Ese koko Radio wo muri Good Life avuka i Nyagatare?

Yanditswe na Munyengabe Murungi Sabin
Kuya 5 Ukwakira 2016 saa 10:42
Yasuwe : XX
0

Moses Nakintije Ssekibogo [Mowzey Radio] uririmba mu itsinda rya Good Life ni umwe mu bahanzi b’ibyamamare bikekwa ko bafitanye isano n’u Rwanda bigashimangirwa n’abahamya ko bazi neza ko yavukiye i Nyagatare.

Muri Nyakanga 2015 Radio na Weasel baguze isambu yo guturamo byemewe mu Rwanda iherereye mu Kagari ka Gacuriro mu Murenge wa Kinyinya mu Karere ka Gasabo.

IGIHE yabajije Radio niba koko baraguze ikibanza mu Rwanda yanga kubivuga byeruye gusa akoresha imvugo ishimangira ko yiyumvamo u Rwanda nk’igihugu cye cya kabiri.

Radio na Weasel bo ntiberura ngo bemere ko bafite ubutaka mu Mujyi wa Kigali gusa umwe mu basinye ku mpapuro z’ubuguzi bw’iki kibanza ahamya ko aba bahanzi bombi bafite imishinga ikomeye mu Rwanda ndetse barateganya kuhubaka inzu yo guturamo.

Umwe mu bagabo [utashatse ko amazina ye atangazwa] basinye ku mpapuro nyemezabuguzi bw’ikibanza cya Radio na Weasel yagize ati “Ikibanza bakiguze i Gacuriro, ni ikibanza kinini […] numvise Radio avuga ko bazubakamo inzu ebyiri nini zizaba zirebana. Uko nabyumvise bahavugaga nk’abazahatura, Radio avuga uburyo azajya yicara muri etage akareba Kigali ayitegeye neza, ni aho gutura”

Radio akomoka mu Mutara?

Inkuru y’uko Radio na Weasel baguze ikibanza i Kigali imaze gusakara mu binyamakuru, umwe mu bazi neza aba baririmbyi[wanze ko dutangaza amazina ye] yahishuriye IGIHE ko Radio avuka mu Burasirazuba bw’u Rwanda ahahoze hitwa mu Mutara.

Yavuze ko Radio, Weasel ndetse na Chameleone bafite ibindi bikorwa by’ubucuruzi mu Rwanda bikaba bikurikiranwa n’abo mu miryango yabo baba muri iki gihugu.

Ati “Nka Chameleone wanabaye hano imyaka myinshi we afite inzu zirenze imwe i Kigali, ba Weasel na Radio na bo batangiye kwiyumva cyane mu Rwanda. Radio we anafite mushiki we wigisha mu Burasirazuba, amakuru mfite ni uko ari ho bakomoka usibye ko wenda atabikwemerera.”

Mu itohoza ryimbitse IGIHE yakoze twashakije uwo mwarimukazi wigisha i Nyagatare bivugwa ko avukana na Radio ntitwamubona gusa bamwe mu bazi cyane inkomoko y’uyu muhanzi bavuze ko adakomoka mu Rwanda nk’uko bivuga ariko ko hari abantu bo mu muryango we bahatuye.

Mu gitaramo Good Life yakoreye muri Serena Hotel muri Nyakanga 2015, Radio yavuze ko ari Umunyarwanda utuye i Kampala wishimira ko u Rwanda rwibohoye. Yagize ati “Ndi Umunyarwanda, nanjye ndi Umunyarwanda ariko atuye[utuye] i Kampala”

Mukuru wa Chameleone witwa David Mayanja yabwiye IGIHE ko Chameleone yatangiye ubuzima bwo kwiyubaka no kwiteza imbere ahereye i Kigali gusa ntiyavuze niba koko ahafite imitungo.

Ati “Ni ho ha mbere yabaye [Chameleone] , yaje mu Rwanda afite imyaka nka 16 y’amavuko. Yaje nyuma ya Jenoside [...] numvaga avuga ko ari igihugu cyiza nanjye nkumva mfite amatsiko yo kuhaza.”

Chameleone ngo ni we wabakundishije u Rwanda kuko nyuma yo kuhava asubiye gutura i Kampala ngo yakundaga kuvuga ibyiza yahaboneye kenshi.

Radio yabwiye umukunzi we inkomoko ye

Mbabazi Lilian wabyaranye abana babiri na Radio, yavuze ko uyu muhanzi atavuka mu Rwanda nk’uko bivugwa gusa na we yemeje ko ahafite abantu benshi bo mu muryango bahatuye.

Yagize ati “Njyewe navukiye Kampala, twagarutse mu Rwanda Jenoside irangiye […] Iwacu aho bakomoka ku ivuko ni ahitwa mu Mutara muri Kiziguro, aho niho nyogokuru wacu akomoka, ni ho umuryango wacu ukomoka.”

Yabajijwe niba koko Radio akomoka mu Rwanda asubiza ko atari byo nubwo bivugwa. Ati “Radio afitemo abavandimwe bake mu Rwanda, hari abantu bo mu muryango we batuye mu Rwanda, hari abahafite imiryango ariko we ntabwo akomoka inaha, iwabo ni muri Uganda.”

Se wa Radio ni Umurundi

Mu byo baganiriye bagikundana, Radio ngo yabwiye Lilian Mbabazi ko se akomoka i Burundi naho nyina akavuka muri Uganda bityo ko nta sano na nto afitanye n’u Rwanda uretse abantu bo mu muryango we baje kuhatura.

Radio afite se ukomoka i Burundi

Ati “Ntabwo Radio ari Umunyarwanda nabisobanuye, uko muzi n’ibyo yansobanuriye kuva twamenyana, nzi ko atavuka mu gihugu cyanjye, nta n’ubwo dukomoka mu gace kamwe nk’uko abantu bakunze kubivuga. Radio afite se w’Umurundi naho nyina akaba uwo muri Uganda.”

Aba bombi baratandukanye gusa ngo bazakomeza bahuzwe n’aba babiri babyaranye uwitwa Izuba na Asante. Ati “Radio twatandukanye hashize igihe kinini, ni abanyamakuru bakomeza kubizamura, abantu batangaza ibyo bashaka kandi sinababuza, ni uburenganzira bwabo, ntabwo tukiri kumwe, abayeho mu buzima bwe.”

Yongeraho ati “Njyewe na we tuzakomeza tugirane bwa bumwe, duhujwe n’abana twabyaranye […] Ntabwo namusuzugura, ni inshuti yanjye, ari mu bagize umuryango wanjye iteka.”

Radio asigaye yihatana cyane kuvuga Ikinyarwanda akanavuga ko yiyumvamo iki gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza