Bahujwe n’impanuka: New Voice, itsinda ry’abasore b’abanyempano mu muziki

Yanditswe na Uwiduhaye Theos
Kuya 12 Gashyantare 2021 saa 10:22
Yasuwe :
0 0

Kibamba Jacques na Rwogera Christian bahuriye mu itsinda rishya bise New Voice rishaka kongera kwereka Abanyarwanda ko umuziki w’amatsinda ugihari n’ubwo amenshi yasenyutse, andi agacika intege.

Aba basore bahuye mu 2013 ubwo bigaga ku kigo kimwe cya G.S Rugando mu Cyiciro Rusange.

Bafashe umwanzuro wo gushinga itsinda nyuma y’uko Jacques Kibamba yakoze impanuka ikomeye cyane mu 2013 avuye gusenga, agiye kureba mugenzi we Rwogera akagongwa n’imodoka.

Muri ubu burwayi yamazemo amezi arindwi, yafashijwe na Christian Rwogera bari basanzwe ari inshuti zikomeye ariko batarafata umwanzuro wo kuririmbana.

Rwogera yagiye gusura mugenzi we iwabo ababazwa n’ubuzima yari abayemo akajya amujyana koga, amufasha kota akazuba n’ibindi. Bituma bagira ubucuti bukomeye bwavuyemo itsinda.

Aba basore batangije itsinda ryabo ku wa 20 Ukuboza 2015. Rwogera Christian avuga ko babanje kugongwa n’ubushobozi ndetse umuziki wabo ukaza kugenda gake. Mu 2016 bakoze indirimbo zitandukanye zirimo iyitwa ‘Visa’ bakoranye na Umutare Gaby.

Ubu barimo gukorana na Kemilson Entertainment isanzwemo Ish Kevin ndetse bakaba bavuga ko ari amahirwe meza bafite azabafasha kongera kwereka Abanyarwanda umuziki w’amatsinda cyane ko amenshi yasenyutse.

Rwogera ati “Icyo nabwira abantu ni uko batwitega. Tugiye gukora cyane kugira ngo tuzibe icyuho cy’uko nta matsinda akigaragara cyane mu muziki.”

Jacques Kibamba yavukiye mu Karere ka Gasabo tariki 18 Kanama 1997. Avuka kuri Munyamahoro Jonas na Nyirarukundo Jeannette.

Naho mugenzi we Rwogera Christian yaboneye izuba mu Karere ka Gasabo tariki 1 Kanama 1997; ni mwene Rwakigarama Denis na Uwimana Donatille.

Mbere yo gukora itsinda bari bafite indirimbo 180 zimwe baziha abahanzi bakomeye nk’impano, izindi zihera mu bitabo kubera ubushobozi buke. Indirimbo banditse bakaziha abandi bahanzi zirimo ‘Nkeneye Umukunzi’ ya Princess Priscilla, ‘Igikara’ ya Doctor Claude, ‘Musimbure’ ya Peace Jolis n’izindi.

-  Reba zimwe mu ndirimbo z’aba bahanzi

Kibamba Jacques na Rwogera Christian bahuriye mu itsinda rishya bise New Voice

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .