Kwamamaza

Chris Brown yahawe hoteli yakodeshwaga asaga miliyoni buri joro i Mombasa (Amafoto)

Yanditswe kuya 10-10-2016 saa 10:49' na Munyengabe Murungi Sabin


Urugendo rw’umuririmbyi Chris Brown uherutse kuririmbira mu Mujyi wa Mombasa ruri mu bikorwa bya mbere byatwaye akayabo mu myaka ine ishize kuva Hassan Joho yagera ku buyobozi.

Chris Brown yaririmbiye i Mombasa ahitwa Mombasa Golf Club mu ijoro ryo kuwa 8 Ukwakira 2016. Iki gitaramo cyari cyiswe Mombasa Music Festival bivugwa ko cyateguwe bigizwemo uruhare n’Ubuyobozi bw’Umujyi wa Mombasa burangajwe imbere na Joho Hassan ushaka kongera kwiyamamaza muri manda itaha.

Uyu muhanzi wakundanye na Rihanna igihe kirekire ngo yahawe amashilingi ya Kenya 67,200,000 [akabakaba ibihumbi 700 by’amadolari] kugira ngo yemere kuza kuririmbira muri uyu mujyi.

Mu gitondo cyo kuwa 7 Ukwakira 2016 Chris Brown amaze kugera mu Mujyi wa Mombasa ibitangazamakuru byumvikana muri uyu mujyi banengaga cyane Hassan Joho[uvugwaho ko ari we watanze aya mafaranga] kuko ngo uru rugendo rwatwaye amafaranga y’umurengera kandi nta nyungu bizanira igihugu.

Mohamed Hatimy uvugizi w’ishyaka Orange Democratic Party yahise anyomoza aya makuru ndetse abwira itangazamakuru ko nta ruhare Joho ndetse n’ubuyobozi bw’umujyi bwagize mu kuzana Chris Brown i Mombasa.

Yagize ati “Ndagira ngo tubyumvikanishe neza ko nta ruhare Guverineri Joho ndetse n’ubuyobozi bw’Umujyi wa Mombasa bwagize mu rugendo rwa Chris Brown i Mombasa.”

Yahise avuga ko uyu muhanzi yatumiwe bigizwemo uruhare n’ikigo gishinzwe ubukerarugendo muri uyu mujyi ku bufatanye n’ikompanyi yitwa Wale Wasee isanzwe itegura ibitaramo.

Guverineri Joho kandi ngo ni we uherutse gutumira abahanzi bo muri Tanzania Diamond Platinumz na Ali Kiba mu birori byo kwizihiza imyaka icumi ishize ishyaka Orange Democratic Party rishinzwe. Icyo gihe habaye ibirori bikomeye ahitwa Mama Ngina.

IGIHE iri mu binyamakuru byari i Mombasa byahawe amakuru ko Chris Brown yacumbikirwaga muri hoteli ihenze cyane yitwa English Point Marina Hotel iri ku nkombe neza z’inyanja y’Abahinde. Iyi hoteli ibonekamo amacumbi akodeshwa amadolari agera kuri magana atandatu ku ijoro rimwe.

English Point Marina Hotel niyo yafatiwemo amashusho y’indirimbo ’Unconditionally Bae’ ya Ali Kiba na Sauti Sol.

Kuva kuwa 4 Ukwakira kugeza kuwa 9 Ukwakira 2016 iyi hoteli yari irinzwe bikomeye n’abasirikare ba Kenya ndetse n’abashinzwe kurinda umutekano wa Chris Brown. Mu ijoro rimwe ngo leta yakoreshaga asaga 1,200,000 z’amafaranga y’u Rwanda[hafi 150,000 y’amashilingi ya Kenya].

Muri English Point Marina Hotel Chris Brown yahacumbitse hamwe n’ikipe ye y’abantu bagera kuri 21 barimo abashinzwe tekinike, ababyinnyi, abamurinda n’abakurikirana inyungu ze.

Kuri iyi hoteli kandi hazengurukaga imbwa zizobereye mu byo kurinda umutekano no gushakisha ibisasu, zikiyongera ku bandi bagabo barimo abari bafite ibyombo by’itumanaho n’abandi bari bambaye bisanzwe ariko bose bagize itsinda ririnda uyu muhanzi.

Umutekano wa Chris Brown kandi wari wakajijwe ku kibuga cya Mombasa Golf Club aho yaririmbiye. Yageze ku rubyiniro abafotozi n’itangazamakuru bigizwe inyuma banabuzwa kongera gutunga camera Chris Brown kuko ngo byamubuzaga amahwemo.

Muri iki gitaramo Chris Brown yabanjirijwe n’abandi bahanzi barimo Vanessa Mdee, Wizkid, Ali Kiba, Navio na Nazizi. Abahanzi bagize itsinda rya Sauti Soul bari mu bari baje kureba iki gitaramo gusa ntabwo baririmbye.

English Point Marina Hotel ni yo yakorewemo amashusho ya Uncondionally Bae ya Ali Kiba na Sauti Sol
Iyi hoteli uba uyitegeye neza iyo uhagaze hejuru y'inzu ndangamurage ya Fort Jesus
Ali Kiba ari mu bahanzi bo muri Tanzania baje muri iki gitaramo
Vanessa Mdee wo muri Tanzania yaririmbye muri iki gitaramo
Wizkid wo muri Nigeria yari afite abafana bari bamushyigikiye bikomeye
Abafana b'i Mombasa bari baje kureba Chris Brown

Inkuru wasoma: Amafoto y’uko igitaramo cya Chris Brown cyagenze i Mombasa

Munyengabe Murungi Sabin/Mombasa-Kenya


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved