Daniella yasabye urukiko kumutandukanya na Chameleone ushaka kumwica

Yanditswe na Munyengabe Murungi Sabin
Kuya 19 Mata 2017 saa 12:19
Yasuwe :
0 0

Daniella Atim Mayanja, umugore w’umuhanzi ukomeye muri Uganda Jose Chameleone yandikiye urukiko asaba gatanya, yashinje umugabo we kumutoteza, kumukorera iyicarubozo no gushaka kumuhitana.

Chameleone na Daniella bamaze imyaka icyenda barushinze, basezeranye kuwa 7 Kamena 2008 muri Kiliziya ya Biina Catholic Church muri Mutungo. Icyo gihe bakoze ibirori bikomeye ndetse mu myaka bamaranye bafatwaga nk’urugo rw’intangarugero mu byamamare mu karere nyamara buri wese yagendanaga igisebe ku mutima.

New Vision itangaza ko Daniella Atim yatanze ikirego mu rukiko rwa Nakawa kuri uyu wa 18 Mata 2017. Yanditse agaragaza ko atagishoboye kwihanganira kubana na Chameleone bityo asaba ko ubutabera bwamuha gatanya agaca inzira ze.

Mu kirego cye, Daniella yagaragaje ko mu myaka ine ishize Chameleone yagiye amutoteza kenshi ndetse ngo ntiyatinyaga no kumwuka inabi mu maso y’abana babyaranye.

Mu ngingo ikomeye yumvikanisha uburemere bw’ikirego cye, Daniella yabwiye urukiko ko Chameleone yagiye amukorera iyicarubozo mu bihe bitandukanye kuva mu mwaka wa 2013 ndetse aho bigeze ngo yari atangiye kumugaragariza ko azamwica.

Uyu mugore yasabye urukiko ko rwahita rumutandukanya na Chameleone ndetse rukamutegeka ko amugendera kure kuko ngo isaha iyo ariyo yose uyu muhanzi ashobora kumwica.

Daniella yasobanuye ko mu myaka yamaranye na Chameleone yabagaho mu buzima bwo kwihangana no gushinyiriza. Chameleone ngo yari umusinzi wok u rwego rwo hejuru, amushinja ko yararaga mu nzoga ntiyite ku muryango, iyo yabaga yihaye akabanga ngo yaranywaga agataha mu museso inkoko zatangiye kubika.

Chameleone ntaragira icyo atangaza kuri iki kirego cyatanzwe na Daniella, gusa urukiko rwamwandikiye rumusaba ko agomba kuba yasubije ibikubiye mu kirego umugore we yatanze mu gihe kitarenze iminsi 15.

Chameleone na Daniella bari bamaranye imyaka ikabakaba icyenda, bakoze ubukwe bw’agatangaza muri 2007. Mu guhamya isezerano ryabo imbere y’Imana, basezeranyijwe na Padiri John Scalabrini [nyirarume wa Daniella, uyu musaza yitabye Imana mu Ukwakira 2016].

Aba bombi bamaze kubyarana abana bane barimo umukobwa umwe gusa: Abba Marcus Mayanja [yiyiseT-REX ndetse aherutse gusohora indirimbo “Game Over” muri 2014], Alfa Joseph Mayanja; Alba Shyne Mayanja na Amma Mayanja.

Impine y’amateka ya Chameleone

Chameleone [Joseph Mayanja] yavutse kuwa 30 Mata 1979 muri Uganda. Aririmba mu njyana ya AfroBeat, ni umwe mu bahanzi bakunzwe bikomeye muri Uganda na Afurika y’Uburasirazuba.

Jose Chameleone ni umwe mu bahanzi bubatse amateka akomeye muri Uganda mu kinyejana cya 21. Yatangiye umuziki mu mwaka wa 1996, aririmba mu ndimi zirimo Luganda, Icyongereza na Swahili.

Mu 1996, Jose Chameleone yabanje kuba DJ mu kabyiniro ka Missouri night club i Kampala .Nyuma gato yasinye muri Label ya Ogopa DJs muri Kenya, icyo gihe yakoranye indirimbo na Redsan wo muri Kenya bayita "Bageya".

Aririmba mu njyana zirimo gakondo yo muri Uganda [Ugandan folk music], Rumba, Zouk na Reggae. Mu mwaka wa 2000 yasohoye album ya mbere yise Bageya.
Kugeza ubu amaze gusohora album zirenga cumi n’ebyiri zirimo Mama Mia [ 2001], Njo Karibu na The Golden Voice [2003], Mambo Bado [ 2004], Kipepeo [ 2005], Shida za Dunia [ 2006], Sivyo Ndivyo na Katupakase [ 2007], Bayuda [ 2009], Vumilia [ 2010], Valu Valu [ 2012], Badilisha [ 2013] , Tubonge [ 2014] n’inshyashya yitwa Wale Wale.

Chameleone ni umuyobozi wa label yitwa Leone Island yazamuye abahanzi bamaze kubaka izina muri Uganda nka Moses Radio, Weasel, AK 47, King Saha,Papa Cidy, Pallaso n’abandi.

Chameleone na Daniella basezeranye mu mwaka wa 2008
Ubwo Daniella yambikaga impeta Chameleone
Aba bombi basezeranyijwe na Padiri John Scalabrini wafatwaga nka se wa Daniella
Chameleone na Daniella baherukaga kwizihiza imyaka umunani bamaranye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244