DJ Toxxyk yasobanuye byinshi kuri Se babonanye nyuma y’imyaka 25

Yanditswe na Muvunyi Arsène
Kuya 30 Nyakanga 2019 saa 10:11
Yasuwe :
0 0

Mu ntangiro za Nyakanga nibwo DJ Toxxyk ubarizwa mu itsinda rya Dream Team DJs yerekeje mu Bubiligi, aho yari yatumiwe ngo acurangire abakunzi be babayo.

Mu ijoro ryo ku wa 6 Nyakanga 2019 yacurangiye mu mujyi wa Bruxelles ahitwa Birmingham Palace, aho yari kumwe n’umunyarwandakazi DJ Princess Flor utuye muri icyo gihugu.

Mu kiganiro yagiranye na IGIHE, DJ Toxxyk yavuze ko ibirori yacuranzemo mu Bubiligi byagenze neza cyane kandi abantu baho bamwishimiye.

N’ubwo ahanini yari yajyanywe n’akazi, DJ Toxxyk yateye ibuye rimwe yica inyoni ebyiri kuko yaboneyeho umwanya wo kubonana n’ababyeyi bari bamaze igihe batabonana. Hari hashize imyaka itanu atabonana na nyina. Yamusize mu Rwanda akiri ingimbi y’imyaka 20 naho Se we byari ubwa mbere bahuye!

Se wa DJ Toxxyk amaze umwaka umwe atuye mu Bubiligi, aho yagiye mu kiruhuko cy’izabukuru.

Uyu musore yabwiye IGIHE ko ababyeyi be batandukanye akiri uruhinja, uyu mugabo ajya gushaka undi umugore yibagirwa umwana yabyaye mu Rwanda.

Ati “Njyewe navukiye muri Congo ninaho papa na mama bamenyaniye, hashize imyaka itatu mvutse haba intambara duhungira mu Rwanda, papa ajya i Bruxelles, agezeyo ashaka undi mugore bibaruka umwana. Urumva yari mu buzima hariya ku buryo yibagiwe ubwa hano.”

DJ Toxxyk agihura n’ababyeyi be bamwakira ku kibuga cy’indege, ngo byari ibyishimo bidasanzwe kuri nyina ariko Se ntabwo yigeze agaragaza amarangamutima ye.

Ati “Papa navuga ko ari umuzungu cyane, bafite ukuntu bahisha amarangamurima yabo, yashatse kumpa akaboko ndamuhobera, mama we n’amarira na we ndamuhobera.”

Uko iminsi yagendaga ishira ni ko uyu musore w’imyaka 26 yagiye amenyerana na se, barushaho kuganira banamenyana byimbitse.

Ati “Namubazaga ibibazo buri kanya. Warangije akazi ryari, ubuzima hano bumeze gute, we ubona ari umuntu ucecetse kugira ngo avuge ni uko umubaza ikibazo. Mu minsi ibiri yakurikiyeho twaravuganaga nk’umwana na Se.”

N’ubwo umubyeyi we yamusize akiri umwana ntiyongere no gusubiza amaso inyuma, DJ Toxxyk avuga ko yamaze kumubabarira, batangiye urugendo rushya.

Ati “Nta na kimwe mushinja ubwo twabonanye bikava mu nzira, kandi burya umuntu w’umugabo agerageza kureba imbere, ibyabaye biba byarabaye.”

Yabashije kandi guhura na murumuna we bahuje Se, bishimira kumenyana ndetse amutumira kuzamusura mu Rwanda.

Yabyaranye na Sacha Kate

N’ubwo akiri muto mu myaka, DJ Toxxyk ni umubyeyi w’umwana umwe w’umukobwa ufite imyaka ine, bivuze ko yamubyaye afite imyaka 22.

Yamubyaranye na Sacha Kate, umwe mu bagore b’abanyabirori wigeze kuba umuhanzikazi ndetse yakanyujijeho mu rukundo na Nizzo wo muri Urban Boys.

Avuga ko nubwo babyaranye iby’urukundo rwabo bwarangiye, ubu basigaye bahuzwa n’uyu mwana witwa Perla.

Ati “Dufitanye umwana ariko ubuzima hari igihe buhinduka, abana n’abana cyane cyane ko abana baba bakeneye mama wabo iyo bagikura, nanjye nkabasura nkabajyana ku ishuri, ibishobotse byose umuntu akabikora.”

Uyu musore avuga ko imyaka 26 agize ari myinshi ku buryo yatangiye gutekereza gutera ikirenge mu cya DJ Miller uherutse gukora ubukwe.

Byari ibyishimo bikomeye nyuma yo kongera kubonana
DJ Toxxky na Se baherukanaga akiri uruhinja
DJ Toxxyk yongeye guhura Se nyuma y'imyaka isaga 20 batabonana
Amaze kubaka izina mu kuvanga imiziki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza