Kwamamaza

Bashima, umukecuru w’icyamamare umaze imyaka 60 acuranga inanga

Yanditswe kuya 7-09-2016 saa 12:19' na Munyengabe Murungi Sabin


Bashima Colette, ni umuhanzi w’umukirigitananga ubimazemo imyaka 60, yiyita icyamamare mu Ntara y’Amajyaruguru ashingiye ku burambe abimazemo n’uburyo abagore bafite ubuhanga nk’ubwe mu Rwanda batarenze babiri.

Yavutse mu 1946, ubu atuye i Karambi mu Murenge wa Nkotsi mu Karere ka Musanze ho mu Ntara y’Amajyaruguru. Mu kiganiro cyihariye na IGIHE yavuze ko gucuranga inanga yabitangiye afite imyaka icumi, ubu amaze imyaka 60 acuranga.

Bashima azirikana cyane se wamwigishije gucuranga, ngo ni na we akomoraho ubumenyi bwose. Ati “Data yaracurangaga cyane, yacuranze henshi hambere, ndamushima aho aria bona umurage yansigiye.”

Yavuze ko yatangiye gucuranga by’umwuga mu 1986, icyo gihe ngo ari mu bahanzi batoranyijwe muri komini barushanwa ku rwego rw’igihugu mu bihembo [atibuka izina] byateguwe na Orinfor.

Ati “Mbimazemo igihe, natangiye gucuranga neza mu 1986, icyo gihe nari umuhanzi ukomeye mu gucuranga, nacurangaga kuri Radio Rwanda. Na Papa yari umucuranzi ukomeye, ni na we wabinyigishije, yacuranze hambere, ba Rujindiri numvaga abavuga, yakoranaga na bo.”

Avuye gucuranga kuri Radio Rwanda i Kigali ngo yageze iwabo muri Komini Nyakinama[ubu ni mu Karere ka Musanze] atangira gufatwa nk’umuhanzi ukomeye ndetse nta rushanwa cyangwa ibirori atatumirwagamo muri Segiteri na Komini.

Ati “Kayibanda bamwimika nari njijutse, icyo gihe naracurangaga da, nyuma gato nibwo natangiye kurushanwa ku rwego rwa Komini, no ku misiyoni hari igihe badutumiraga kuririmbira abazungu…”

Bashima avuga ko mu bahanzi bariho mu Rwanda muri iki gihe azi cyane Nzayisenga Sofiya ucuranga inanga abandi ngo yumva babavuga ntabwo akurikirana ibyabo cyane. Yiyizi nk’umugore umwe rukumbi ucuranga inanga mu Ntara y’Amajyaruguru, akemeza ko mu gihugu abagore bayicuranga ari babiri gusa [we na Sofiya].

‘Umugore umwe rukumbi ucuranga inanga mu Majyaruguru’

Ati “Mu Ntara y’Amajyaruguru nta wundi mutegarugori nzi ucuranga inanga, ni njye gusa, ndazwi cyane na ba Meya bankenera kenshi nkajya gucuranga […] Abakora umuziki mu Rwanda nzi Sofiya gusa wenda n’abo ba Masamba, abandi numva babavuga gusa.”

Amaze kugwiza inanga enye ze bwite gusa mu kuvuga amazina yazo zimwe ziramwisoba kubera izabukuru. Yacuranze iyitwa “Nyamunini”, “Kamananga”, “Urutango” n’izindi ateganya guhimba.

Iyo ahamagawe kuririmba mu birori ku Karere n’indi minsi mikuru hari igihe ahabwa ibihumbi bitanu, amafaranga afata ko ari menshi kuko asumba umubyizi acyura iyo yagiye mu murima.

Ati “Iyo banshatse ngo ncurange ntahana ibihumbi bitanu, ni amafaranga menshi kuko ubusanzwe iyi ntacuranze mba ndi mu murima cyangwa nkaba nagiye mu ishyirahamwe kuboha agaseke.”

Acuranga inanga yaguze mu 1971

Ubumenyi yabukomoye kuri se na we wari umucuranzi ukomeye, ngo yumvaga avuga ko akorana na ba Rujindiri. Ati “ Ubumenyi mfite ni ubwo data yansigiye gusa ibindi ngenda mbyiyigisha, mbikura mu mutwe, iyo bambwiye insanganyamatsiko bashaka ko ndirimbaho mpita nishakamo inganzo ngacuranga.”

Inanga acuranga ubu yayiguze mu 1971, ntiyayihunganye, yayisize mu rugo abasahuraga imitungo batwara ibindi ariko yo barayisiga.

Bashimana ni umukirigitananga ubumazemo imyaka 60

Yagize ati “Iyi nanga nayiguze nkiri umudamu muto, hari kera ni mu 1971, mu ntambara nayisize mu rugo, abasahuraga ibintu ntabwo bayibye bajyanye ibindi yo barayisiga.”

Mu bahanzi bazwi yacuranganye na bo avugamo Mwitenawe, Ntamukunzi n’andi matorero azwi mu Karere ka Musanze.

Yiteguye kujya gucuranga muri Senegal

Ati “Ugeze mu Mujyi ukavuga uti ndashaka mundangire ‘ku mukecuru ucuranga inanga’ bahita bakugeza iwanjye. Gucuranga inanga bimaze kungira icyamamare, nta wundi mugore w’umuhanzi w’icyamamare nkanjye inaha, uzabaze, njye bantumira gucuranga kuri Radio, abanyamakuru ba Orinfor baranzi.”

Yiteguye urugendo ateganya kuzagirira muri Senegal, ngo ni abazungu yacurangiye inanga barishima cyane bahita bamwemerera kuzamujyana gucuranga mu iserukiramuco gakondo.

Ati “Abazungu turabacurangira, benshi ndabacurangira bakampa amafaranga […] Nonese bajye baza iwacu twebwe ntitujye iwabo? Bazanjyana muri Senegal da, baranyemereye, nzajyayo.”

Iyi nanga amaze imyaka 45 ayicuranga

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved