Davis D yahinduye abamucungira umutekano ashyiraho inkumi z’ibigango

Yanditswe na Nsengiyumva Emmy
Kuya 25 Mata 2021 saa 08:10
Yasuwe :
0 0

Umuhanzi Davis D uri mu bagezweho muri iyi minsi, yatunguranye atangaza ko agiye gutangira kujya akorana n’itsinda ry’inkumi zizajya zimucungira umutekano mu gihe agiye mu ruhame.

Si ibintu bimenyerewe kubona umukobwa ucungira umutekano icyamamare mu Rwanda, icyakora abakunda gusohokera mu tubyiniro tunyuranye bakunze kubona inkumi zirara zihagaze ku muryango zifasha abagore n’abakobwa baba bagiye kuryoherwa mu bijyanye n’umutekano.

Uyu muhanzi aganira na IGIHE yavuze ko yahisemo gukorana n’izi nkumi mu rwego rwo kugaragaza ubushobozi bwabo muri aka kazi ko gucungira umutekano abantu.

Ati “Abanzi neza bazi ko nkunda abakobwa, igishoboka cyose nagikora kugira ngo ngaragaze imbaraga zabo. Nabo barashoboye kandi nabo bakora akazi nk’ako basaza babo bakora.”

Uyu muhanzi yavuze ko igihe cyose azajya aba afite akazi gatuma ajya mu ruhame azajya akorana n’aba bakobwa mu buryo bwo kumucungira umutekano.

Bwa mbere uyu musore yagaragaye ari kumwe n’aba bakobwa ubwo yajyaga kuri radiyo ya Kiss Fm kumurika indirimbo ye nshya ‘Pose’ aherutse gusohora mu minsi ishize.

Iyi ndiirmbo nshya ‘Pose’ ya Davis D igaragaramo umukobwa witwa Elvanita, Umunyamideli wabigize umwuga uba mu Mujyi wa Dubai ariko ufite inkomoko muri Turikiya.

Iyi ndirimbo igaragaramo kandi imodoka yo mu bwoko bwa Lamborghini iri mu zihenze ku Isi.

Davis D yasohoye iyi ndirimbo mu gihe ari kwitegura gushyira hanze album ye ya mbere yise ‘Afro Killa’.

Yagiye akora ibihangano byinshi birimo nk’indirimbo yitwa ‘Biryogo’ yamumenyekanishije ‘Sweet Love’, ‘Irekure’, ‘Go Down’, ‘Hennessy’ n’izindi nyinshi ariko zitigeze zifata nk’izo ari gukora ubu.

Afite indirimbo zakunzwe yashyize hanze kuva muri Nyakanga umwaka ushize, zirimo ‘Micro’, ‘Dede’ ndetse na ‘Bon’.

Davis D n'inkumi zimucungira umutekano
Uyu muhanzi yavuze ko yahisemo izi nkumi mu rwego rwo kugaragaza ubushobozi bw'abagore n'abakobwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .