Alpha Blondy umunyabigwi muri Reggae yatumiwe mu Rwanda

Yanditswe na Munyengabe Murungi Sabin
Kuya 1 Kanama 2017 saa 08:39
Yasuwe :
0 0

Umuririmbyi w’icyamamare ku Isi Seydou Koné[Alpha Blondy] ari mu bahanzi bakomeye bategerejwe kuzaririmba mu iserukiramuco ry’umuziki rya Kigali Up Music Festival.

Ubuyobozi bwa Kigali Up Music Festival bwatangaje ko umuririmbyi wubatse amateka akomeye muri Reggae, Alpha Blondy ari mu bahanzi bakomeye bagomba kuzaririmba muri iri serukiramuco rigiye kuba ku nshuro ya karindwi kuko ryatangiye mu mwaka wa 2011.

Alpha Blondy yemejwe nyuma y’uko mu minsi mike ishize byari byatangajwe ko Alicia Keys yiteguye kuza gukorera igitaramo mu Rwanda ariko abategura Kigali Up bavuga ko bagize ikibazo cy’ingengo y’imari itarahuye n’ibyari bikenewe mu guhaza ibisabwa mu rugendo rw’uyu muhanzi.

Umuyobozi wa Kigali Up Music Festival, Mighty Popo yavuze ko iri serukiramuco rizamara iminsi ibiri ribera i Kigali, guhera tariki ya 19 Kanama kugeza kuwa 20 Kanama 2017.

Yagize ati “Uyu mwaka iserukiramuco rigomba kuzaba ryagutse cyane, tugiye kuzana Bob Marley wa Afurika, Alpha Blondy. Ibi byamaze kwemezwa ni we uzaba ari umuhanzi ukomeye uyu mwaka. Abandi bahanzi bakomeye ku Isi baratangazwa vuba.”

Alpha Blondy ubusanzwe witwa Seydou Koné; yavutse kuwa 1 Mutarama 1953 muri Dimbokro, muri Ivory Coast. Ni umuririmbyi ufite amateka akomeye mu njyana ya reggae, ubu ni we muhanzi uyoboye kandi ukuze mu bakora uyu muziki muri Afurika.

Nyinshi mu ndirimbo yakoze guhera mu 1981 ari nabwo yatangiye umuziki zibanda ku nsanganyamatsiko zivuga kuri politiki, amahoro no guhashya amakimbirane n’umwiryane mu bihugu bitandukanye.

Mu ndirimbo yakoze zitabarika harimo izakunzwe cyane zirimo "Guerre Civile", "Téré", "Jerusalem" , “Brigadier Sabari”, "Les Imbéciles", "Journalistes en danger" yavugaga ku rupfu rw’uwitwa Norbert Zongo n’izindi.

Alpha Blondy yatangiye umuziki mu mwaka wa 1981

Alpha Blondy asanzwe aririmba mu rurimi rw’iwabo kavukire rwa Dioula gusa aririmba no mu zindi ndimi zirimo Icyongereza, Icyarabu n’Igiheburayo.

Iri serukiramuco ry’uyu mwaka ngo rizagira umwihariko kuko hashyizwemo n’igice cyahariwe abana kizajya gitangira saa tanu z’amanywa kugeza saa cyenda z’igicamunsi hanyuma igice cy’abakuze gihite gikomerezaho kugera saa sita z’ijoro.

Kigali Up yagiye irangwa n’udushya kuva mu mwaka wa 2011 ari nabwo Mighty Popo yayitangije avuye muri Canada aho yaherewe igihembo gikomeye cya Canada cya Juno Award.

Alpha Blondy umunyabigwi muri Reggae na we yatumiwe muri Kigali Up

Umva Alpha Blondy mu ndirimbo Les Imbéciles avuga uburyo abanzi ba Afurika ari Abanyafurika


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza