00:00:00 IGIHE NETWORK KN KINYARWANDA EN ENGLISH FR FRANCAIS

Bushayija Pascal yasohoye indirimbo ikebura urubyiruko rwabaswe n’ubunebwe

Yanditswe na Uwiduhaye Theos
Kuya 27 Kanama 2021 saa 03:06
Yasuwe :
0 0

Umuhanzi Bushayija Pascal uzwi cyane mu muziki ndetse akaba n’umunyabugeni, yashyize hanze indirimbo nshya yise ‘Kera Nkiri Umwana Mutoya’ yahariye urubyiruko rw’ubu.

Bushayija ni umunyamuziki akaba n’umunyabugeni wamenyekanye kuva mu myaka yo hambere. Uyu muhanzi yamenyekanye cyane mu ndirimbo zinyuranye zirimo ‘Elina’.

Yabwiye IGIHE ko iyi ndirimbo ye nshya yayihimbye ashaka gukebura urubyiruko rw’ubu rudashaka gukora, rukagira ngo ibintu birizana kandi atari ko bimeze.

Ati “Guhimba indirimbo uko byaje, naricaye ndeba ubuzima bw’urubyiruko rubayemo muri iki gihe. Nashakaga gutanga ubutumwa. Hari igihe abana batoya bareba ibintu biriho bitwara amafaranga bakumva ko ari ibintu byizanye. Ntibumve uburyo bashobora bagahimba imirimo y’uburyo nabo babigeraho cyangwa babona byanze bakagisha inama abakuru.”

Uyu musaza avuga ko ubu ari gutekereza kuba yakora album nyuma y’umwaka asubukuye umuziki.

Ati “Ntaganya gukora album ariko nabyo biransaba kubishakira umwanya nkagisha inama. Nagarukanye imbaraga. Abantu bari banzi mu ndirimbo imwe yitwa ‘Elina’ ariko nashakaga kubanza gukora ubugeni, ubu rero ni nayo mpamvu nsa naho nagarukanye imbaraga mu muziki. Nabonaga ko injyana ya kera igenda ibura.”

Iyi ndirimbo mu buryo bw’amajwi yakozwe na Jay P mu gihe amashusho yatunganyijwe na Muhire Visuals. Ababyinnyi yifashishijemo bahuriye muri FSUPERCREW.

Bushayija Pascal ni umwe mu banyabugeni bafite ibigwi bihambaye mu gukora ibishushanyo biryoheye ijisho, byanamuhesheje amasoko akomeye yo gukora impano zagiye zigenerwa abanyacyubahiro batandukanye.

Ni we wakoze ibishushanyo birimo impano Perezida Kagame yahaye mugenzi we wa Tanzania John Pombe Magufuli ubwo yasuraga Tanzania muri Mutarama 2018.

Ni we wakoze igihangano Perezida Kagame yahawe n’Intore z’Indatabigwi zigizwe n’abahanzi n’abanyabugeni, Imparirwakubarusha zigizwe n’abakora siporo zitandukanye ndetse n’Impamyabigwi zigizwe n’abanyamakuru.

Ni byinshi yakoze byamuhesheje amafaranga mu myaka irenga 35 amaze ari umunyabugeni.

Yaherukaga gushyira hanze indirimbo mu mezi abiri ashize ubwo yakoraga iyo yise ‘Ndishakira uwanjye’.

Bushayija Pascal yakebuye urubyiruko rugitekereza ko ubuzima bwiza buzaza rutakoze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .