Ama G yasobanuye icyatumye aririmba ububi bw’umuntu (Video)

Yanditswe na Munyengabe Murungi Sabin
Kuya 8 Kamena 2018 saa 03:43
Yasuwe :
0 0

Hakizimana Amani [Ama G The Black], umuraperi ubirambyemo kandi umenyereweho indirimbo zikubiyemo amagambo yibazwaho byinshi, yongeye gukora mu nganzo aririmba ububi bw’umuntu.

Ama G asanzwe azwiho kwandika amagambo yumvikanamo ibitagenda mu muryango; yamamaye cyane mu yitwa ‘Uruhinja’, ‘Ikiryabarezi’, ‘Igifu’ n’izindi zavugishije benshi kubera ubutumwa yibandaho.

Ubu, Ama G The Black yakoze indirimbo yise ‘Umuntu’ nayo yatangiye gucurangwa mu buryo bukomeye kuri Radio zo mu Rwanda ndetse uwumvise amagambo uyu muraperi yayihurijemo ahita yibaza icyabimuteye n’icyo yari agambiriye.

Muri iyi ndirimbo, Ama G atangira yivuga amazina ubundi agakubita igitwenge ati “Umuntu? Umwana w’umuntu? Binadamu?”, ubundi agahita yanzika aririmba ububi bwe avuga ko ‘umuntu ari mubi by’ikirenga kuko yakoze ibidakorwa muri Edeni akarenzaho kwica Yezu’.

- Umuntu aseka inyuma kandi mo imbere arira,
- Umuntu ahinduka vuba nk’igicu cy’imvura,
- Umuntu ukora ibisasu byaduhitana,
- Umuntu umuguriza ababaye akakwambura,
- Umuntu urakira mukaba inshuti magara,
- Ariko ubutunzi bwashira mwahura agakwepa,…

Yongeraho ati “Umuntu utera imbere amenyo akayahekenya, yifuza guseka abandi bari kurira, akunda ibyiza gusa, yishimira ibyago by’undi yiyibagije ko iyo rupfu ahageze atudunda dondi dondi. Uritsamura ngo urakire, mu mutima ari ruragapfa, watsitara ngo impore kandi mu by’ukuri ngo iyaba cyari gipfuye. Umuntu akwanga akikubona, mwagera no mu kazi akakubikira imbehe.”

Mu kiganiro na IGIHE, Ama G yavuze ko yahimbye iyi ndirimbo ashingiye ku bisanzwe bibera ku Isi aho umuntu ahemukira mugenzi we, umukire akarya utw’umukene ntacyo yitayeho.

Yagize ati “Muri iyi ndirimbo nagarutse ku bibi, ibyiza ntacyo bitwaye ahubwo ibibi nibyo bifite ikibazo. Umuntu naguhemukira ntibizagutungure, nicyo ngaragaza muri iyo ndirimbo[…] N’iyo mwasezerana imbere y’Imana ashobora kwica ayo masezerano. Umuntu ni gutyo twabaye.”

Mu ndirimbo ze akunze kwibanda ku butumwa buvuga ibitagenda. Yavuze ko yahisemo uyu murongo kugira ngo ibihangano bye bijye bifasha umuryango kurushaho kugororoka.

Ati “Impamvu nibanda kuvuga ibintu bibi, mba ngira ngo ndebe ko twabikosora. Kuvuga ibyiza, kuvuga ko abantu bariye bahaze ndumva ntacyo byaba bimaze.”

Yanavuze ko atibasira abagore mu ndirimbo ze ahubwo ati “Nibasira ingeso zabo. Nuvuga ngo nibasiye abakobwa bakura ibyinyo niba ari ko babita, ntabwo ari bose, ahubwo ingeso z’abo bamwe muri bo ni zo mvugaho kandi ntabwo nzabibona ngo nceceke. Hari ababibona bagaceceke, njye ndabivuga, ni gutyo nteye.”

Ama G The Black afite gahunda yo gusohora Mixtape ye nshya yise ‘Umuntu’, ni nayo izagaragaraho indirimbo yitwa ‘Umwana w’umuhanda’ [ya Riderman] yasubiranyemo na Aline Gahongayire.

Ama G yakoze indirimbo yise 'Umuntu' ikubiyemo ububi bwe bwose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza