Bahati Grace yavuze icyamukuruye ku musore basigaye bakundana n’impamvu atahuje na K8 Kavuyo

Yanditswe na Uwiduhaye Theos
Kuya 24 Mutarama 2021 saa 03:34
Yasuwe :
0 0

Bahati Grace wabaye Nyampinga w’u Rwanda mu 2009, yavuze ibyo yakundiye umusore yasimbuje K8 Kavuyo witwa Pacy anahishura ko K8 Kavuyo batari bahuje icyerekezo.

Bahati Grace yabivuze mu kiganiro yagiranye n’umunyamakuru Ally Soudy ku rubuga rwa Instagram, aho yahishuye byinshi byihariye ku buzima bwe kuva mu bwana kugeza abaye nyampinga w’u Rwanda.

Bahati yagiye muri Amerika kuwa 22 Kamena 2011, akigerayo abanza kwisuganya ngo ashakishe uko yabaho n’uko yakwiga. Muri uko kwishakisha yatangiye gushaka ubuzima aho yabaye umwarimu mu irerero ry’abana.

Muri Nyakanga 2012 yibarutse umwana ubuzima burushaho kurura nyuma aza kubona imiryango ibiri imufasha.

Ati “Imana yampaye imiryango ibiri Maxwells na Bars. Ndabashimira byatangiye ari ubushuti nyuma biza kuba umuryango. Nterwa ishema no kubita umuryango n’ubwo dufite uruhu rutandukanye, bambereye abantu beza.”

Yavuze ko nyuma yaje kubona ibyangombwa bimwemerera kwiga muri Amerika no kuhatura, nyuma akaza no kugenda abona uko yiga kaminuza byoroshye ubuzima bugakomeza kugenda buba bwiza.

Kugira umwana avuga ko byamuteye imbaraga zo gukora cyane kuko buri gihe yabyukaga saa kumi n’imwe za mu gitondo, kugira ngo abone uko amujyana kwiga.

Ati “Kuba mfite umwana byanteye imbaraga. Ntabwo bwari ubuzima bworoshye. Nabanye n’umwana wanjye ndamurera. Naje kugirirwa ubuntu Imana inyegereza abandi babyeyi n’ubwo abandi bari bari mu Rwanda, impa umuryango w’abazungu. Narakoraga abo babyeyi bakamfasha. Iyo ukora ikintu utari wenyine bigufasha kutiheba.”

Yemeza ko kimwe mu bintu yahoze atekereza kuva akiri muto ari ukuzarera umwana we neza kandi akamuha uburere bukwiriye, ubu akaba yishimira ko aho bigeze abona ko yabigezeho.

Ati “Abazi umwana wanjye babona ko afite urukundo n’ubwo yaruhawe n’umubyeyi umwe. Nakuze mfite ishyaka ryo kumva ko ningira umwana nzagerageza kumugarariza urukundo no kumuha ibyo akeneye byose. Maze kumubona byansabye ko nigomwa byinshi ariko ntangiye kubona umusaruro wabyo.”

Ubu Bahati n’umukunzi we baba muri Amerika, ariko avuga ko bashobora no kuzaba muri Canada gusa bikazaterwa n’aho bombi bazaba bafite akazi keza.

Yabajijwe niba ibihe bisubiye inyuma bitewe n’inzira y’urukundo rwe n’umuraperi Muhire William uzwi nka ‘K8 Kavuyo’ yakongera gukundana na we, undi mu gusubiza ati “ Ntabwo nabyemera kuko ibyerekezo byacu ntibyaba bihuye.”

Yavuze ko igihe bakundanaga buri wese yari afite icyerekezo cye ari nacyo cyatumye batandukana.

Yabajijwe icyo yakundiye umusore bari kumwe ubu, avuga ko umukunzi we ikintu cya mbere yakumundiye ari uko icyo avuze ari cyo akora, akaba ari umusore w’igihagararo kandi umukundira uko ari kose.

Ibindi amukundira ngo harimo icyerekezo afite, imyizerere ye yo kwemera Imana, kuba atajagaraye, uko abanye n’abantu , imyitwarire ye n’ibindi.

Pacy wasimbuye K8 Kavuyo mu mutima wa Bahati Grace, ubusanzwe aba muri Canada ariko ajya asura uwo yihebeye muri Leta zunze Ubumwe za Amerika aho akorera ibijyanye n’ubuvuzi. Uwo musore afite imyaka 31.

Mu ntangiro za 2019 nibwo Bahati yashimangiye ko ari mu bakobwa bishimye maze ashyira hanze ifoto ari kumwe n’uyu musore ashimangira ko ari we watumye umwaka wa 2018 umubera akataraboneka.

Bahati yabanje gukundana na K8 Kavuyo, ndetse mu 2012 bibarutse imfura yabo bise Muhire Ethan. Nyuma y’igihe gito bahise batandukana buri wese aca ukwe.

K8 Kavuyo na we mu 2015 yaje kubyarana n’undi mukobwa witwa Umutoni Cynthia bari no mu mishanga yo kuzarwubakana.

Bahati Grace n'umusore yasimbuje K8 Kavuyo
Bahati na Pacy bamaze igihe mu buryohe bw'urukundo
Bahati yavuze ko Pacy yamukundiye imico ye n'uburyo yoyoroshya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .