DJ wa Diamond yahishuye uko yasabye Meddy ko bakorana indirimbo

Yanditswe na Muvunyi Arsène
Kuya 5 Kanama 2019 saa 07:42
Yasuwe :
0 0

DJ wemewe wa Diamond Platnumz akaba n’umwe mu bayobozi b’Ikigo cya Wasafi, Rommy Jones, yatangaje ko yasabye ubushuti Meddy binyuze kuri Instagram kugira ngo bakorane indirimbo.

Yabitangarije mu kiganiro yagiranye na Radio ya Wasafi ubwo yamurikiraga abakunzi be indirimbo ziri kuri album yise “Changes” iriho indirimbo yakoranye n’abahanzi batandukanye.

Abo barimo Diamond Platnumz , Morgan Heritage , Vanessa Mdee , Khaligraph Jones , Gnako , Harmonize, Jose Chameleone , Niniola , Ycee, Ray Vanny, Meddy, n’abandi benshi.

Iyi album iriho indirimbo 12 biteganyijwe ko izajya hanze tariki 16 Kanama 2019.

Avuga ku ndirimbo yakoranye na Meddy, Rommy yatangaje ko bamenyanye nyuma yo kumwandikira kuri Instagram akamusaba ko bakorana indirimbo.

Ati “Meddy amaze igihe kinini ari inshuti yanjye, naramwandikiye ndamwibwira ko nkomoka muri Tanzania, ndi gukora kuri album, birangira tubaye inshuti.”

Yongeyeho ati “ Twakomeje kuvugana cyane, tuza guhurira muri Amerika muhuza na Diamond aza muri Tanzania ndamwakira dukorana indirimbo.”

Iyi ndirimbo yakozwe na Madebeat wo mu Rwanda yumvikanamo ijwi ry’undi muhanzi wo muri Amerika witwa David.

Mu Mpera z’umwaka ushize Meddy yagiye muri Tanzania aho yakiriwe na Rommy Jones ku kibuga cy’indege.

Yahakoreye indirimbo zitandukanye harimo n’iyo yakoranye na Diamond Platnumz. Kugeza ubu nta ndirimbo n’imwe irajya hanze mu zo Meddy yakoreye muri Tanzania.

Uyu musore w’umunyarwanda umaze imyaka icyenda aba muri Leta Zunze Ubumwe za Amerika, ni umwe mu banyarwanda bake bakunzwe cyane muri Tanzania.
Yatangiye kumenyekanayo cyane bitewe n’indirimbo ye yitwa “Slowly."

Reba ku isaha ya 2 n’iminota 59 wumve indirimbo ya Meddy na Rommy Jones

Kwamamaza