Chameleone yemeje ko yatandukanye n’umugore we Daniella

Yanditswe na Evariste Nsengimana
Kuya 16 Nzeri 2018 saa 04:11
Yasuwe :
0 0

Umuhanzi ukomeye muri Uganda, Joseph Mayanja uzwi ku izina rya ‘Jose Chameleone’, yatangaje bidasubirwaho ko yatandukanye n’umugore we Daniella Atim.

Umubano w’aba bombi watangiye kuzamo agatotsi mu myaka ine ishize, Daniella ashinja Chameleone kumutoteza, kumukorera iyicarubozo no gushaka kumwica.

Umwaka ushinze nibwo Daniella yandikiye urukiko asaba gatanya, avuga ko atagishoboye kwihanganira kubana nawe. Icyo gihe Chameleone yanditse kuri Facebook ko akunda Daniella byimazeyo, batazatandukana.

Nyuma Daniella yaje gusaba urukiko guhagarika ikirego, agaragaza ko habaye ukwiyunga, bemeranya ko bagiye gukomeza kubana mu mahoro.

Gusa kuri iki Cyumweru nibwo abinyujije ku mbuga nkoranyambaga, Chameleone yemeje ko yatandukanye na Daniella.

Mu butumwa yanditse kuri Facebook mu magambo 136, yavuze ko gutandukana bimushenguye umutima ariko yafashe umwanzuro.

Gusa atangira asa n’ufite ibyo yicuza, ati “buri kintu cyose kigira ihereza! Naratsinzwe, ntabwo nabaye mwiza uko bikwiye! Ni iki kindi dukeneye, Imana yaduhaye umugisha, yaradukunze, kandi izahora iri kumwe natwe.”

Yavuze ko abantu bashobora gufata amagambo ye nko gushaka kuvugwa bakanatanga ibitekerezo uko babishaka, ariko ko nk’umuryango we uzi ibyo uri gucamo, asanga igihe kigeze ngo babeho ubuzima bushya.

Yakomeje agira ati “Ubu ndi njyenyine ariko sinshakisha!!"

Yabwiye umugore we ko akeneye kumureka akaba Daniella, ko nta bundi buryo yari kumwiyereka birenze uko yabikoze.

Yakomeje agira ati “Wambereye byose ariko igihe kirageze, ndakwifuriza amahirwe masa. Umutima urashenguka ariko nagombaga gufata icyemezo.”

Chameleone na Daniella bari bamaranye imyaka ikabakaba icumi, bafitanye n’abana batanu barimo abahungu batatu Abba Marcus Mayanja, Alfa Joseph Mayanja, Amma Christian Mayanja n’abakobwa babiri Xara Amani Mayanja na Alba Shyne Mayanja.

Chameleone na Daniella bakoze ubukwe bw’agatangaza muri 2007, basezeranywa na nyirarume wa Daniella, Padiri John Scalabrini. Yitabye Imana mu Ukwakira 2016.

Chameleone yakozwe ubukwe bw'agatangaza na Daniella mu 2007
Umubano wa Chameleone na Daniella wagiye uzamo ibizazane kugeza batandukanye
Chameleone ari hamwe n'umugore we n'abana batatu muri batanu babyaranye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza