Bapfukamye barasengerwa mu gitaramo cy’Umujyi wa Kigali cyaririmbyemo ibyamamare muri Gospel (Amafoto)

Yanditswe na Nsengiyumva Emmy
Kuya 30 Ugushyingo 2019 saa 04:41
Yasuwe :
0 0

Buri mpera z’ukwezi, Umujyi wa Kigali utegura igitaramo cyo guherekeza ukuba kurangiye baha ikaze ugushya banasusurutsa abaturage. Iki gitaramo kiba buri wa Gatanu wa nyuma w’ukwezi.

Muri iki gitaramo cyabaye mu ijoro ryo kuri uyu wa Gatanu tariki 29 Ugushyingo 2019 hari hitabajwe abahanzi bo mu ndirimbo zo kuramya no guhimbaza Imana barimo; Bosco Nshuti, Alex Dusabe ndetse na Dominique Nic.

Ni igitaramo cyitabiriwe n’abantu benshi ndetse baryohewe n’indirimbo z’abahanzi babo baje kwiyongeraho korali Siloam yo ku Gisozi.

Umukozi w’Imana Jean Paul Nzaramba yasengeye abari bitabiriye iki gitaramo bahisemo kwakira agakiza ndetse anasengera imigendekere yacyo yaba mu gutangira ndetse no gusoza.

Muri iki gitaramo cyari cyihariwe n’abahanzi baririmba indirimbo zo kuramya no guhimbaza Imana abacyitabiriye basengewe bahabwa umugisha ndetse banaboneraho kwakira agakiza.

Nshuti Bosco izina rimaze gukura mu muziki wa Gospel yashimishije abakunzi b‘umuziki we muri iki gitaramo.

Dominique Nic umwe mu bahanzi bakomeye mu muziki wa Gospel mu Rwanda nawe yongeye kwerekana ko izina rye rikiri mu mitima y’Abanyarwanda ubwo yaririmbaga buri umwe wari witabiriye yari yizihiwe bikomeye.

Nyinshi mu ndirimbo za Dominique Nic yaziririmbye abyinana n’abakunzi b’umuziki we bageze aho bakegura intebe bari bicayeho bakazifashisha mu kwereka uyu muhanzi ko banyuzwe.

Nyuma ya Dominique Nic hakurikiyeho Alex Dusabe wamenyekanye kubera indirimbo ze nka; Ni kuki turira, Umuyoboro n’izindi z’uyu mugabo zabiciye bigacika.

Nk’uko aribo batangije igitaramo Korali Siloam yo ku Gisozi bongeye baratarama banagishyiraho akadomo icyakora abantu bari baryohewe ku buryo batashye batabishaka.

Bamwe mu bakunzi b’umuziki wo kuramya no guhimbaza Imana bari bitabiriye iki gitaramo babashije kuganira na IGIHE bagaragaje icyifuzo cy’uko ibi bitaramo byaba ngarukakwezi.

Alex Dusabe wishimiye uko iki gitaramo cyagenze yagize ati” Ni ibintu byiza tuba tugomba kugira igihe tugataramira abakunzi b’umuziki wacu badakunze kubona ubushobozi bwo kwishyura ibitaramo bikomeye tuba twakoze. Wabonye ko abantu bari bishimye.”

Uyu muhanzi yavuze ko ibiganiro bigiye gukomeza mu mujyi wa Kigali hakarebwa niba ibitaramo nk’ibi bya Gospel byakorwa kenshi cyane ko yabonye ari ibintu byashimishije abakunzi b’umuziki.

Umukozi w'Imana Nzaramba Jean Paul niwe wabwirije muri iki gitaramo
Abafana bari bitabiriye iki gitaramo ari benshi ubona bishimiye umuziki bacurangirwaga n'abahanzi bo kuramya no guhimbaza Imana
Bamwe mu bitabiriye iki gitaramo batashye bakiriye agakiza ndetse basengewe na Pasiteri Nzaramba Jean Paul
Korali Siloam yasusurukije abitabiriye iki gitaramo
Nubwo mu mujyi wa Kigali hari hahitutse imvura abafana bitabiriye iki gitaramo ku bwinshi
Nshuti Bosco uririmba anicurangira gitari
Bosco Nshuti yashimishije benshi mu bitabiriye iki gitaramo
Dominic Nic yasusurukije abitabiriye iki gitaramo
Dominique Nic umwe mu bahanzi bafite amazina akomeye mu muziki wa Gospel yasusurukije abitabiriye iki gitaramo
Alex Dusabe aririmba anicurangira Piano
Alex Dusabe waririmbye nyinshi mu ndirimbo ze zo ha mbere yashimishije abakunzi b'umuziki we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza