Bull Dogg na Social Mula bagiye gukorera igitaramo i Kampala

Yanditswe na Dusabimana Aimable
Kuya 17 Werurwe 2017 saa 07:54
Yasuwe :
0 1

Umuraperi Bull Dogg na Social Mula bagiye guhurira mu gitaramo n’umuhanzi Ziza Bafana uri mu bafite izina rikomeye mu muri Uganda mu njyana ya Dancehall akora mu buryo bugezweho.

Ni ku nshuro ya mbere aba bahanzi bombi baturuka mu Rwanda bagiye guhurira mu gitaramo muri Uganda. Iki igitaramo batumiwemo kizabera mu kabyiniro kitwa ’Light In Club’ kazaba gafunguwe bwa mbere mu Mujyi wa Kampala.

Bull Dogg usigaye wiyita Kemosabe yabwiye IGIHE ko barangije kumvikana mu buryo bwuzuye n’abateguye iki gitaramo, yongeraho ko muri urwo rugendo bazakorera i Kampala batazatahira kuharirimbira gusa ahubwo ngo bateganya kuhakorera ibindi bikorwa.

Ati "Ni ibintu byadushimishije cyane, ni Umunyarwanda ukorera muri Uganda wadutumiye nk’abahanzi bakorera umuziki mu Rwanda". Yanavuze ko nyuma y’igitaramo bashobora gutekereza n’uburyo bwo kuhakorera imishinga itandukanye ya muzika cyangwa kwigira ku byagezweho muri Uganda.

Ati "Uko njyewe mbitekereza ku giti cyanjye, numva niba umuntu yageze mu gihugu umuziki waho wigiye imbere ho gato kuruta uw’u Rwanda, tugomba byibuze kubanza tukiga imikorere yabo, tukareba ibyo twabigiraho niyo byaba ari ugukorana na bo tukareba muri rusange umusaruro twakurayo."

Bull Dogg azajya muri Uganda ari kumwe na Social Mula ukunzwe muri iyi minsi mu ndirimbo zitandukanye zirimo ’Ku Ndunduro’, ’Amahitamo’, n’indi nshyashya yitwa ’Humura’ yatangiye gucurangwa hirya no hino kuri radiyo mu Rwanda.

Aba bahanzi bombi bagiye guhurira mu gitaramo muri Uganda mu gihe ari na bamwe mu bari ku rutonde rw’abahatanye mu irushanwa rya Primus Guma Guma Super Star rigiye kuba ku nshuro ya karindwi. Social Mula ni ubwa mbere azaba aryitabiriye mu gihe Bull Dogg ari ubwa gatatu.

Bull Dogg ngo yizeye kuzava muri Uganda ahigiye ibintu byinshi

Igitaramo bagiye kwitabira mu Mujyi wa Kampala giteganyijwe kuba ku itariki 31 Werurwe 2017, kizasusurutswa n’abavanga imiziki bakomeye muri Uganda barimo uwitwa Dj Serato, Dj SZ hanerekanwe amwe mu mashusho y’indirimbo zakozwe n’abahanzi batumiwe.

Social Mula akunzwe muri iyi minsi mu ndirimbo 'Amahitamo'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza