Ashobora guterura ibiro 170! Imibereho y’abasore barindira umutekano abahanzi mu bitaramo mu Rwanda (Video)

Yanditswe na Uwiduhaye Theos
Kuya 13 Ugushyingo 2019 saa 06:53
Yasuwe :
0 0

Niba ukunda kwitabira ibitaramo bitandukanye mu Rwanda cyangwa se ibindi bikorwa birimo ibyamamare, nta kabuza uzi abasore n’inkumi b’ibigango bakunze kuba bari hafi barindira abantu umutekano.

Itsinda ry’aba bazwi cyane nka B-KGL ryatangijwe mu 2014 n’uwitwa Kanimba Bosco uzwi cyane ku izina Boss. Uyu musore w’imyaka 31 yavukiye mu karere ka Nyarugenge mu Mujyi wa Kigali.

Mu mashuri yisumbuye muri IFAK aho yarangirije mu 2007 yakinaga umupira w’amaguru. Nyuma mu 2011 hatangiye irushanwa rya Primus Guma Guma Super Star mu 2011 aba umwe mu batangiranye naryo arindira umutekano abahanzi, niwe wari ubayoboye atangira gukora imyitozo ngororamubiri gutyo aza no kubigira umwuga ubu umutunze.

Kuri ubu akora imyitozo ngororamubira inshuro enye mu cyumweru akaruhuka gatatu ndetse ntakozwa ikiyobyabwenge icyo aricyo cyose, ahubwo agerageza kurya ibifite intungamubiri kugira ngo akomeze gukomera.

Ashobora guterura ibiro 170 nta muntu umufashije akabishyira ku ntebe akongera akabyihereza. Aganira na IGIHE yavuze ko iyi sosiyete irindira umutekano abahanzi igizwe n’abakobwa bane n’abasore 26.

Ngo barateganya no gutangiza kompanyi nshya ndetse bashaka kuzerekana umukino wa Boxing mu gihe bazaba bayitangiza bakereka abantu ko muri bo hari indi mikino bashobora gukina.

Kanimba avuga ko igitekerezo cyo gushinga B-KGL ngo cyaturutse ku kavuyo kari mu bitaramo bitandukanye.

Ati “Primus Guma Guma Super Star ya mbere iba ntabwo twari twakabaye sosiyete irindira umutekano abahanzi, baraguhamagaraga ugahamagara abantu ku giti cyabo noneho nyuma hazamo ibintu byo kwamburwa mu bikorwa bitari PGGSS, ikindi cya kabiri wowe wazanye abantu ugasanga hari abibye mu gitaramo ari uwakuzanye nawe ugasanga murajagaraye.”

Ngo nibwo batekereje gushinga kompanyi irindira umutekano abahanzi kandi kuri uyu munsi umusaruro barawubonye, kuko babikoze bashaka kwihesha agaciro mu kazi kabo.

Bimwe mu byo bagenderaho bajya kwakira umuntu ushaka kubinjiramo ni ukuba ushaka kwinjira afite amashuri yisumbuye, byaba akarusho akaba yarize na Kaminuza, atarafunzwe amezi atatu (utaramanuwe muri gereza runaka iyo wagiyeyo niyo byaba ukwezi kumwe ntibakwakira) kandi udakoresha ibiyobyabwenge.

Kanimba akomeza avuga ko iyo umuntu amaze kwandika asaba kwinjira bafata ibyumweru bibiri byo kumutekerezaho agatanga 50 000 Frw. Ariko ku bakobwa bo bashyiriweho uburyo bworoshye bwo kwinjira.

Avuga ko abakobwa bakiri bake cyane kuko benshi bitinya cyangwa se bakumva aka kazi badakwiriye kugakora.

Ati “Abakobwa baracyafite amasoni kandi Isi aho igeze ugomba kwita ku cyo winjiza. Abakobwa ntirababyibonamo. Abo muri B-KGL hari abamazemo igihe nka Mummy amaze igihe kinini. Abakobwa icyo bakora ni ugusaka bagenzi babo, ku mukobwa ntibisaba kuba ari munini kandi n’akazi ko kurinda umutekano ubu ntabwo kagishingiye ku mbaraga ahubwo ni ugukoresha ubwenge.”

Mu gitaramo cyo gusoza iserukiramuco rya Iwacu Muzika cyabaye ku wa 17 Kanama 2019, abasore B-KGL bambuwe imyenda bari bambaye na Polisi y’u Rwanda ndetse basohorwa mu gitaramo basabwa kuyihindura.

Icyo gihe bari bambaye inkweto zizamuye [boots], ipantalo, umupira n’ijire bimeze nk’iby’abashinzwe umutekano basanzwe byose biri mu ibara ry’umukara.

Bari bambaye kandi ibintu birinda imirundi n’amaboko bikunze kwambarwa n’abatwara moto, ibiganza birindishijwe uturinda ntoki tw’umukara.

Ubwo igitaramo cyari kigezemo hagati ahagana saa moya, Polisi y’u Rwanda yaje gusaba aba basore guhindura imyambaro kuko byashoboraga gutuma abantu babitiranya.

Umuyobozi w’aba basore yavuze ko ikintu cyabiteye ari uko bari batarasobanukirwa neza.

Ati “Ikibazo cy’imyenda cyarabaye ntabwo nari ndi mu Rwanda. Naraje ndabisobanura kuko ninjye washinze kompanyi ni nanjye waguze imyenda kandi uzi aho yaturutse. Twambaraga amapantalo y’umukara n’amashati y’umukara, ariko aho mba i Dubai twe twambara kuriya, njye numvaga ko abarinda umutekano bose ku Isi bashobora kwambara umukara […] Mu kohereza iriya myambaro ntabwo byabaye ubugome ahubwo ni ubumenyi buke bwo kutamenya niba tutayemerewe.”

Avuga ko hari igihe bigeze kujya gushaka imyambaro muri Utexrwa bakaza kuyibima kubera ko wajyaga kumera nk’uwa polisi, ariko kuri ubu nyuma yo kubisabwa na Polisi y’u Rwanda ubu basigaye Bambara imyambaro ya kaki.

Anavuga ko kuri ubu Polisi iri gutegura kubakoresha amahugurwa kugira ngo babashe gukomeza gukora akazi kabo neza kuko abenshi nta handi babyize.

Ati “Kuri ubu ikintu dukora iyo tugiye mu kazi telefoni igomba kuvaho kuko tuba dufite ibyombo, icya kabiri ugomba kuba uzi gusaka, kuvuga ariko na none ukirinda guterana amagambo n’umukiliya kuko ariwe mukoresha uba ufite. Amagambo make ibikorwa byinshi. Ndetse, kuri ubu Polisi y’u Rwanda iri gutegura kuduha amahugurwa.”

B Kgl imaze guhamya ibirindiro mu masosiyete arindira umutekano ibyamamare
Iyi myambaro y'aba basore basabwe kuyihindura ndetse ubu basigaye bambara isa na kaki
Kanimba Bosco uzwi cyane nka Boss watangije B KGL
Kanimba Boss uri iburyo wambaye ikote niwe watangije Bodguard Kigali izwi nka B KGL, aha bari mu bikorwa byo gufasha abamugariye ku rugamba
Aba basore bakunze kwifashishwa mu bikorwa bitandukanye byo kurinda umutekano

Video: Hakizimana Olivier Souke


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza