Bucura bw’umuhanzi Mwitenawe Augustin ahamya ko ari we warazwe umuziki wa se (Video)

Yanditswe na Nsengiyumva Emmy
Kuya 1 Ukuboza 2019 saa 07:40
Yasuwe :
0 0

Ninsonere Simon Mwite Pierre umusore ukiri muto akaba bucura mu muryango wa Mwitenawe Augustin ahamya ako ari we waranzwe inganzo ya se wamenyekanye cyane mu bihe byo hambere.

Uyu musore uherutse gufata amafaranga y’umubyeyi we mu gihe abahanzi bagabanywaga ayakusanyijwe na Sosiyete Nyarwanda y’Abahanzi (RSAU), yaduhishuriye ko ariwe wasigaranye ibihangano bya se nk’umurage.

Ninsonere umwe mu bana batanu Mwitenawe yibarutse yavuze ko se yamuraze umuziki we kuko yabonaga ariwe uwukunda cyane, icyakora ngo ntabwo yigeze ashaka kuba umuhanzi nubwo aba yumva yifitemo impano.

Nkuko uyu musore w’imyaka 24 yabivuze, ngo muri gahunda umuryango wa Mwitenawe ufite harimo gushinga ishuri ry’umuziki ndetse no gukora “Foundation” yo gukora ibikorwa binyuranye byiganjemo iby’urukundo izitirirwa se mu rwego rwo kugira ngo izina rya se ritazibagirana.

Abajijwe ibihangano bya Mwitenawe yarazwe, Ninsonere yagize ati” Muzehe yasize indirimbo nyinshi, ubu ndi kuzikura mu makaye nzishyira mu mashini ariko byibuza maze kwandika indirimbo zikabakaba ijana.”

Yavuze ko umubyeyi we wamenyekanye cyane mu Rwanda afite indirimbo nyinshi zari zararangiye ku buryo atarabasha kumenya neza umubare wazo, gusa ahamya ko ari nyinshi.

Ngo Mwitenawe yatabarutse amaze gutunganya Album ya mbere yari yakoze neza, iyi yitabye Imana ataratangira kuyicuruza icyakora yongeraho ko uwayishaka yayikura muri Top5 Sai i Musanze.

Muri iyi minsi umwe mu mishinga ya vuba umuryango wa Mwitenawe uri gutekereza gukora ni igitaramo cyo kwibuka Nyakwigendera umwe mu basaza bo ha mbere bakanyujijeho mu muziki w’u Rwanda.

Inshamake y’amateka ya Mwitenawe muri muzika

Mwitenawe Augustin wavutse muri 1955 akitaba Imana afite imyaka 60 muri 2015 yatangiye muzika akiri muto, indirimbo ye ya mbere yumvikana kuri Radio Rwanda mu mwaka wa 1974 afite imyaka 19.

Iyi ndirimbo yayise "Umwana w’ikirara”. Nyakwigendera yaririmbye muri Orchestre Les Copins, ariko nyuma aza gutangiza indi yitwa Umubano afatanyije na bagenzi be.

Indirimbo zabo zamenyekanye icyo gihe ni iyitwa: Nzogiroshya, Julieta, Ngwino hafi yanjye na Mariya.

Mwitenawe na none yahimbye indirimbo yakunzwe yitwa "Umwari wabenze umwarimu” aho yavugaga umukobwa wabenze umwarimu agasanga ufite imodoka (voiture), ariko nyuma akaza kuruha akicuza.

Reba hano ikiganiro twagiranye na bucura bwa Mwitenawe Augustin wamenyekanye mu ndirimbo zinyuranye

Reba indirimbo "Wimfatanya n’akazi" imwe mu zatumye Mwitenawe Augustin yamamara mu myaka yo ha mbere

Mwitenawe Augustin wabaye icyamamare mu muziki w'u Rwanda
Bucura bwa Mwitenawe mu muhango wo guherekeza Se muri 2015
Ninsonere bucura mu muryango wa Mwitenawe Augustin

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza