Bizimana, Gadi na Mussa bagiye kuzenguruka Isi bigisha gufotora

Yanditswe na Munyengabe Murungi Sabin
Kuya 17 Kanama 2018 saa 04:10
Yasuwe :
0 0

Abafotozi batatu babyiza by’umwuga, Bizimana, Gadi na Mussa batangiye urugendo ruzenguruka Isi bigisha abana ibyerekeye gufata amafoto no kuyatunganya mu buryo bwo kuvungurira kuri bagenzi babo ibyo bigiye mu kigo cy’imfubyi barerewemo.

- Bizimana, Gadi na Mussa bakuriye mu kigo cy’imfubyi
- Mu 2000 bashyizwe mu itsinda ‘Camera Kids’ bigishwa gufata amafoto
- Ubu barakuze, ni abanyamwuga ku rwego rw’Isi,
- Barashaka gusangiza ubumenyi bagenzi babo mu bindi bihugu

Aba, kimwe na bagenzi babo 18, bahurijwe muri ‘Camera Kids’ mu mwaka wa 2000 batangira kwigishwa gufata amafoto. Camera Kids bavutse, ku gitekerezo cyazanywe na mwarimu wabo David Jiranek washakaga guha umusanzu Rosamund Carr (Roz) washinze ikigo cy’imfubyi cya ‘Imbabazi’ cyabaga mu Mujyi wa Rubavu.

Rosamund Carr, ni Umunyamerikakazi wabaye imyaka 50 mu Rwanda, yahoze akora ubuhinzi bw’indabyo mu gice cy’ibirunga akaba yaranabaye inshuti ikomeye ya Dian Fossey Nyiramacibiri.

Mu Ukuboza 1994, Rosamund Carr yafashe inzu ye imwe yakoreshaga mu byo gufata neza umusaruro w’indabyo ayiharira abana b’imfubyi bari babuze imiryango muri icyo gihe.

Batatu mu bana bafashijwe n’umuryango ‘hrough the Eyes of Children’ bakiga gufata amafoto, ubu barakuze ndetse bahindutse abanyamwuga muri aka kazi. Umwe muri bo witwa Bizimana Jean afotorera Reuters, Gadi Habumugisha ni umwe mu bakozi bakomeye ba Marriot Hotel mu gihe Mussa Uwitonze na we afata akorera imiryango mpuzamahanga idaharanira inyungu mu gice cyo gufata amafoto n’amashusho.

Muri bose, Bizimana ni we wasigaye abikora nk’akazi ka buri munsi kamutunze ndetse akaba amaze kumenyekana ku rwego mpuzamahanga. Uko ari batatu kandi, bafite umushinga wo kwigisha abana bahuye n’ibibazo bitandukanye ku Isi babaha ubumenyi mu byerekeye gufata amafoto nk’imwe mu nzira yabibagiza ibibazo byashegeshe ubuzima bwabo.

Gadi Habumugisha yabwiye IGIHE ko batangiye umushinga wabo wo kwigisha abana ndetse muri Nyakanga 2018 bagiye Boston na Orange muri Amerika bigisha abarerwa n’umuryango Home for Little Wanderers biganjemo abavuye muri Mexique.

Mu rugendo bakora rwo kwigisha no gutanga ubumenyi mu gufata amafoto, banafata amashusho ya filime mbarankuru izasobanura urugendo rwa ‘Camera Kids’ mu myaka ishize bakazayimurika muri Mata 2019 ubwo u Rwanda ruzaba rwibuka imyaka 25 ishize Jenoside yakorewe Abatutsi ibaye.

Yagize ati “Ni filime dukora ariko tunayirimo, tugenda mu bice bitandukanye twigisha abana camera, tubabwira uburyo yadufashije nk’imfubyi bigatuma tugira icyizere cy’ejo nk’uko natwe byatugendekeye kandi twarakuriye mu bibazo.”

Mu 2003, Gadi na bagenzi be bo muri Camera Kids, bafashe ifoto bayimurika muri Amerika ihiga izafashwe n’abahanga maze bituma ifungura imiryango ku batanga inkunga bityo ikigo ‘Imbabazi’ gitangira kubona amafaranga yo kwishyura amashuri y’izi mfubyi.

Yagize ati “Icyo gihe twafashe ifoto ijyanwa mu irushanwa ryari rikomeye mu 2003, ryabereye muri Amerika, twahatanye n’abafotozi bakomeye cyane ariko ifoto yacu ya ‘Camera Kids’, yabaye iya mbere itangira kujyanwa mu mamurikagurisha ahantu hatandukanye bigatuma abantu batumenya bemera gutanga inkunga ku kigo cy’imfubyi twabagamo bityo tukabona amafaranga yo kwiga no kubaho. Ibyo byaduteye imbaraga cyane dukunda gufotora.”

Yakomeje agira ati “Kwiga gufotora byaduhinduriye ubuzima, umwe muri twe akorera Reuters, amafoto ye acuruzwa henshi ku Isi, nanjye na mugenzi wanjye Mussa byaradufashije duhindura ubuzima. Ibi byatumye twibaza uko twabigenza kugira ngo tuzatange umusanze ku bakibyiruka ariko bafite ibibazo haba mu Rwanda no hanze.”

Habumigisha Gadi ubwo yarimo yigisha gufotora muri Boston

Ubu, bafite umushinga ukomeye wo kujya gutanga amasomo mu bihugu bitandukanye byiganjemo abana bahuye n’ibibazo bikomeye kubera intambara n’ibindi biza byatumye ubuzima bwabo buhungubana.

Ati “Muri iyi minsi, twifuza kujya kwigisha abana bafite ibibazo bikomeye, turashaka kujya muri Haiti, Lebanon, Syria, Turkey, Ethiopia kubera ko hari umushinga witwa Worldwide Orphans n’ahandi.”

Yavuze ko icyerekezo bafite ku gihugu cyabo ari “ugushinga ishuri, bizatangira dusura amashuri atandukanye dutange amasomo mu matsinda ku buryo umwana asigarana ubumenyi bwamufasha kugira ubumenyi bwagira icyo bumubyarira. Mu Rwanda tuzigisha abana bose, ntabwo tuzibanda ku bafite ibibazo gusa.”

Mu 2011, aba bafotozi ba Camera Kids bakoze imurika muri Serena Hotel
Gadi Habumugisha na bagenzi be 19 biganye gufotora, hano hari mu 2011
Gadi Habumugisha yize gufotora akiri muto akura abikunda none ubu na we yatangiye gutanga ubumenyi
Jean Bizimana, ubu yavuyemo umufotozi ukomeye muri Reuters
Jean Bizimana na bagenzi be biganye gufotora guhera mu 2000 kugera mu 2010
Gadi Habumugisha na Bizimana na bagenzi babo biganye ibyerekeye gufotora
Uwitonze Samuel[Mussa], ni umwe mu bigishirijwe gufotora mu kigo cya Imbabazi
Aba ni bamwe mu banyeshuri bo muri Haiti na Mexico bigishijwe na Camera Kids muri Amerika
Aba ni bamwe mu bimukira bo muri Haiti na Mexico ubwo bazaga kwiga gufotora babyigishije n'abanyarwanda batatu
Erica Umunya-Mexico uba muri USA ubwo yahabwaga certificat nyuma y'amasomo yize mu gufata amafoto
Gadi Habumugisha, Uwitonze Samuel[Mussa], Fred Ritchin wa International Center of Photography (ICP)
Jean Biziman, Melissa umwanditsi mukuru wa Aperture Foundation, Uwitonze Samuel[Mussa] na Gadi Habumugisha
Jean Bizimana ubwo yarimo yigisha abana gufotora muri Amerika
Mila Alim na Leybie Suarez Suazo bamwe mu banyeshuri b'Abanyamerika baba i Boston bari bitariye isomo ryo gufotora ryatanzwe na Camera Kids
Uwitonze Samuel, Jean Bizimana na Gadi Habumugisha ubwo baheruka kujya kwigisha gufotora muri Orange, New Jersey
Aba basore uko ari batatu bafite gahunda yo kujya mu bihugu bitandukanye kwigisha gufotora
Mussa ubwo yari i Boston yigisha abana gufotora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza