Agatoki ku kandi, abahatanira Primus Guma Guma bategereje ifirimbi ya nyuma

Yanditswe na Dusabimana Aimable
Kuya 5 Nyakanga 2018 saa 10:13
Yasuwe :
0 0

Abahanzi bahataniye ibihembo bya Primus Guma Guma Superstar muri iki gihe bategereje umunsi wa nyuma w’irushanwa hakamenyekana uhiga abandi, bunze ubumwe mu buryo bwatangaza uwibaza ko ari abakeba.

Ibi byigaragaje cyane mu gitaramo gito giteguza abatuye mu Mujyi wa Kigali umunsi wa nyuma w’iri rushanwa cyabereye ku isoko rya Kimironko. Nubwo bitababuza guhangana mu kurushanwa nk’ibisanzwe bo ubwabo biboneye igisobanuro cy’umubano bafitanye wihariye.

Umwuka uri hagati yabo watungura uwibaza ko batarebana neza kubera ifaranga bahataniye kuko usanga urwenya ari rwose aho bateraniye n’uwajemo atamenyeranye na bagenzi ngo yahabonye inshuti ku buryo batangiye no gutekereza imishinga bazahuriramo ubwo bazaba basoje urwo rugendo.

‘Mu kabati k’amabanga’ ni yo nyito bahaye imodoka bagendamo iyo bitabiriye ibitaramo ngo ntacyasohokamo. Ubukeba ku rubyiniro burigaragaza ariko nyuma ukabona basangira banezerewe.

Ubwo Jay C yaririmbaga indirimbo yise “I Am Back” ku Kimironko, Bruce Melodie yasimbukiye ku rubyiniro aramushyigikira undi na we ashimangira ko hari ubwo “imibare ijya inyerera agatora mugenzi we,” mu rwego rwo kumvikanisha ko bashyigikirana.

Buri wese yasabye abafana be gushyigikira mugenzi we atora umubare yahawe mu irushanwa, Bati “Icy’ingenzi ni uko utibagirwa kudutora!”

Ibitaramo bito byinjijwe muri Primus Guma Guma bifite umwihariko kuko abahanzi bagera mu duce dutandukanye two hirya no hino mu gihugu bashishikariza abafana babo kubatora. Nta batanga amanota bahagera kuko ikiba kigamijwe ari ubusabane bw’abahanzi n’abakunzi babo.

Usibye ubufatanye bwa Jay C na Bruce Melodie, aba bahanzi berekanye umwihariko wo gushyigikira Christopher wagiye ku rubyiniro nyuma y’abandi bagamije gutumira abafana bose mu gitaramo gisoza irushanwa gitegerejwe mu Mujyi wa Kigali ku wa 14 Nyakanga 2018.

Iyo uganiriye n’aba bahanzi wumva bahuriza ku kintu kimwe cy’uko nta rwicyekwe n’ihangana rirenga ku rubyiniro bafite hagati yabo. Bashimangira ko guhurira muri iri rushanwa rya Primus Guma Guma byatumye barushaho kunga ubumwe no kugirana undi mubano bazanakomeza nyuma yaryo.

Umuraperi Jay C uri mu bitabiriye iri rushanwa ku nshuro ya mbere yabwiye IGIHE ko imodoka bagendamo bajya mu bitaramo bakarenga imisozi n’iyindi bajya mu ntara no mu duce twa kure yabaye intandaro yo kubaka umubano wihariye hagati yabo.

Yakomoje kuri Bruce Melodie wamufashije ku rubyiniro nubwo bahataniye igikombe, ati “Turahanganye, ariko duhanganye mu marushanwa ntabwo duhanganye mu buzima. Ntabwo bivanaho ubushuti bwacu kuko byanze bikunze ababurana ari babiri umwe aba yigiza nkana.”

Yongeye ati “Kenshi iyo ndi kunywa, tuba turimo gusangira, usibye na we tuba tuganira cyane mu bantu duhanganye hari na Khalfan, Mico n’abandi. Gushiduka namutoye ni uko tuba turi gusangira cyangwa na we akantora. Kuba namutora na we yantora, ntabwo nanywa byeri icumi ngo nitore incuro icumi ngo we mwime kamwe kandi ari inshuti yanjye.”

Yavuze ko by’umwihariko ubu yungutse Christopher nk’inshuti muri iri rushanwa. Ati “Buriya muri ‘Bus’ hararyoshye. Ni mu kabati k’amabanga yacu, nta kibazo na kimwe rwose.”

Abahanzi batunguye abafana ku Kimironko bagaragara ku rubyiniro bari hamwe

Abandi bahanzi na bo wumva bitsa ku kintu cy’ibiparu birangwa muri iyo modoka ibahuza bigakomeza no mu zindi gahunda zose bahuriramo ku buryo babona Primus Guma Guma Superstar nk’iyarushijeho kubahuza aho kuba irushanwa ribahanganisha ngo bagirirane ibibazo.

Tizzo uri mu bagize Active na yo ihataniye Primus Guma Guma Superstar avuga ko nk’abahanzi batangiye kwitegura igitaramo kizatangirwamo igikombe by’umwihariko bategura uko bazitwara ku rubyiniro, bafite icyizere ko bizanogera abafana.

Yagize ati “Ibyo turi kubategurira ku munsi wa nyuma nibyo dushaka ko bazaza kureba, ntabwo twabivuga ku munwa ngo bisobanuke ahubwo bisobanukiye ku rubyiniro, niyo mpamvu tubararikira kuzaza bakareba kandi twizeye ko bazishima.”

Mu myaka yashize wasangaga umwuka uri mu bahanzi ari uguhangana bikomeye ndetse ufashwe n’uburwayi ugasanga atunze agatoki bagenzi be ko baba ari bo ntandaro ariko ubu bafatanye urunana, bategereje umunsi wa nyuma w’igikombe.

PGGSS ya munani yazanye impinduka kuko ubu umuhanzi uzaba uwa mbere akemezwa n’akanama nkemurampaka azahembwa miliyoni 20 Frw. Muri uyu mwaka hiyongereyemo ikindi gihembo aho umuhanzi watowe cyane n’abafana azahabwa miliyoni 15 Frw. Umuhanzi umwe ashobora no kwegukana ibi bihembo byombi.

Akanyamuneza kaba ari kose ku bafana kubera Primus
Bruce Melodie na Jay C baririmbanye indirimbo yabo 'I Am Back'
Bruce Melodie n'abandi bahanzi bashyigikiye Christopher ubwo yaririmbaga bwa nyuma ku Kimironko
Imodoka bagendamo iyo bagiye mu bitaramo ngo bayita 'Mu kabati k'amabanga!'
Ku Kimironko aba bahanzi bari bashyigikwe cyane

Amafoto: Muhizi Serge
[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza