Abategura Miss Supranational bahakanye ibyo gusimbuza bikini inshabure

Yanditswe na Muvunyi Arsène
Kuya 26 Nyakanga 2019 saa 05:11
Yasuwe :
0 0

Abategura irushanwa rya Miss Supranational Rwanda, batangaje ko umwambaro w’inshabure udashobora gusimbura bikini kuko bidahuje igisobanuro.

Ku nshuro ya mbere mu Rwanda hagiye kubera irushanwa rya Miss Supranational Rwanda, rizatorwamo uzahagararira igihugu mu irushanwa ryo ku rwego rw’Isi rizabera muri Pologne.

Iri rushanwa ryakunzwe kutavugwaho rumwe na benshi mu banyarwanda bitewe n’igice cyo kwiyerekana mu myambaro yo kogona izwi nka bikini, ifatwa nk’igaragaza itesha agaciro uyambaye kuko igaragaza bimwe mu bice by’ibanga by’uyambaye.

Mu rwego rwo gukemura iki kibazo hari amakuru yasakaye avuga ko uyu mwambaro uzasimbuzwa inshabure nk’umwambaro gakondo w’abanyarwanda.

Mu kiganiro IGIHE yagiranye na Niyomugaba Jonathan, ushinzwe kurengera umuco mu majwi n’amashusho muri RALC, yavuze ko mu biganiro bagiranye n’abategura Miss Supranational Rwanda, babasabye ko bashaka undi mwambaro utari bikini kuko ntacyo ivuze mu muco w’abanyarwanda.

Ati “Si ngombwa ko umukobwa w’umunyarwanda yambara bikini kuko nta kintu cyacu aba yerekanye. Bikini si umwambaro wacu, si n’umuco wacu si n’umuco kujya ku mazi koga, ni ibintu byaje ejo bundi ari ibinyamahanga ariko umwambaro wo twawubona umuntu yakwambara atambaye ubusa agiye ku mazi.”

Niyomugaba yongeyeho ko mu nama babagiriye babasabye ko mu irushanwa rizabera mu Rwanda, bazakuramo icyiciro cyo kwiyerekana muri bikini kuko bidakenewe.

Ati “Bambwiraga ko byaba byiza icyo gice bagishyizemo mu irushanwa ry’inaha mu Rwanda, ndababwira nti ‘njyewe simbishyigikiye kuko si ngombwa ntabwo tubikeneye cyane gushyiraho igice cya bikini.”

Umuyobozi wa KS Ltd itegura iri rushanwa, Nsengiyumva Alphonse, yabwiye IGIHE ko bidashoboka ko inshabure zisimbura bikini muri iri rushanwa, ahubwo bazadodesha bikini zitambika ubusa abazambaye.

Ati “Ntabwo inshabure zasimbura bikini. Hari uburyo bwinshi bwo gukora bikini itateza ikibazo. Uzakora iyo myenda twamubwiye gukora itambika ubusa cyane.”

Nsengiyumva atanga urugero rwa bikini yambawe n’abakobwa bahatanye muri iri rushanwa mu mwaka ushize, aho bikinzeho udutambaro tugufi duhisha ibice byabo by’ibanga.

Ku byo gukuramo igice cya bikini mu irushanwa rizabera mu Rwanda, Nsengiyumva yavuze ko batagikuramo kuko byaba ari ugutakaza umwimerere w’irushanwa ku rwego rw’Isi.

Kugeza ubu haracyari ibiganiro bigamije kunoza uburyo imyambarire ikwiye muri Miss Supranational Rwanda yaba imeze. Umwihariko w’iri rushanwa ku bijyanye n’imyambarire ni uko yose izaba yarakorewe mu Rwanda, mu rwego rwo guteza imbere gahunda ya Made In Rwanda.

Kuri ubu irushanwa rya Miss Supranational Rwanda riracyari mu cyiciro cyo kwiyandikisha, umunsi waryo wa nyuma uzaba tariki 07 Kanama 2019.

Umwambaro utagaragaza ibice by'ibanga niwo uzakoreshwa muri Miss Supranational Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza