Akiwacu Colombe azahagararira u Rwanda muri Miss Supranational 2016

Yanditswe na Munyengabe Murungi Sabin
Kuya 5 Nzeri 2016 saa 07:57
Yasuwe :
0 0

Nyuma ya Sonia Gisa wahagarariye u Rwanda mu mwaka wa 2015, Akiwacu Colombe w’imyaka 22 y’amavuko ni we uzahatanira iri kamba mu marushanwa Mpuzamahanga ya Miss Supranational umwaka wa 2016.

Ubuyobozi butegura Miss Supranational bwemeje Miss Akiwacu Colombe wabaye Nyampinga w’u Rwanda muri 2014 ari we watorewe kuzahagararira iki gihugu muri aya marushanwa azabera muri Pologne.

Irushanwa rya Miss Supranational ku nshuro yaryo ya munani, rigomba kuzahuza abakobwa barenga 80 bo mu bihugu bitandukanye byo ku Isi harimo n’u Rwanda.

Miss Supranational izatangira mu Gushyingo izasozwe ku itariki ya 2 Ukuboza 2016 ahitwa Krynica-Zdrój muri Pologne [Poland].

Mu kiganiro na IGIHE, Dr.Uwamahoro Yvonne Umunyarwandakazi uba mu Budage wahagarariye u Rwanda bwa mbere muri Miss Supranational ndetse ahita ahabwa inshingano zo kujya atoranya ukwiye guserukira igihugu, yavuze ko uyu mwaka hemejwe Akiwacu Colombe kuko yabaye Nyampinga w’igihugu muri 2014.

Yavuze ko hagenda umukobwa wabaye Nyampinga w’u Rwanda keretse iyo irushanwa rigeze afite indi mirimo ari nabwo hashakishwa undi mukobwa waserukira igihugu.

Yagize ati “Colombe ni we wagombaga kugenda umwaka ushize ariko bipfa ku munota wa nyuma hagenda Sonia Gisa. Muri rusange biba byiza iyo hagiye Nyampinga w’igihugu ariko ntabwo biba byoroshye kumubona. Mbere yo kubaza abandi bakobwa mbanza kubaza aba Miss b’igihugu nabura ugenda tugafata mu bandi.”

Yongeyeho ati “Guhitamo Colombe nta kindi ni uko yabaye Miss Rwanda kuko nta competition ya Miss supranational turabasha gukora ngo duhitemo Miss wacu ni yo mpamvu duhitamo uwabaye Nyampinga w’igihugu.”

Ku nshuro ya mbere abategura Miss Supranational bateguye n’itorwa rya ba Rudasumbwa bityo u Rwanda rukaba rugishakisha umusore uzaruserukira muri Pologne.

Ati “Uyu mwaka hazabaho gutora Miss Supranational na Mister Supranational ku nshuro ya mbere, ubu turacyashakisha umuhungu wahagararira u Rwanda.”

Miss Supranational azatorwa kuwa 2 Ukuboza 2016 naho Rudasumbwa atorwe kuwa 3 Ukuboza 2016 mu birori bizabera ahitwa Krynica Zdrój’s Ice Arena, mu majyepfo ya Pologne.

Ni ku nshuro ya Gatanu u Rwanda rugiye kwitabira Miss Supranational, muri 2012 hagiyeyo Uwamahoro Yvonne, Miss Mutesi Aurore[2013], Umwali Neema Larissa [2014], Gisa Sonia[2015] na Akiwacu Colombe[2016].

Sonia Gisa yatahanye ikamba rikomeye

Mu mwaka ushize Sonia Gisa wari uhagarariye u Rwanda yegukanye ikamba rikomeye rya Miss Supranational Africa. Ni ubwa mbere Umunyarwandakazi yegukanye ikamba rya Nyampinga wa Afurika muri Miss Supranational mu myaka ine ishize kuva u Rwanda rwatangira guhagararirwa.

Gisa Sonia kandi yahesheje u Rwanda kuboneka mu bihugu icumi byatoranyijwemo umunyamideli wahize abandi, icyo gihe yari ahanganye n’abo muri Philippines, Colombia, Dominican Republic, Mexico, India, Paraguay, Panama, Slovak Republic na Poland.

Miss Akiwacu Colombe ugiye guserukira u Rwanda asigaye aba mu Mujyi wa Paris mu Bufaransa, yavuye i Kigali kuwa 24 Nzeri 2015. Yasize abwiye IGIHE ko “agiye kwiga muri Institut Supérieur du Commerce de Paris mu ishami rya Commerce de Luxe”.

Muri 2015, Sonia Gisa yatahanye ikamba rya Miss Supranational Africa
Akiwacu Colombe ni we uzahagararira u Rwanda uyu mwaka
Akiwacu Colombe, Nyampinga w'u Rwanda umwaka wa 2014 asigaye aba mu Bufaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244