Kwamamaza

Chris Brown yaririmbye yirengagiza abamushinja gukubita umugore i Mombasa (Amafoto)

Yanditswe kuya 9-10-2016 saa 04:11' na Munyengabe Murungi Sabin


Umuririmbyi ukomeye ku Isi Christopher Maurice[Chris Brown] yaririmbiye mu Mujyi wa Mombasa mu ijoro ryo kuri uyu wa 8 Ukwakira 2016, igitaramo cye cyabanjirijwe n’inkundura y’abantu basabaga Leta ya Kenya kumuhambiriza.

Chris Brown yageze mu Mujyi wa Mombasa mu gitondo cyo kuri uyu wa Gatandatu aherekejwe n’ikipe y’abantu bake bita ku nyungu ze. Agisohoka mu kibuga cy’indege cya Moi International Airport ku rubuga rwa Twitter hatangiye gucicikana amagambo y’abavugaga ko uyu muhanzi yinjiye mu gihugu ahita ahohotera umugore wamusabye ko bifotozanya undi aho kumwemerera ahita ajanjagura telefone.

Inkuru zavugaga ko Chris Brown yamennye telefone y’umugore zakwirakwijwe cyane bikimara gutangazwa ko ‘ageze muri Kenya’. IGIHE yakurikiranye urugendo rwa Chris Brown mu Mujyi wa Mombasa yatangarijwe n’abateguye igitaramo bagize Mombasa Rocks ko ‘ibyanditswe byose ari umugambi wacuzwe n’abari bagamije kuburizamo igitaramo cy’uyu muhanzi’.

Umuyobozi ushinzwe iyamamaza bikorwa muri Mombasa Rocks, Adda Justin yabwiye IGIHE ko ‘ibyatangajwe byaturutse ku gatsiko k’abantu biganjemo abakoresha imbuga nkoranyambaga bo mu Mujyi wa Nairobi biturutse kuri bamwe mu batari bishimiye kubona Chris Brown i Mombasa’.

Chris Brown ntiyigeze avuga ku magambo n’ibitutsi abantu bo muri Kenya bamwoherereje cyo kimwe n’abasabaga leta ko yamuhambiriza nka ‘Koffi Olomide aryozwa guhohotera umugore’, amaze kuruhuka yakoze imyitozo ya nyuma yitegura igitaramo cye ndetse cyitabiriwe ku rwego rukomeye n’abafana bataha baryohewe.

Igitaramo cya Chris Brown cyabereye ku kibuga cya Mombasa Golf Club ku nkombe z’inyanja y’Abahinde, cyitabiriwe n’abiganjemo urubyiruko na bake bakuze. Uyu muhanzi wahoze akundana na Rihanna yabanjirijwe na Navio wo muri Uganda, Nazizi wari umaze igihe atumvikana muri Afurika y’Uburasirazuba, Ali Kiba wo muri Tanzania, Vanessa Mdee na Wizkid.

Aba bahanzi bose bishimiwe mbere y’uko Wizkid na Chris Brown baririmba ariko ukumva mu bafana hagati bavuga cyane ko bifuza Wizkid abandi bakazamura amajwi bavuga Chris Brown. Aba bombi kandi ni bo bahanzi basa n’abari bahanzwe amaso na benshi mu bitabiriye iki gitaramo.

Wizkid uherutse kuririmbira i Kigali yageze imbere y’abafana ahagana saa tanu n’iminota 30 ku isaha y’i Mombasa, yaririmbye mu gihe kigera ku minota 40. Ali Kiba yahise aza aririmba indirimbo ebyiri itsinda rya Chris Brown rihita rimuvanaho kugira ngo atica gahunda y’umuhanzi wabo.

Yirengagije abasabye Kenya kumuhambiriza

Chris Brown yaririmbye mu gihe kigera ku masaha abiri ataruhutse, indirimbo ze zakunzwe mu myaka yatambutse hafi ya zose yaziririmbye. Nta mucuranzi yari afite, yari aherekejwe n’ababyinnyi babiri ubundi agashyiramo CD bagakata umuziki gusa ibitero bimwe na bimwe yabiririmbaga ariko ijwi ryumvikanagamo umunaniro.

Indirimbo ze zishimiwe cyane harimo iyitwa Zero, Beautiful People, Royal, Turn Up the music, Little more, Deuces n’izindi. Yanze kugaruka ku magambo y’Abanyakenya biriwe bashyiditse basaba Leta ko imwirukana ahubwo yashimwe agira ati “Mombasa mwanyeretse urukundo rudasanzwe, ndabakunda bantu banjye.”

Yongeye kwibutsa abakunda umuziki muri iki gihugu ko ‘ibyiza bamukorera abibona uko bwije n’uko bucyeye’. Chris Brown yasubiyemo kenshi ko ‘yishimye cyane kandi ko azakomeza guha abafana be muri Afurika icyo bakeneye.’

Abashinzwe kurinda umutekano wa Chris Brown bagiranye amakimbirane n’abanyamakuru ubwo yaririmbaga bababuza gufata amashusho n’amafoto mu gice cyegereye aho yaririmbiraga, byageze nyuma banavuga ko nta wemerewe kongera gufata amafoto ndetse bahanuraga abagiye gufotorera ahirengeye.

Nicki Minaj mu nzira aza i Mombasa

Abateguye igitaramo cya Chris Brown i Mombasa bahise batangaza ko nyuma y’igihe gito bagiye gutangira imyiteguro y’urugendo rwa Nicki Minaj na we uzaharirimbira bidatinze.

Igitaramo Nicki Minaj azakorera muri uyu mujyi ngo cyagizwemo uruhare na Guverineri wa Mombasa , Hassan Joho. Uyu ni na we wishyuye Chris Brown na Wizkid, banamushimiye cyane.

Kugira ngo yemere kuza kuririmbira i Mombasa, Chris Brown ngo yahawe amadolari ibihumbi magana arindwi gusa ngo yari yabishyuje ay’umurengera babanza kunaniranwa kugeza ubwo bemeranyije ko azaza ariko ntaherekezwe n’ikipe nini akaririmbira kuri CD.

Umuraperi Nazizi wakunzwe mu myaka yashize
Yavuze ko ari we mwami wa Hip Hop muri Afurika y'Uburasirazuba
Navio wo muri Uganda yishimiwe muri iki gitaramo
Abari bayoboye iki gitaramo
Vanessa Mdee wo muri Tanzania yaririmbye muri iki gitaramo
Yavuze ko yaje kugira ngo arebe aho urwego rw'umuziki w'Isi rugeze
Aba bari bategereje kubona Wizkid bwa mbere iwabo
Bien-Aimé Baraza[uwa mbere iburyo] umwe mu bagize Sauti Sol yari ahagaze mu bafana Wizkid arimo kuririmba
Yari afite abafana bamwishimiye cyane
Wizkid mu ndirimbo Ojuelegba
Ali Kiba yaririmbye indirimbo imwe itsinda rya Chris Brown rihita rimuvanaho
Chris Brown yaririmbye nyuma yo gushinjwa gukubita umugore i Mombasa
Yari yitwaje ababyinnyi babiri gusa
Abakobwa b'i Mombasa ....

Munyengabe Murungi Sabin/Mombasa-Kenya


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved