Atome agiye kwereka abanyeshuri ibyabereye mu nkambi z’Abayahudi

Yanditswe na Munyengabe Murungi Sabin
Kuya 23 Mata 2018 saa 05:27
Yasuwe :
0 0

Ntarindwa Diogène , umwe mu bahanga mu gucisha ubutumwa mu mikino y’ikinamico, agiye kwerekana ibikorwa bibi byabereye mu nkambi z’Abayahudi mu gihe cy’intambara ya kabiri y’isi.

Uyu mukino wiswe ’L’espèce humaine’ ushingiye ku gitabo cyanditswe n’Umufaransa Robert Antelme ufite ubuhamya bukomeye by’ibyakorewe Abayahudi. Uyu Robert Antelme yarwanyije amatwara ya Hitler n’abari bamushyigikiye mu gutsemba Abayahudi.

Atome usanzwe yitwa Ntarindwa Diogène yari aherutse kwerekana uyu mukino muri Kaminuza Yigenga ya Kigali [ULK], yawukinnye afatanyije n’undi mukinnyi w’i Burayi witwa Maylis Bouffartigues na Yarol Stubert watunganyaga ibyerekeye ubuhanga bw’ibyuma.

Mu kiganiro na IGIHE, Ntarindwa Diogène yavuze ko nyuma yo kwereka uyu mukino abiga muri ULK agiye gukurikizaho n’abiga muri Kaminuza y’u Rwanda ishami rya Huye.

Yavuze ko yahisemo kwerekana uyu mukino mu bigo by’amashuri mu rwego rwo kumenyereza abakibyiruka gahunda yo ‘gutambutsa ubutumwa biciye mu buhanzi’ ari nabyo na we yarereshejwe akiri ku ntebe y’ishuri.

Yagize ati “Nashakatse kubijyana mu mashuri, kuko bikenewe , natwe twiga muri kaminuza twahabwaga ibyo kandi ku buntu. Ubu nashatse kubasanga aho bari ikindi kandi bimenyerwe kuko muri za kaminuza hajya habamo ibihe nk’ibi byo gutarama ariko hagamijwe gutanga ubutumwa.”

Atome yavuze ko kwerekana uyu mukino ’L’espèce humaine’[Inyoko muntu] muri ibi bihe u Rwanda rwibuka abazize Jenoside abona ari umwanya mwiza kuko “amateka y’ibyabaye ku Bayahudi ajya gusa n’aya Jenoside yakorewe Abatutsi.”

L’espèce humaine’, uzagaragaza mu buryo bw’ikinamico ubwicanyi, iyicarubozo, itoteza n’ibindi byose byakorewe Abayahudi mu nkambi zabo. Umaze igihe kinini ukinwa ndetse werekanwe mu mijyi itandukanye y’u Bufaransa na no muri Pologne.

Kuri uyu wa Kabiri tariki ya 24 Mata 2018, Atome na Maylis Bouffartigues bazawerekana kuri Marasa Umubano Hotel ku Kacyiru guhera saa moya z’ijoro aho kwinjira bizaba ari amafaranga ibihumbi bitanu[5,000frw].

Nyuma y’uyu mukino hateguwe ikiganiro mpaka kizayoborwa na Olivier Lecour, umuhanga muri politike mpuzamahanga.

Atome ari gukora urugendo ruzenguruka amashuri yerekana umukino ugaruka ku byabereye mu nkambi z’Abayahudi

Ku wa Kane tariki ya 26 Mata 2018, Atome mu Karere ka Huye muri Kaminuza y’u Rwanda aho kwinjira muri Auditorium bizaba ari Ubuntu. Nyuma y’uyu mukino nabwo hazaba ikiganiro mpaka kizayoborwa na Olivier Lecour .

Ku wa Gatanu tariki ya 27 Mata 2018, Atome azereka abanyeshuri biga mu Ishami rya Huye umukino witwa ‘Carte d’Identite’ umaze imyaka icumi irenga ukozwe; uyu na wo ugaruka ku mateka ya Jenoside yakorewe Abatutsi mu Rwanda.

Atome aheruka kuwerekana muri ULK i Kigali
Ntarindwa Diogène azafaatnya n’undi mukinnyi ukomeye i Burayi witwa Maylis Bouffartigues

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza