Byumvuhore agiye gukora igitaramo cy’umwihariko i Kigali

Yanditswe na Munyengabe Murungi Sabin
Kuya 20 Ukwakira 2016 saa 10:09
45 31

Umuririmbyi w’umunyempano Byumvuhore Jean Baptiste yiteguye kugaruka i Kigali kuhakorera igitaramo gikomeye azamurikiramo bwa mbere nyinshi mu ndirimbo nshya yahimbye.

Igitaramo Byumvuhore azaririmbamo mu Mujyi wa Kigali cyiswe ‘Inkera y’umubano’, kizaba kuwa 30 Ukuboza 2016, cyateguwe na Ruremire Focus uzwi cyane mu ndirimbo zifite umudiho gakondo wa Kinyarwanda.

Ruremire yaherukaga gutegura igitaramo gikomeye mu mpera za 2014, icyo gihe nabwo yaririmbanye na Byumvuhore, Cécile Kayirebwa na Beni Ngabo Kipeti. Baririmbiye mu bice bitandukanye by’igihugu mu bitaramo byahuruje abantu ibihumbi kuva ku bakibyiruka kugeza ku basheshe akanguhe.

Yateguye ikindi gitaramo kizaba kuwa 30 Ukuboza 2016, aho azafatanya na Byumvuhore Jean Baptiste usanzwe atuye mu Bubiligi, Masamba Intore, Ben Kipeti n’abandi baririmbyi bakomeye bataratangazwa.

Ruremire umaze iminsi azenguruka mu bitaramo muri Autriche na Australia yasoreje urugendo rwe mu Bubiligi aho yabonaniye na mugenzi we Byumvuhore banoza iby’igitaramo bazahuriramo.

Uyu muhanzi yabwiye IGIHE ko bemeranyije bidasubirwaho ko bazaririmbana ndetse ngo icy’uyu mwaka kizaba gifite imbaraga kurusha ibyabaye mu mwaka wa 2014.

Yagize ati “Byumvuhore twamaze kwemeranya ko azaza kuko twabonaniye mu Bubiligi, hari n’abandi bahanzi bakomeye nkivugana na bo. Abari mu Rwanda bo navuga ko hafi ya bose twamaze kwanzura ko bazamfasha barimo Masamba Intore na Kipeti. Abasigaye nzagera igihe cyo kugaruka mu Rwanda twaramaze kubinoza neza.”

Yongeraho ati “Mu byo ahishiye Abanyarwanda ni uko iki gitaramo yagishyizemo ingufu, umudiho uzaba ari umudiho ku buryo abakunzi b’umuziki bazashira ipfa n’imbeho mu nda. Afite indirimbo nshya yifuza kuzaririmba bwa mbere nagera i Kigali, hari byinshi bishya afite abantu batarumva ku buryo muri icyo gitaramo bizaba bimeze neza.”

Byumvuhore na Ruremire bahuriye mu Bubiligi

Byumvuhore afite indirimbo nshya nyinshi atarasohora azaririmba bwa mbere i Kigali, zirimo iyo yahaye IGIHE yitwa ‘Nanjye Ndaje’ iri mu njyana ituje igaherekezwa n’uruvange rw’imirya ya gitari ari nabyo bikunze kwiganza mu bihangano bye.

Yavuze ko azagera i Kigali kuwa 18 Ukuboza 2016 aje kwitegura igitaramo azakora mu mpera z’uyu mwaka ari nacyo gikomeye kurusha ibyo yakoze byose.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE