Kwamamaza

Angel Uwamahoro yinjiye muri Hip Hop yatitiza benshi

Yanditswe kuya 28-10-2016 saa 10:17' na Munyengabe Murungi Sabin


Uwamahoro Angel, umunyempano mu mivugo no gukina ikinamico, ubuhanzi bwe n’impano yifitemo bishimwa na benshi ndetse hejuru ya byose bimaze kumugeza ku iterambere ritajegajega.

Uretse ubuhanzi bw’imivugo iryohera benshi asanzwe azwimo, Angel Uwamahoro ni umwe mu bakobwa bafite ubuhanga bwihariye mu muziki by’umwihariko mu njyana ya Hip Hop igezweho. Iyo aririmbye, wumva uburyohe bwihariye mu rukurikirane n’injyana aha amagambo yandika ku buryo bigoye kumva hari uwanenze igihangano yaririmbyemo.

Uwamahoro ni Umunyarwandakazi w’imyaka 25 y’amavuko. Yavukiye mu Rwanda aranahakurira gusa kuri ubu atuye muri Leta Zunze Ubumwe za Amerika aho yiga muri Kaminuza ya Fordham University mu Mujyi wa New York City.

Imivugo ye iryohera benshi…

Uyu mukobwa umaze kwigarurira imitima ya benshi bakunda imivugo yamenyekanye cyane mu mivugo nkasobanuye ‘Rwanda is not Hotel Rwanda’, ‘Strength in the Struggle’ n’indi myinshi igaragaza ishusho nyayo y’u Rwanda nyuma ya Jenoside yo mu 1994.

Uwamahoro yavuze ko impano y’ubuhanzi bw’imivugo ayikoresha mu kugaragariza amahanga ibyiza u Rwanda rwagezeho nyuma ya Jenoside yakorewe Abatutsi mu 1994.

Muri 2012 yagiye mu Bubiligi gukina umukino itwa «Le bruit des os qui craquent » aza no kujya kuwukina muri Congo-Kinshasa, i Bujumbura mu Burundi no mu Rwanda. Yakiniye muri Leta zitandukanye zigize USA no mu maserukiramuco atandukanye.

Mu mwaka wa 2013 yakiriwe n’uwari Ambasaderi w’u Rwanda mu Bubiligi Robert Masozera, mu rwego rwo kumushimira ubuhanga, guteza imbere umuco mu rwego rw’amahanga nk’Umunyarwanda uhesha isura nziza igihugu.

Ibirori byinshi bihuza Abanyarwanda batuye mu mahanga by’umwihariko ibya Rwanda Day, Angel Uwamahoro ntajya asigara inyuma. Iteka uyu mukobwa aba ari imbere mu bahanzi bitabazwa kuko impano ye imaze kumugaragaza nk’umuhanga ufite ubumenyi bwihariye mu guhimba imivugo yuzuyemo ubutumwa.

Ntibyoroshye kubona umuntu wateze amatwi umuvugo wa Angel Uwamahoro ngo asoze atamukomeye mu mashyi. Uyu muhanzi agira umwihariko ukomeye mu gutondeka amagambo no kumenya gutoranya aryohera abantu mu buhanga budafitwe na bose.

Yavuze ko inganzo ye mu guhanga imivugo ayikomora ku Banyarwanda itewe n’uburyo babana, ishyaka bafite ryo gutera imbere ndetse no gukunda igihugu bibaranga.

Angel mu nzira zinjira muri Hip Hop…

Angel Uwamahoro amaze kumvikana mu ndirimbo ebyiri aririmba mu buryo buganisha ku mwimerere w’injyana ya Hip Hop igezweho. Yaririmbye mu yitwa “Intashyo”, yahuriyemo n’umuraperi Jay Pac, Ju na Noah ndetse muri benshi bayikunze ahanini bashimye uburyo Angel Uwamahoro aririmbamo.

Aheruka gufatanya na Ruremire Focus mu ndirimbo yitwa ‘Umuco Wacu’ ivugira abakobwa bakorerwa ihohoterwa rishingiye ku gitsina n’abakoresha babo. Yavuze ko ibyo gukora ubuhanzi bw’indirimbo yabitangiye akiri muto aza kubihagarika agejeje imyaka 14.

Yagize ati “Ntabwo abantu banzi mu muziki, nakinaga cyane ikinamico, imivugo n’izindi ngeri z’ubuhanzi ariko burya kuva nkiri muto nakundaga umuziki ngifite nk’imyaka irindwi kugeza kuri 14 narabikundaga cyane, nakundaga kuba ndirimba.”

Yongeraho ati “Nyuma naje kuva mu byo kuririmba nshyira ingufu cyane mu byo gukina ikinamico no guhanga imivugo […] Umuziki ndi kuwukora nk’impano, ndashaka gukoresha ingufu zanjye mu buhanzi bwose uko mbishoboye. Ndi kugerageza kugaruka mu muziki, hari indi mishinga mfite nzashyira hanze uko iminsi izagenda ishira.”

Uwamahoro yavuze ko nubwo atari amenyerewe mu muziki ariko ngo ni impano asanzwe yifitemo bityo ko mu gihe kiri imbere agiye kujya asohora indirimbo ze bwite n’izindi azajya ahuriramo n’abandi bahanzi.

Ruremire waririmbanye na Angel, yavuze ko yamusanganye ubuhanga bwihariye aho yagize ati “Angel naririmbanye na we, yarantunguye cyane, ntabwo nari nzi ko ari umuhanga kuri ruriya rwego. Ni umuhanga, azi kwandika.”

Producer Bob watunganyije indirimbo ya Angel Uwamahoro na Ruremire, yabwiye IGIHE ko uyu mukobwa aramutse yinjiye mu muziki akabikora nk’umwuga nk’uko ahimba imivugo ngo ni bake bamukurikira.

Yagize ati “Icya mbere namubonyeho azi ibintu akora, azi kwandika amagambo afite ubutumwa kandi ajyanye. Muri studio ntagorana na gato, ni wa muntu ujya kuri micro akaririmba akavaho ubona nta cyamugoye."

"Ikindi afite umwihariko we, atandukanye n’abandi baraperi, we asanzwe akora imivugo ariko yabikoze mu buryo bwa Rap wumva ko birimo ubuhanga cyane, aje mu muziki yakora ibintu bitangaje. Ntawe nabagereranya burya buri wese aba afite umwihariko we.”

Angel Uwamahoro na Amb. Masozera
Ubwo yakirwaga na Amb. Masozera, ari kumwe nabo bakinananaga n'umuyobozi wa Théatre de Poche de Bxl , Roland Mahouden

Umwe mu mivugo ya Angel Uwamahoro

Angel afite ubuhanga bwihariye mu muziki


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved