African Talents Awards 2019: Yvan Buravan ahatanye n’abarimo Davido, Diamond na Burna Boy

Yanditswe na Nsengiyumva Emmy
Kuya 25 Ugushyingo 2019 saa 02:20
Yasuwe :
0 0

Yvan Buravan uherutse gutangazwa nk’umwe mu bahanzi bahatanira ibihembo bya African Talent Awards 2019, ahatanye n’abahanzi b’ibyamamare barimo Davido, Diamond, Burna Boy n’abandi benshi bafite amazina akomeye muri Afurika.

Buravan wegukanye igihembo cya Prix Découvertes RFI 2018, yatoranyijwe mu bantu 600 bagomba guhatanira ibihembo bya African Talent Awards 2019 bibera i Abidjan muri Côte d’Ivoire, aho ahatana mu cyiciro cy’umuhanzi mwiza w’umwaka.

Muri iki cyiciro Buravan ahanganye n’abandi nka Innos’B wo muri RDC, Kerozen wo Côte d’Ivoire, Serge B wo muri Côte d’Ivoire, Burna Boy wo muri Nigeria, Ariel wo muri Côte d’Ivoire, Shatta Wale wo muri Ghana, Davido wo muri Nigeria, Magasco wo muri Cameroon, Robinio wo muri RDC, Sidiki wo muri Mali na Diamond wo muri Tanzania.

Ibi bihembo bihabwa indashyikirwa mu mikino, sinema, imideli, umuziki, ikoranabuhanga n’ibindi. Buravan yatoranyijwe kubera ibitaramo bikomeye bizenguruka Afurika yakoze ndetse no kuba umwe mu bahanzi bigaragaje neza umwaka ushize akanegukana Prix Découvertes RFI 2018.

Abari guhatana muri uyu mwaka bari mu byiciro 38, bose baturuka mu bihugu 35 bitandukanye.

Ibihembo bya ‘African Talent Awards (ATA)’ bitegurwa mu rwego rwo gushimira urubyiruko rw’abanyempano zitandukanye bo ku mugabane wa Afurika no kubafashaka kumenyekanisha imirimo yabo.

Bifite intego yo guhuriza hamwe urubyiruko ruva mu bihugu bitandukanye hagamijwe kubaka Afurika yunze ubumwe, izira umwiryane. Bizatangwa ku wa 14 Ukuboza 2019 mu birori bizabera mu Mujyi wa Abidjan muri Côte d’Ivoire.

Ku wa 8 Ugushyingo 2018 nibwo Buravan yegukanye igihembo cya Prix découvertes RFI 2018. Yari mu bahanganiye igihembo gitangwa na Radiyo Mpuzamahanga y’Abafaransa, RFI, gihabwa abahanzi b’abahanga mu muziki baturuka mu bihugu bitandukanye muri Afurika no hanze yayo.

Buravan yegukanye igihembo cya €10,000 ndetse afashwa gukora ibitaramo byazengurutse Afurika na kimwe gikomeye yakoreye i Paris mu Bufaransa.

Yvan Buravan ahanganye n'abahanzi bakomeye mu cyiciro arimo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza