00:00:00 IGIHE NETWORK KN KINYARWANDA EN ENGLISH FR FRANCAIS

Abanyeshuri batekerejweho muri Silent Disco igiye kubera i Huye

Yanditswe na Nsengiyumva Emmy
Kuya 8 Ugushyingo 2021 saa 09:56
Yasuwe :
0 0

Abanyeshuri biga muri Kaminuza n’amashuri yisumbuye bashyiriweho umwihariko mu gitaramo cya Silent Disco kigiye kubera mu Mujyi wa Huye mu mpera z’iki cyumweru ari nacyo kizaba ari icya Mbere kihabereye kuva COVID-19 igeze mu Rwanda.

Iki gitaramo giteganyijwe kuba ku wa Gatanu, tariki 12 Ugushyingo 2021, muri Ibis Hotel, kizaba kirimo abahanga mu kuvanga imiziki bazasusurutsa abazacyitabira.

Aba-Djs bazasusurutsa abitabiriye iki gitaramo barimo Dj Diallo, Dj Rugamba, Dj Sonia, Dj Brianne n’abandi.

Muri iki gitaramo cyateguwe na Decent Entertainment, abanyeshuri bashyiriweho umwihariko kuko mu gihe abandi bazinjira batanze 5.000 Frw, abanyeshuri bo bazishyura 3000 Frw kandi bahabwe na ‘écouteurs’.

Muyoboke Alexis uyobora Decent Entertainment yateguye iki gitaramo, yabwiye IGIHE ko impamvu batekereje kujya gutaramira ab’i Huye ari uko bakunda umuziki kandi bakunda kwitabira ibirori.

Ati “I Huye buriya niho umuziki watangiriye, ni abantu bakunda umuziki kandi bakanabigaragaza, by’umwihariko rero murabizi ko muri iki gihe Silent Disco igezweho, dushaka rero kujyana aba-Djs bagezweho bakajya gutaramira abanyabirori b’i Huye.”

Yakomeje agira ati “Ikindi wenda navuga, ni uko muri uriya Mujyi wa Huye, abanyeshuri ni bo benshi, rero tunazirikana ko amafaranga baba bafite adahwanye n’ay’abakozi, natwe twarahabaye turabizi. Bazaze ari benshi duhurire kuri Ibis Hotel ubundi, dufatanye kwishima.”

Muyoboke yavuze ko uretse kuba bazajya bahabwa écouteurs, uzajya yinjira azajya anahabwa icyo kunywa cy’ubuntu ku muryango. Abazitabira igitaramo kandi bazubahiriza amabwiriza yo kwirinda Covid-19, nk’uko ateganywa n’inzego zibishinzwe.

Biteganyijwe ko nyuma yo gutaramira ab’i Huye ku wa Gatanu, aba ba-Djs bazahita bakomereza mu Mujyi wa Rusizi ku wa Gatandatu.

Ibitaramo bya Silent Disco bimaze kumenyerwa mu bakunzi b'umuziki
Abanyeshuri biga muri Kaminuza n’amashuri yisumbuye bashyiriweho umwihariko mu gitaramo cya Silent Disco kigiye kubera mu Mujyi wa Huye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .