Burundi: Zabyaye amahari hagati y’abegukanye amakamba muri Miss Ngoma n’abategura iri rushanwa

Yanditswe na Nsengiyumva Emmy
Kuya 15 Gashyantare 2021 saa 09:29
Yasuwe :
0 0

Nyampinga uhiga abandi uburanga n’ibisonga bye mu mujyi wa Gitega uzwi nk’umurwa w’ubutegetsi mu gihugu cy’u Burundi, bararebana ay’ingwe n’ubuyobozi bwa Ingoma Events butegurwa amarushwa y’ubwiza.

Anne Niyera watowe nka Miss Ngoma 2020 n’ibisonga bye bafashe icyemezo cyo gucana umubano n’abategura iri rushanwa ‘Ingoma Events’ iyobowe na Alfred Hakizimana.

Aba bakobwa bashinja Hakizimana kuba atarubahirije amasezerano bagiranye akaba nta n’igihembo na kimwe yigeze abaha mu byo bari bemerewe.

Nkuko ikinyamakuru Iwacu-Burundi cyabigarutseho, Miss Ngoma yari yemerewe imodoka mu gihe ibisonga bye byari byemerewe amabahasha y’amafaranga.

Aba bakobwa bashinja Hakizimana ukuriye Ingoma Events, kubeshya itangazamakuru avuga ko hari ibiri gukorwa nyamara ntabyo.

Miss Niyera yagize ati “Akunze kuvuga ko ndi kwihugura gutwara imodoka mu ishuri ryabugenewe, nyamara arabeshya ntaryo ndajyamo. “

Aba bakobwa bavuga ko batakomeza gukorana umwaka wose n’umuntu utubahiriza ibyo yiyemeje gukora.

Icyakora bavuze ko bazakomeza gukora ku mishinga yabo bafatanyije n’abaterankunga banyuranye batarimo Ingoma Events yateguye iri rushanwa.

Hakizimana uhagarariye Ingoma Events yavuze ko aba bakobwa barimo gutwarwa buhumyi n’umuntu uri kubashuka kuko batamenyereye ibi bikorwa.

Yongeyeho ko bari kugerageza kugirana ibiganiro, akaza gutungurwa n’amakuru y’uko bafashe icyemezo cyo kureka gukorana na Ingoma Events.

Ibi biganiro byatewe utwatsi na Miss Niyera, wavuze ko nta biganiro bigeze bagirana n’ubuyobozi bwa Ingoma Events.

Hakizimana yavuze ko umukobwa witandukanyije na Ingoma Events atavuga ko agifite ikamba kuko kudakorana bihita bimwambura ikamba.

Umuyobozi w’intara ya Gitega, Venant Manirambona wari umwe mu bayobozi bashyigikiye bikomeye iki gikorwa, yavuze ko yasabye ubuyobozi bwa Ingoma Events gukemura iki kibazo mu maguru mashya.

Niyera Anne, ibisongwa bye Ketty Merveille na Niyoyankana Adele Ange Nicole hamwe na Miss Popularity Habimana Clara Kany, batowe mu mpera z’umwaka ushize.

Ibirori byo gutora Miss Ngoma mu Burundi byabaye mu Ukuboza 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .