Baba mu ijuru rito! Urukundo rwa James na Daniella bakundana, bakanaririmbana (Video)

Yanditswe na Uwiduhaye Theos
Kuya 20 Ugushyingo 2019 saa 05:34
Yasuwe :
0 0

Nta gihe kinini gishize mu matwi ya benshi bakunda ibihangano byo kuramya no guhimbaza Imana batangiye kumva ijwi rya James na Daniella bihebeye indirimbo z’agakiza.

Indirimbo zabo zisize amavuta kuko ‘Mpa Amavuta’ cyangwa se ‘Nkoresha’ ya James Rugarama na Daniella Mukiza arizo ziganje mu materaniro yo kuramya no guhimbaza Imana.

Benshi birahira indirimbo zabo bakemeza ko zisize amavuta y’Imana kandi ko zinyura imitima y’ibikange ikabasha gushenjagurikira imbere y’uwiteka.

Uramutse ibi byose utabyemera wanyarukira kuri Youtube aho amashusho y’indirimbo bakoze bwa mbere bise ‘Mpa Amavuta’ mu gihe cy’amezi atandatu gusa imaze kuri uru rubuga imaze kurebwa n’abasaga ibihumbi 900. Ibintu bidapfa gukorwa n’umuhanzi uwo ariwe wese mu Rwanda.

Igitangaje ni uko iyi couple ifitanye abana babiri, ari imwe mu yakoze umuziki ukabasha kugera ku kigero nk’icyo uyu munsi bariho. Bavuga ko kuba indirimbo zabo ziri kwamamara cyane mu buryo bwihuse ari ubushake bw’Imana ndetse n’amasengesho yabo adasiba.

IGIHE yabegereye ibaganiriza byinshi abihebeye ibihangano byabo bashobora kuba babizaho.

Babanye igihe kinini babitsanya amabanga, nyuma bafata umwanzuro wo kugirana umubano w’urukundo no kuririmbana nka Couple

Aba bombi iyo bavuga amateka yabo bavuga ko batangiye baririmbana ariko uyu mwaka bakaza gufata umwanzuro wo gutangira kuririmba nyuma y’uko baririmbiraga mu rugo bakumva ni byiza cyane.

James ati “Twararirimbaga tutarabana ubundi tugahurira mu matsinda atandukanye. Tumaze kubana dutangira kujya turirimbana ariko bitari mu buryo bweruye. Uyu mwaka nibwo nk’itsinda ryacu nibwo twagiye muri studio dukora indirimbo ya mbere twise ‘Mpa Amavuta’.”

Daniella avuga ko urukundo rwabo rwatangiye gutumba mu 2008 cyangwa 2009, mu 2012 bajya kwiga muri Uganda, Umugabo yiga iby’ububanyi n’amahanga mu gihe umugore icyo gihe yigaga ibaruramari.

Ati “Twamenyanye kera kuko kuva kera, twari abaturanyi mu Rwanda Kimironko nyuma tugiye kwiga muri Uganda nibwo twaje kubana. Mu 2008 cyangwa 2009 nibwo twamenyanye noneho mu 2012 tujya kwiga kaminuza, tuyirangiza mu 2015 aba ari nabwo tuba umuryango.”

Ku ndirimbo bise ‘Mpa Amavuta’, James avuga ko yayihimbye ari mu mwuka wo gusaba Imana amavuta kuko yabonaga mu rugo iwe akenewe ariko na none no mu bandi bantu ariko bimeze.

Ati “Ubuzima bwacu bushingiye ku Mana nari namaze gusoma Matayo 25 havuga ku mugani w’abanyabwenge batanu n’abandi batanu b’abapfu. Byanteye ubwoba nibwo twicaye turayitekereza twumva ko tugomba gusaba amavuta, turayasaba mu rugo biba ngombwa ko twumva ko twabisangiza abandi kuko abantu bakeneye amavuta ariko yari indirimbo yo mu rugo.”

Kuba yarakunzwe Daniella avuga atari ibintu batekerezaga ahubwo ari ubuntu bw’Imana ndetse byanabatunguye cyane mu buryo bukomeye.

Ati “Tujya muri Studio ntabwo twumvaga ko izagera ku rugero yagezeho igakundwaho ahubwo icyo twumvaga dushyize imbere ni uko twari dutanze ubutumwa buri mu mitima yacu nta kindi. Ni umugabo wanjye akenshi wandika ni nawe wayanditse.”

Naho “Nkoresha” yo James avuga ko yayanditse mu 2016 ari kurwana no kumenya icyo Imana yamuhamagariye ndetse ashaka no guha abantu ubutumwa bwo kwegera mu maso h’Imana ikababwira umuhamagaro wabo.

Ati “Niyo mpamvu twasabye Imana kudukoresha icyo yaduhamagariye. Twayijyanye muri studio kugira ngo abantu batekereze kuri icyo kintu.”

Ubu aba bombi bari gutegura album nshya izajya hanze mu minsi iri imbere izaba igizwe n’indirimbo umunani.

Babayeho mu ijuru rito!

James avuga ko ajya guhitamo Daniella ikintu yamukundiye ari uko yari umukobwa w’umutima kandi ukunda Imana cyane.

Ati “Twari inshuti cyane ntabwo navuga namukundiye iki ariko yari umukobwa ukunda Imana, kandi burya hari n’ukuntu uhuza n’umuntu natwe twarahuye biba mahwi. Byahereye cyane ko yakundaga Imana ari umuririmbyi mwiza ugasanga duhuza ibintu byose.”

Daniella we yemeza ko umugabo yari umuntu w’inyangamugayo mu buryo bukomeye ku buryo ari ikintu ashimira Imana, ikindi akaba ari umuntu uvuga biri ngombwa.

Ati “Ni inyangangamugayo ni cyo kintu cya mbere numva kandi nshimira Imana. Yubaha Imana kandi aratuje, avuga amagambo make kandi mazima ikindi twari inshuti za hafi hafi cyane ku buryo ntabona uko nabisobanura.”

Anemeza ko kumusaba ko bakundana bitamugoye cyane ko akenshi babaga bari kumwe cyane ndetse babitsanya amabanga. Ubu bafite abana babiri umuhungu n’umukobwa.

Ati “Hari igihe abana bacu babyuka mu gitondo cya kare bakaririmba indirimbo zacu uko zikurikirana bikadushimisha cyane.”

Kuba ari couple ikora umurimo w’Imana wo kuririmba, bavuga ko ari ikintu kibafasha kuko kuba bafite icyerekezo kimwe ari ikintu gihambaye ama-couple yose yakabaye yitaho cyane.

James ati “Na bibiliya irabivuga ngo abantu bahuje umutima ari babiri Imana iba iri kumwe nabo. N’indi miryango izi ko hari ikintu bahuje nabagira y’uko bagikomeza.”

Daniella we avuga ko umuryango ukorera Imana hamwe ntaho uba uhuriye na wundi usanga buri umwe aba muri ibi undi mu bindi.

Ati “ Umuryango ukorera Imana hamwe ntabwo uba umeze nka wa wundi uba utatanye, ariko twebwe imbaraga zacu ziba ziri hamwe ibyo dukora biri hamwe, aho tuba turi kumwe […] turi mu cyerekezo kimwe. Biradufasha kuruta ba bandi usanga umwe ari mu muziki undi ari mu bindi.”

Reba indirimbo ya James & Daniella baherutse gushyira hanze bise ‘Nkoresha’

Mpa amavuta, indirimbo ya James & Daniella

Iri tsinda rimaze kwamamara cyane mu muziki wo kuramya Imana ku ndirimbo ebyiri gusa rimaze gushyira hanze
James Daniella bagezweho cyane mu muziki wo kuramya Imana mu Rwanda
Mu 2015 nibwo aba bombi barushinze batangira urugendo rwo kubana akaramata nk'umugabo n'umugore

Video: Hakizimana Olivier Souke


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza