yatangaje ko yasinye mu nzu ikomeye izamura abahanzi mu Bufaransa ya AllPoints.

Igitabo Gaël Faye yanditse kimaze guhabwa ibihembo bikomeye i Burayi, cyahawe icyitwa France Culture-Télérama, iki gitangwa na radio ikomeye mu Bufaransa yitwa France Culture ifatanyije n’ikinyamakuru cyandika ku mpapuro cya Télérama.

Mu mezi ashize igitabo cya Gaël Faye cyahawe ibindi bihembo birimo ‘Prix Goncourt des lycéens’ gitangwa na Fnac[ Fédération nationale d’achats] ifatanyije na Minisiteri y’Uburezi muri iki gihugu.

Gaël Faye yari amaze igihe gito kimwe ahawe ikindi gihembo gikomeye cya Prix du Premier Roman (First Novel Prize) gisanzwe gitangwa ku banditsi batarubaka izina bari mu kigero cy’imyaka hagati ya 18 na 30.

Faye aherutse kuririmba mu iserukiramuco rikomeye mu Bufaransa rya Solidays
Gael Faye na Kamanzi basanzwe bakorana ibitaramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza