Dubaï: The Ben yaserutse neza mu gitaramo yahuriyemo n’ibyamamare mu muziki wa Afurika (Amafoto)

Yanditswe na Nsengiyumva Emmy
Kuya 16 Ugushyingo 2019 saa 10:00
Yasuwe :
0 0

Umuhanzi Mugisha Benjamin [The Ben] yongeye guhurira ku rubyiniro rumwe n’abahanzi b’ibikomerezwa mu muziki wa Afurika mu gitaramo cyiswe “One Africa Music Festival”.

The Ben yabaye umuhanzi wa mbere w’Umunyarwanda watumiwe akanaririmba muri iki gitaramo cyabereye mu Mujyi wa Dubaï muri Leta Zunze Ubumwe z’Abarabu.

Abanyarwanda batari bake biganjemo abavuye mu Rwanda bitabiriye iki gitaramo ndetse bari bashyigikiye umuhanzi wo ku ivuko ku buryo bwumvikana, bamugaragarije urukundo ubwo yari ageze ku rubyiniro.

The Ben yahamagawe ku rubyiniro ari uwa kabiri yasize n’abadasanzwe bamuzi ubona batangiye gukunda umuziki we. Uyu musore yaririmbye indirimbo ze zizwi zirimo "Habibi", "Fine Girl" na "Binkolera" yakoranye na Sheebah Karungi.

The Ben yabanjirijwe na Nandy, umuhanzi ukomoka muri Tanzania wagaragaje ubuhanga agasiga umuziki we utangiye gucengera mu mitima ya benshi.

The Ben yitwaye neza i Dubai

View this post on Instagram

🙏✌🔥🔥🔥🔥🔥🔥 @theben3

A post shared by Emmy Rwanda (@emmy_rwanda_ikinege) on

-  Eddy Kenzo, Tiwa Savage na Wizkid batunguwe

Eddy Kenzo ni we muhanzi rukumbi ukomoka muri Uganda watumiwe muri iki gitaramo; yari yizeye umubare munini w’abafana baturuka mu gihugu cye, icyakora siko byamugendekeye.

Kenzo nubwo yakoreshaga imbaraga nyinshi aririmba, anabyina, abafana yari afite bari ntabo uramutse ushatse kubabara mu mibare. Ibi nawe asa naho yabibonye ubona ko acitse intege bigaragara.

Tiwa Savage na Wizkid nibo bagombaga gusoza iki gitaramo, icyakora bitewe n’umubare munini w’abahanzi bari bahari n’uburyo igitaramo cyatangiye hafi saa yine z’ijoro z’i Dubaï byatumye bagisoza birukanswa ntibahabwa umwanya uhagije wo gususurutsa abakunzi babo.

Ubusanzwe muri Dubaï nta gitaramo kirenza saa cyenda z’ijoro, izi saha zageze Wizkid na Tiwa Savage batarajya ku rubyiniro, ku buryo byabaye ngombwa ko babahamagarira rimwe.

Tiwa Savage yaririmbye indirimbo ze ebyiri akurikizaho iyo yakoranye na Wizkid amwakira gutyo ku rubyiniro.

Wizkid na we ku rubyiniro yakoresheje indirimbo eshatu igitaramo gihumuza gutyo.

Davido, Diamond na 2 Baba nibo bashimishije abantu kurusha abandi

Muri iki gitaramo cyaririmbyemo abahanzi benshi, Davido, 2Face wamaze gufata izina rya 2Baba na Diamond nibo bashimishije abantu kurusha abandi, basigara birahirwa na benshi mu bacyitabiriye.

Aba bahanzi bose baririmbye hagati mu gitaramo, byabafashije kwisanzura bakoresha indirimbo nyinshi bagira igihe gihagije cyo gutaramana n’abakunzi babo.

Davido na 2 Baba bafashijwe nuko Nigeria aricyo gihugu cya mbere cya Afurika gifite abaturage benshi i Dubaï ndetse no mu cyumba cyabereyemo igitaramo bacyitabiriye ku bwiganze. Umuriri wabo wumvikanaga mu mfuruka zose, byatumye abahanzi bo muri iki gihugu batizwa izindi mbaraga z’abafana.

Tanzania nayo ni igihugu gifite abaturage batari bake bafannye Diamond, ariko we kuko amaze kuba icyamamare muri Afurika yose n’umuziki we ugezweho muri iki gihe yafanwe n’impande zose.

Iki gitaramo cyabereye muri Dubai Festival Arena cyayobowe Bank W wamamaye mu muziki wo muri Nigeria, cyitabirwa n’umubare munini w’abafana cyane ko mbere y’iminsi ibiri gusa ngo kibe amatike yacyo yari yashize ku isoko.

Reba The Ben ubwo yari akigera i Dubai

Bank W, umushyushyarugamba ukomeye ni we wayoboye iki gitaramo
Umunya-Tanzania Nandy w'imyaka 27 yari yambariye igitaramo
Umuhanzi The Ben ni uku yaserutse mu gitaramo yaririmbyemo i Dubaï
The Ben yabaye umuhanzi wa mbere witabiriye One Africa Music Festival mu bakora umuziki mu Kinyarwanda
Umunya-Tanzania Mbosso yataramiye i Dubaï
Umunya-Kenya, Esther Akoth wamamaye nka Akothee, uhamya ko ahagarariye abakobwa bose babyaye yashimishije abantu muri iki gitaramo
Harmonize afatanyije na Skales bashimishije abakunzi b'umuziki
Harmonize yashimishije abafana b'umuziki we
Harmonize ni umwe mu bahanzi berekanye urubyiniro rw'imbaraga muri iki gitaramo
Teni uri mu baraperikazi bagezweho muri Nigeria yashimishije abakunzi be
Eddy Kenzo yatangiye afite imbaraga nyinshi ariko yaje gucika intege ubwo yari abuze abafana bo kumushyigikira
Eddy Kenzo i Dubaï yagowe n'urubyiniro yaburiyeho abafana
Abafana bari bakubise buzuye mu cyumba cyabereyemo igitaramo
JPEG - 386.4 kb
Abafana barimo n’Abanyarwanda bari bakubise buzuye ahabereye igitaramo
JPEG - 344.8 kb
Umunya-Nigeria Paul ni we utegura ibi bitaramo
Tekno yagaragaje ko ari umwe mu bahanzi bakomeye muri Afurika
Tekno yishimiwe bikomeye
Ni uku Tiwa Savage yari yambaye
Umuhanzikazi ukomeye muri Nigeria Tiwatope Savage-Balogun [Tiwa Savage] yari yitezwe nk'umwe mu bafite izina mu muziki wa Afurika
Tiwa Savage yaririmbye indirimbo eshatu gusa
Tiwa Savage ntiyabashije gushimisha abakunzi be
Umuririmbyi Ayodeji Ibrahim Balogun uzwi cyane ku izina rya Wizkid ukomoka muri Nigeria ni we washoje igitaramo
Ibyo Wizkid yari yitezweho sibyo yakoze kuko igihe cyamubanye iyanga
Umuhanzi ukomeye muri Nigeria David Adedeji Adeleke [Davido] ari mu bitwaye neza ku rubyiniro
Davido yongeye gushimangira ko izina rye ari rimwe mu akomeye muri Afurika
Diamond i Dubaï yasize ahanditse izina rikomeye
Diamond na Rayvanny mu ndirimbo bakoranye "Tetema" bashimishije abitabiriye iki gitaramo
2Baba yashimiwe nk'umwe mu bahanzi bo hambere bagikora umuziki kandi bakunzwe
2Baba yeretswe urukundo n'abitabiriye igitaramo yaririmbyemo i Dubaï

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza