Basaninyenzi, Umunyarwanda wihariye mu muziki wa Amerika

Yanditswe na Munyengabe Murungi Sabin
Kuya 4 Kamena 2018 saa 11:02
Yasuwe :
0 0

Tuma Basa , izina rihetse ibikorwa umurundo mu muziki wa Leta Zunze Ubumwe za Amerika, yazamuye abatabarika ndetse ari mu nkingi za mwamba mu bafasha uru ruganda kubyara amafaranga.

Ubusanzwe yitwa Tumaine Basaninyenzi ariko yamamaye nka Tuma Basa; akomoka mu Rwanda ndetse ahafite abavandimwe. Nyina na se niho bakomoka gusa bimukiye muri Amerika ari naho baba kugeza ubu.

Tuma Basa akunze gusura u Rwanda, yaherukaga kuhaza mu ntangiriro za Mata 2018 ubwo yari aje gushyingura nyirakuru witabye Imana, mbere y’aho nabwo yarazaga akahava asuye abavandimwe be batuye i Rubavu ndetse na Nyanza ahahoze hitwa i Butare.

Yakoze mu bigo bikomeye biteza imbere bikanacuruza umuziki birimo Spotify ari nayo yakoragamo mu minsi ishize. Ubu, Tuma Basa yinjiye mu bayobozi bakuru ba YouTube ku Isi aho ayoboye ishami rya Urban Music.

Billboard yatangaje ko uyu mugabo ukomoka mu Rwanda yahawe iyi mirimo mu ntangiriro za Gicurasi 2018 ariko ubuyobozi bukuru bwa YouTube bubanza kubigira ibanga, bwabyemeje kuwa Gatanu tariki ya 1 Kamena 2018.

Umuyobozi Mukuru w’ishami ry’umuziki muri YouTube, Lyor Cohen yavuze ko Tuma Basa yahawe izi nshingano nk’umwe mu bahanga kandi bafite inararibonye mu guteza imbere ubuhanzi.

Mu nshingano afite harimo kongera ububyutse mu muryango w’abakunda umuziki wa Urban Music, guhuza abahanzi bawukora ndetse n’abawumva bakarushaho kwiyongera.

Yagize ati “Tuma azanye ubumenyi bwe mu ruganda rwa muzika, abifitemo ubunararibonye bw’imyaka myinshi, yakoreye BET, MTV, REVOLT ndetse no mu minsi ishize yakoraga muri Spotify.”

Yongeyeho ati “Ubunararibonye afite buzagira uruhare rukomeye mu guteza imbere umuziki kuri YouTube, guhuza abahanzi n’abafana bo ku mubumbe bose, nishimiye guha ikaze ijwi rye mu mbaraga zacu twahurije hamwe.”

Tuma Basa, yari amaze imyaka itatu akorera Spotify aho yari ayoboye ishami rya Hip Hop. Mu gihe yari ahamaze yateje imbere ubu bwoko bw’umuziki mu buryo bugaragara ari nacyo ahanini gishingirwaho mu kwemeza ko azafasha YouTube kuzamura bidasanzwe muri gahunda yayo nshya yo guteza imbere urban music.

Tuma Basa…

Tuma Basa asanzwe ari umuhanga mu gutunganya muzika akaba afite n’ubumenyi mu kuvanga indirimbo. Yatangiye kwinjira mu byerekeye ubucukumbuzi no guteza imbere Hip Hop ubwo yakoraga muri BET, mu gice cya muzika agisoza amashuri yisumbuye.

Nyuma yo kuva kuri BET yakoreye MTV mu mashami atandukanye aho yayoboraga abapanga imiziki icurangwa. Ubwo yari kuri MTV, nibwo Tuma Basa yahawe impamyabumenyi y’icyiciro cya gatatu mu byerekeye ubucuruzi, yayikuye mu ishuri rya Stern School of Business[rimwe mu agize New York University].

Tuma Basa, ku ifoto ya mbere ari kumwe na Dj Khaled naho iburyo ari kumwe na P Diddy

Nyuma yo kuva kuri MTV, Tuma Basa yafashije inshuti ye Sean “Puff Daddy” Combs gutangiza Televiziyo ya REVOLT, icyo gihe yahise agirwa Visi Perezida mu ishami rya Music Programming.

Mu byamwanditsweho ku nkomoko ye, hari ibinyamakuru bigaragaza ko Tuma w’imyaka 42 yavukiye muri Repubulika Iharanira Demokarasi ya Congo aho umuryango we wabaga icyo gihe. Ni umwe mu buzukuru ba Pastor Basaninyenzi Musango, ufitanye ubumwe cyane na Pasiteri Ezra Mpyisi.

Akiri muto cyane bahise bimukira muri Ioawa muri Amerika ari naho yabaye mu myaka y’ubuto bwe nyuma ajya kuba muri Zimbabwe aho yamaze imyaka icumi. Yize kaminuza muri University of Iowa ari naho yatangiye gukinira mu ikipe y’ikigo ya Basketball ya Iowa Hawkeyes.

Tuma yagizwe umwe mu bayobozi bakomeye muri YouTube
Tuma n'inshuti ye P Diddy
Tuma Basa (ibumoso), ni umwe mu bateza imbere muzika yiganjemo Hip Hop muri USA
Hano yari kumwe na nyirakuru na sekuru i Nyamirambo mu 2006
Tuma Basa n'abavandimwe be bambaye imikenyero
Tuma Basa n'umubyeyi we
Tuma Basa(uwa kabiri iburyo), Ezra Mpyisi na sekuru Pastor Basaninyenzi Musango (wambaye amataratara)
Ubwo aheruka mu Rwanda muri Mata 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza