Alyn Sano ukunzwe mu ndirimbo ye na Buravan yavuze uko yatsinze ibishuko byo mu kabari

Yanditswe na Muvunyi Arsène
Kuya 31 Nyakanga 2019 saa 04:57
Yasuwe :
0 0

Izina Alyn Sano rimaze kumenywa n’abatari bake mu bakurikira umuziki wo mu Rwanda. Benshi bamushimiye ijwi rye ricengera mu gutwi rikagera ku ndiba y’umutima.

Umwaka umwe urashize atangiye umuziki by’umwuga, indirimbo enye zirimo “Naremewe Wowe”, “Rwiyoborere”, “Pain Killer” na “We The Best” nizo amaze gushyira hanze.

Impano ye yashimwe bikomeye na Yvonne Chaka Chaka ufatwa nk’umwamikazi w’umuziki wa Afurika. Bwa mbere bahuriye mu gitaramo cyiswe ‘Legends Alive’ cyabaye mu mwaka ushize.

Uyu mugore w’imyaka 54 aherutse kwandika ku mbuga nkoranyambaga ze ko yifuza ko bazakorana indirimbo nubwo nta bindi biganiro bigeze bagirana.

Alyn Sano yinjiye mu muziki asanzwe asusurutsa abantu muri hotel no mu tubari twiyubashye, aririmba indirimbo z’abandi mu buryo bwa ‘live’.

Ni akazi kamugiriye akamaro gakomeye kuko yabashije kwiyishyurira kaminuza arayirangiza ndetse abasha gufasha umuryango mu buzima bwa buri munsi.

Kuririmbira muri za hotel n’ubu aracyabikora kandi amafaranga asaruramo ayifashisha mu gutunganya indirimbo ze dore ko atarabona uwabimufashamo.

Ku rundi ruhande ariko, Alyn Sano avuga ko aka kazi kabamo ibishuku bitandukanye by’umwihariko ku mukobwa kuko ahuriramo n’abantu batandukanye bamusaba urukundo.

Ati “Ibishuko byinshi turabigira. Umuntu wenda akagukunda akaza akukubwira ngo reka duhite dukora ubukwe kandi wowe ushaka kwigumira mu muziki, kandi muri ubwo bukwe ukabona harimo ibintu byinshi byiza wahoze ushaka ukiri umwana.”

Alyn Sano avuga ko kuririmbira mu kabari habamo ibishuko byinshi

Si iby’abagabo gusa kuko Alyn Sano avuga ko umukobwa ukora nk’aka kazi aba afite ibyago byinshi byo kuba umusinzi, ibintu we avuga ko yabashije kurenga.

Ati “ Cyane cyane ibishuko by’inzoga no kujya mu tubyiniro byambayeho cyane. Ahantu nkora, abantu mba ndirimbira ni bene abo bantu. Niba ndirimbiye abantu banywa inzoga biraza kuba ngombwa ko nisanisha nabo. Icyo ni igishuko ariko ngira amahirwe ntabwo nywa inzoga, ntabwo njya nsohoka mu tubyiniro, ndabirwanya.”

Uyu mukobwa watangiye kuririmbira mu tubari mu 2015, avuga ko iyo ajya kwishora mu nzoga, atari kuba ageze aho ari kuko byari kwangiza akazi ke cyangwa se ishuri.
Ati “ Ntabwo ndatsindwa kuko iyo nza kuba naratsinzwe ntabwo mba ndi hano. Navaga ku kazi ngataha ku Irebero kandi niga Kibagabaga. Nkabyuka saa kumi n’imwe kuko nategaga bisi inshuro eshatu, nkava ku ishuri saa cyenda nkaza kwitegura no kuruhuka gato, saa mbiri nkahita njya mu kazi kuririmba nkarangiza saa saba, urumva ugiye kunywa inzoga wahita ubura kimwe.”

Afite inzozi zo kuzaba umuhanzikazi ukomeye muri Afurika, ndetse akanakorana indirimbo na bamwe mu bagore b’abanyabigwi mu muziki wo muri Afurika.

Alyn Sano afite inzozi zo kuba umuhanzikazi ukomeye muri Afurika

Reba indirimbo uyu mukobwa aherutse gukorana na Yvan Buravan


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza