Abaririmbyi ba Korali Impuhwe baguye mu mpanuka bibutswe mu buryo bwihariye

Yanditswe na Mukwaya olivier
Kuya 31 Nyakanga 2017 saa 03:01
Yasuwe :
0 0

Imyaka 15 irashize, abahoze ari abaririmbyi n’abaterankunga 12 ba Korali Impuhwe ikorera umurimo w’Imana muri ADEPR Gisenyi baguye mu mpanuka bakoze bagiye mu ivugabutumwa.

Iyi Korali ibarizwa mu Itorero ry’Akarere ka Rubavu, mu Rurembo rw’Uburengerazuba iri mu bihe bidasanzwe byo kwibuka abagera kuri 12, baguye mu mpanuka, ubwo bari mu rugendo rw’ivugabutumwa bari bagiyemo mu Itorero rya ADEPR Mukingi mu yahoze ari Gitarama.

Iyi korali Impuhwe imaze iminsi mu giterane cyatangiye kuwa 24 Nyakanga gisozwa ku Cyumweru tariki ya 30 Nyakanga 2017 muri ADEPR Paruwasi ya Gisenyi. Mu gusoza iki giterane, aba baririmbyi baremeye imiryango y’abaririmbyi baburiye ababo muri iyo mpanuka yabaye kuwa 27 Nyakanga 2002.

Ibikorwa Korali impuhwe yakoreye bagenzi babo birimo ibiribwa n’ibindi bikoresho by’ibanze, byose bifite agaciro ka miliyoni imwe y’amafaranga y’u Rwanda.

Iki giterane kuva ku munsi wa mbere kugeza ku munsi wo kugisoza cyagiye kigaragaramo amakorali atandukanye yo muri Paruwasi ya ADEPR Gisenyi nka Bethrehem, Amahoro, Alliance ,Bethifage, Evangelique, Bether, Rehoboth, Maranatha n’izindi .

By’umwihariko iki giterane cyitabiriwe na Korali Baraka yari yaturutse muri Kenya ndetse na Alex Dusabe waririmbye mu birori byo gusoza. Abayobozi batandukanye b’itorero barimo Umuvugizi wungirije wa ADEPR , Rev.Karangwa John, Umuyobozi wa ADEPR mu Ntara y’Uburengerazuba Rev.Kajibwami Tharcisse, Umushumba wa ADEPR mu Karere ka Rubavu Rev.Claver Akoyiremeye ndetse n’abayobozi b’itorero muri Paruwasi ya Gisenyi.

Umuhango wo gusoza iki giterane no kuzirikana abaririmbyi n’abaterankunga ba Korali Impuhwe baguye mu mpanuka mu mwaka wa 2002 bunamiwe ndetse hazirikanwa ku bikorwa n’umurage basize ku Isi.

Umuyobozi wa Korali Impuhwe, Ruzindana Gad, yatangarije IGIHE ko bafite umunezero kuko basoje neza igiterane cy’icyumweru bari bateguye kuko cyagiye cyitabirwa kandi abantu bagezweho n’ijambo ry’Imana n’indirimbo z’amakorali yatumiwemo.

Yagize ati "Iki giterane twagiteguye muri gahunda yo kuzirikana abariririmbyi n’abaterankunga bacu baguye mu mpanuka ubu hakaba hashize imyaka 15 ,ikiduhumuriza imitima ni uko bitadutunguye Imana yari yaratubwiyeko ari abageni Yesu agiye kwishyira. “

Yongeyeho ati “Niyo mpamvu mu kubibuka twateguye iki gikorwa cyo gufasha imiryango basize tukaba twabahaye ibyo kurya ndetse n’amafaranga kandi birumvikana ko twabahaye ibitangana kuko bose badafite ubushobozi bumwe, bose ibyo bahawe bifite agaciro k’amafaranga agera kuri miliyoni imwe.”

Abagize imiryango y'abaririmbyi ba Korali Impuhwe baguye mu mpanuka mu 2002 bahawe ubufasha

Korali Impuhwe yatangiye umurimo w’Imana mu 1987, icyo gihe yari iy’ishuri ry’icyumweru ariko yubakiye ku isezerano ryo kwaguka mu ivugabutumwa.

Muri Mata 1994, Jenoside yakorewe Abatutsi yatumye Korali icikamo ibice bamwe barahunga abandi baricwa ariko nyuma y’ibi bihe bikomeye u Rwanda rwanyuzemo yongeye kwiyubaka.

Ubuyobozi bwa Korali Impuhwe bwasoje igiterane bufasha imiryango y'abahoze ari abaririmbyi bazize impanuka
Muri iki giteranebibutse abari abaririmbyi ba Korali Impuhwe baguye mu mpanuka mu myaka 15 ishize
Korali Impuhwe yakoze igiterane cyo kwibuka abaririmbyi baguye mu mpanuka mu myaka 15 ishize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza