Amabanga y’urukundo rwe, indirimbo z’amateka, Clement na Knowless: Ikiganiro na Fayçal wiyise Kode (Video)

Yanditswe na Muhumuza Simeon, Uwiduhaye Theos
Kuya 16 Kanama 2019 saa 10:51
Yasuwe :
0 0

Umuhanzi Ngeruka Fayçal wahisemo kwiyita Kode ukorera umuziki mu Bubiligi, amaze iminsi mu Rwanda aho yaje mu biruhuko, yahishuye byinshi ku rukundo rwe na Ngenzi Mucyo Gisèle bamaranye imyaka 15.

Ngeruka Fayçal ni umwe mu bahanzi bamamaye cyane mu Rwanda mu myaka irenga icumi ishize.

Yakoze indirimbo nyinshi zitandukanye zatumye ubuhanga bwe bushimwa na benshi ndetse zirakundwa ku buryo buhambaye zinatuma anitabira amarushanwa atandukanye mpuzamahanga arimo ‘Imagine Afrika’ na ‘Idols 2007’.

Yavutse tariki 8 Nyakanga 1981 ahitwa Beni muri Repubulika Iharanira Demokarasi ya Congo. Ni imfura mu muryango w’abana batatu barimo abakobwa babiri bavukana kuri nyina kuko se yari afite abandi bagore babiri.

Yarangiye amashuri yisumbuye kuri APACE nyuma yiga muri ULK Gisenyi, mu 2011 aza kujya kuba mu Bubiligi.

Urukumbuzi rwari rwose

Uyu muhanzi yari amaze imyaka itatu adakandagira mu Rwanda, yavuze ko ubwo yarugarukagamo byinshi byamutunguye birimo imihanda mishya iri muri Kigali ndetse rimwe na rimwe avuga akihagera yabanje kujya ayoba.

Ati “Nshuti yanjye ikintu cya mbere cyantunguye ni imihanda. Yarahindutse cyane, hari n’ubwo natakaye. Nahamagaye umusore w’inshuti yanjye niwe navugishije aranyobora.”

Yabajijwe niba mu Rwanda hari ahantu yasohokeye hihariye avuga ko ntaho ariko ngo yagize amahirwe yo guca i Musanze agiye gusura abo mu muryango na Rubavu yagiye agiye gutembera no gusura nyirakuru wamureze akiri umwana. Mu byo kurya, yavuze ko yageze mu Rwanda akumbuye imineke ya kamaramasenge.

Impamvu yahinduye izina

Abamumenye cyane mu ndirimbo zirimo ‘Impeta’, ‘Igikomere’, ‘Ese Uzabyihanganira’ n’izindi nyinshi bamuzi nka Ngeruka Fayçal, ariko nyuma yo kujya mu Bubiligi yahise ahundura izina yiyita Kode.

Avuga ko yahinduye izina kubera ko byagoranaga kumutandukanya n’abandi benshi bitiranwa akagirwa inama n’ababaye abajyanama akigera hanze y’u Rwanda yo kurihindura.

Ati “Nagiye mu Bubiligi mu 2011 nza guhura n’abajyanama bitwa ‘Hakuza’ baje kungira inama yo kwiyita Kode kuko ba Fayçal ari benshi ku Isi ku buryo wajyaga kuri internet waryandikamo kumbona bikagorana cyane ko mu bihugu by’abarabu ari izina rusange.”

“Kungeraho byansabaga kongeraho Rwanda, Rwanda ni igihugu nkunda ariko si izina ryanjye […] Baravuze bati ni ngombwa ko tubona izina rusange ariko ridahinduka abantu bose bazumva. Byarangoye guhindura izina nakoreshaga ritambangamiye, ku nyungu z’akazi turavuga tuti reka tubikore.”

Uretse umuziki ni n’umukinnyi wa filime gusa avuga ko azava mu Rwanda hari imishinga ahakoreye kuko yavuganaga na Danny Beats, Barick Music n’abandi.

Fayçal wahinduye izina akiyita Kode, yavuze ko mu Bubiligi usibye muzika akina na filimi

Inkuru itangaje y’urukundo rwa Fayçal n’umugore

Uyu muhanzi kuri ubu abarizwa mu Bubiligi, aganira na IGIHE yavuze ko mu 2000 yigaga mu mwaka wa gatanu, nibwo yamenyanye n’umukobwa w’igitego icyo gihe we akaba yarigaga mu wa gatatu. Baje gukundana bikomeye, ku buryo n’ubu bakiri kumwe.

Ati “Twamenyaniye mu mashuri yisumbuye. Njye reka ngire abantu inama muzajye mujya mu mashuri yisumbuye nibwo muzabona abantu bazima gusa ariko navuga ko ari amahirwe. Kabusunzu Apace nicyo gihe abantu nka ba Aline Gahongayire bari bariyo na Ishimwe Clement, Tonzi n’umugabo we Alpha.”

“Ikintu cya mbere cyaduhuje ni ururimi, kubera kuba ntaravukiye mu Rwanda ntabwo navugaga ikinyarwanda neza. N’ubu hari aho ngera kigakama. Yari mu Bubiligi anazi Igifaransa cyiza pe. Nagize amahirwe yo gusanga yujuje ubwenge n’ubwiza mpita mfatiraho.”

Akomeza yemeza ko mu rukundo rwe hari aho yahuraga n’uburibwe kubera ubukene akajya ajya kumusura afite amafaranga abarika rimwe na rimwe agataha n’amaguru ubundi Mucyo akamugoboka.

Ati “Sinzi aho nakuraga igiceri nkajya kumusura ariko mu gutaha nkabura amafaranga yo kuntahana. Igihe cyo gutaha cyarageraga akampa nk’ijana cyangwa magana abiri, ntabwo anzi ndi umu-star , yari umukire cyane kundusha.”

Ubu aba bombi bamaranye imyaka 16 bafitanye abana babiri.

Indirimbo yanditse zijyanye n’ubuzima bwe

Kode avuga ko mu ndirimbo nyinshi yanditse izagarukaga ku buzima bwe ari ebyiri gusa zirimo ‘Uranzi’ yandikiye umugore we mu buryo bwo kumuvuga no kumushimira muri rusange, iya kabiri ikaba ‘Cherie’ nayo yahimbiye uyu mugore we ariko n’abandi bose.

Avuga ku yitwa Cherie, yagize ati “Iyi yo turi kuyandika hari inshuti yanjye yitwa ‘Innocent’ tumwita Paccy urebye ukuntu abanye n’umugore we ni byiza cyane. Ni couple y’intangarugero. Ni bamwe mu bantu bampaye ikiraka nkigera mu Bubiligi.”

Arongera ati “Uranzi yo nayikoranye na Clement muri Kina Music i Nyakabanda muri studio ya mbere yakoreragamo iwabo mu rugo twari turi mu PGGSS ya mbere, abantu bose bari barimo gusohora indirimbo cyari igihe cyo gufatirana ubwo buryo abantu bavuga ngo iri rushanwa riratangiye mbese twese ntabwo twari twakamenye uko bizakorwa nza kugira umuhamagaro w’iyi ndirimbo ubwo nari ndi mu gitaramo cy’iri rushanwa cyabereye i Cyangugu.”

“Bwari ubwa mbere mpageze nyuma nza kubona abantu baririmba ngo nshuti, nyuma hari umugore waje w’umufana arambwira ati ariko wazakoze indirimbo ntabwo uzi ukuntu tukuzi, kuki utanayita uranzi. Numva ni ibintu byiza ndavuga nti reka nyikore nzayiture abantu bose banzi imbere n’inyuma barimo umugore wanjye, abana banjye, abafana banjye…”

Yabajijwe ku ndirimbo yise ‘Impeta’ yakunzwe cyane ariko abantu bamwe bakaza no kuvuga ko igendanye n’ubuzima bwe, mu gusubiza avuga ko ari Clement wayanditse, wenda ishobora kuba ari inkuru y’undi muntu wagiye kwambika impeta y’urukundo umukobwa akayanga ariko atari we cyangwa Producer Clement.

Ni umwe mu bahanzi banditse izina rikomeye mu Rwanda kubera ijwi rihogoza benshi

Gusa ahishura ko n’ubwo muri bose nta n’umwe yarebaga byaje kuba no ku wundi musore w’inshuti ye.

Ati “Nta n’umwe hagati yanjye yavugagaho ariko na none yari indirimbo ifite icyo isobanuye kuko iyo nkuru yabaye ku wundi musore w’inshuti yanjye nagombaga kwambarira mu gihe kimwe. Byahuye n’uko byabaye tukiri kwandika indirimbo tutazi uko tuzayita.”

Ibihe bye muri Primus Guma Guma Super Star

Uyu muhanzi ni umwe mu bitabiriye iri rushanwa ku nshuro yaryo ya mbere ubwo ryatwarwaga na Tom Close, aho yavuze ko ryabaye umwanya mwiza wo kumenyana n’abandi.

Ati “Icyo ndyibukiraho ni uko nagize ibihe byiza byo kumenyana n’abandi bahanzi kubera ko Urban Boyz bari barimo, King James n’abandi. Twari dusanzwe duhurira ahandi hantu ariko tutaganira cyane ariko amezi atandatu n’abanye n’abandi bahanzi muri iri rushanwa byaranshimishije cyane.”

Avuga ko Rafiki ari umwe mu bantu yagize amahirwe yo kuganira nawe akamwigiraho byinshi ariko akishimira uburyo Safi yateraga urwenya.

Ati “Utuntu twaberaga inyuma ya camera twanshimishaga cyane hari umuhanzi Rafiki, ni umuntu uba wihagazeho cyane. Wamubona ku rubyiniro ari gusimbuka ariko ni umuhanzi w’umuhanga mu muziki no mu buzima busanzwe kuko hari ibindi bintu twagiye tuganiraho. Na Safi Madiba arasetsa cyane.”

Ashima cyane impano ya Mani Martin na Dr Claude bajyanye mu irushanwa rya ‘Idols 2007’ mu 2007 kuko ari abahanzi bashobora kuririmba mu buryo bwa live mu buryo buhambaye.

Mu bahanzi bari kuzamuka neza avuga ko Sintex ari umwe mu banyempano yishimira.

Ikiganiro kirambuye Kode yagiranye na IGIHE


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza