Emmy yasohoye amashusho ya ‘Ntunsige’ iri kuri album azamurikira mu Rwanda

Yanditswe na Munyengabe Murungi Sabin
Kuya 18 Ugushyingo 2016 saa 12:49
45 30

Umuhanzi Nsengiyumva Emmanuel [Emmy] yashyize hanze indirimbo yise ‘Ntunsige] imwe mu zizagaragara kuri album nshya ateganya kuzamurikira mu gitaramo azakorera mu Rwanda.

Emmy yaherukaga gushyira hanze indirimbo yise ‘Ntari umuntu’ yakoze mu mwaka wa 2015. Nyuma yo kuyisohora yabwiye IGIHE ko ari kunoza umushinga wo gushyira hanze album ye, ngo najya kuyimurika azava muri Leta Zunze Ubumwe za Amerika agaruke mu Rwanda kuhakorera igitaramo.

Uyu muhanzi uba muri Leta Zunze Ubumwe za Amerika kuva mu 2012, yasobanuye ko iyi album yatangiye kuyikoraho mu mwaka wa 2014 gusa azitirwa n’amasomo yatumye atabasha kuyirangiza ngo ijye hanze nk’uko yari yarabiteguye.

Nubwo yari amaze igihe azitiwe n’amasomo, kuri ubu ngo asa n’uwamaze kuyacogoza ndetse ngo agiye guhita arangiza imishinga ya nyuma atarakora ngo iyi album ijye hanze.

Emmy wiga mu mwaka wa gatatu wa Kaminuza mu ishami rya Petroleum Engineering, yijeje abafana be ko agiye kongera umuvuduko w’uburyo asohoramo indirimbo kugira ngo bakomeze kuryoherwa n’ibihangano bye.

Emmy ubwo yari mu ifatwa ry'aya mashusho

Iyi ndirimbo yatunganyijwe na Producer Lick Lick naho amashusho yayo akorwa na Producer Cedru na we uba muri Amerika.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE